15
Ba fanathin u murung’agen e grape
1 I yog SOMOL ngog.
2 Ni ga’ar, “Fak e girdi’, urgon i ta’rebnag ba kenggin e grape ko kenggin ba ke gek’iy? Ba mang e bfel’ u papangin e gek’iy ni grape ni yira ta’rebnag ko pi gek’iy u loway?
3 Rayag ni ngam fanay kenggin nga ban’en? Rayag ni mu ngongliy ni ngu’un the’ ban’en ngay?
4 Kemus ni bfel’ ni ngu’un mo’oruf ngay. Ma nap’an nra yik u ba ley ngu ba lay me ke achaffin lukngun, ma gur ku rayag ni ngam fanay nga ban’en?
5 Dariy ban’en ni bfel’ ngay u m’on ni kan orfeg. Ma chiney nike mo’oruf ke par ni go’ achaffin, nri dakriy ban’en ni bfel’ ngay.”
6 Irera’ e n’en ni be yog SOMOL ni Th’abi Tolang: “Bod rogon ba ke grape ni kan fek u loway kan orfeg, e aram rogon ni bay gu fek e girdi’ nma par u lan yu Jerusalem
7 nggu gechig nagrad. Kar thaygad u reb e nifiy, machane chiney e ku nifiy e bay ra yikgad ngay. Ma ngiyal’ ni gu ra gechig nagrad, ma ga ra nang ni Gag fare SOMOL.
8 Ka ra pired ni dakrir yul’yul’gad ngog, ma aram e bay gu pag e re binaw nem ndakriy be’ riy.” I SOMOL ni Th’abi Tolang e keyog e pi thin ney.