3
Ngal’an urngin ban’en
Urngin ban’en nma yib u roy u fayleng e ma yib ko ngiyal’ nike duwgiliy Got.
Ma turguy ngal’an e gargel nge ngal’an e yam’;
nge ngal’an e woldug ni ngan yung nge ngal’an ni ngan pug;
nge ngal’an ni ngan thang e pogofan nge ngal’an ni ngan gol nigey;
nge ngal’an ni ngan buthug nge ngal’an ni ngan toy.
Ma turguy ngal’an ni nge kireban’uy nge ngal’an ni nge felan’uy;
nge ngal’an e dolol’oy nge ngal’an e churu’;
nge ngal’an ni nge par e galicha’ niyow bmabgol nge ngal’an ndabi par e galmabgol nga ta’bang;
nge ngal’an ni nga ni pi’ e felan’ nge ngal’an ndab ni pi’ e felan’.
Ma turguy ngal’an ni ngan gay ban’en nge ngal’an ni nge yan ban’en nga bang;
nge ngal’an ni ngan chibgiliy ban’en nge ngal’an ni ngan n’ag ban’en;
nge ngal’an ni ngan guchthuy nge ngal’an ni nga nip’;
ngal’an ni ngan th’ab gulungey nge ngal’an ni ngan welthin.
Ma turguy ngal’an e t’ufeg nge ngal’an e fanenikay;
ngal’an e mael nge ngal’an e gapas.
Mange ke yag ngodad ko gabin e maruwel rodad? 10 Kug guy e maruwel nike pi’ Got ngodad ni nga’ud muruwliyed. 11 Ke turguy ngal’an urngin ban’en ke tay. Ke taydad ni gadad ba’adag ni ngad nanged e tin bay nga m’on ni bay fini yib, machane de taydad ni nge tamilangan’dad ko tin nike m’ay i leamnag rok ni nge rin’ aram ko tabolngin nge yan i mada’ ko tungun. 12 Ere ku gu nang ni n’en ni nge rin’ be’ e nge par nib felan’ me tiyan’ ko tin be rin’ u nap’an ni be par nib fos ko biney e tamilang. 13 Gadad gubin ndabisiy ni ngad abichgad ma gadad garbod nge felan’dad ko tin kad muruwliyed; ya pin’ey ni gubin e tow’ath rok Got ngodad.
14 Gubin ban’en nma rin’ Got e ra par ndariy n’umngin nap’an. Dabiyag ni ngan puthuy ban’en ngay ara nchuweg ban’en riy. Ke tay Got ni aray rogon ni fan e nge par e girdi’ ni bay madgun u wun’rad. 15 Tin bay e ka ba kakrom ni immoy; ma tin bayib e ki’ immoy. I Got e be gagiyegnag ni tin immoy kakrom ke chuw, e ngki yib i m’ug bayay nge bayay.
Tin nde yal’uw ni yibe rin’ u fayleng
16 Gathi kemus ara’, ku er rogon ni ku gguy ni denen ni kireb e be yin’ luwan e tin yal’uw nge tin mat’aw ko biney e tamilang. 17 Kugog ngog nike lungug, “Got e bayi duwgiliy e n’en ni nge rin’ ngak e tin nib mat’aw e girdi’ nge tin ntagan, ya gubin ban’en nge gubin e ngongol e bay yib i m’ug ma bay nrin’ u ngal’an nike m’ay i duwgiliy rok Got.” 18 Mug t’ar u wan’ug ni Got e be sikeng nagdad e girdi’ ni nge dag ngodad ni gathi ri gadad ba thil ko gamanman. 19 Ya ta’reb rogon e n’en ni nge yib ngak e girdi’ nge gamanman. Ya yad ra yim’ ni yad gubin. Ta’reb rogon e pogofan ni bay rorad. Girdi’ e gathi bfel’ rogon boch rok e gamanman, ya yafos ko biney e tamilang e mm’ayfan ngorow niyow l’agruw. 20 Ta’ab yang i ban’en e bayi yan e girdi’ nge gamanman ngay, bay rsulod ngar ngal’gad ni fiyath ya ra sumgad ko fiyath. 21 Mini’ e rayag rok ni nge micheg ni ya’al ko girdi’ e ra yan ngalang, ma ya’al ko gamanman e ra yan nga fithik’ e but’? 22 Ma aram mu gu nang ni n’en th’abi fel’ ni nge rin’ be’ e nge felfelan’ ko tin wom’ngin e maruwel rok. Dariy ban’en ni rayag ni ngad rin’ed. Ya dariy kanawo’en me nang e n’en ni yibe rin’ u tomuren nike yim’.