23
Feni ta denen l’agruw i walag ni ppin
1 I SOMOL e non ngog,
2 ni ga’ar, “Fak e girdi’, imoy l’agruw i ppin ni yow walag.
3 Nap’an ni kayow bitir, ni yow ma par u lan yu Egypt, miyow par nga gil’ e pumo’on, ma aram miyow mang l’agruw ni’ ni yow ma falchuway’ ngorow.
4 Bin ilal rorow e Oholah fithingan (Ni be yip fan yu Samaria), ma bin bitir rorow e Oholibah fithingan (Ni be yip fan yu Jerusalem). Gu le’engiy row ni yow l’agruw, nge yib fakmad.
5 Yug aram rogon nib milfan Oholah ngog, ma ka be falchuway’ ngak ma ka be lol’oeg e pi ilingen nu Assyria,
6 ni bogi salthaw ni kar chuwgad ko mad ni purple ni ta’reb rogon, ni bog ni’ ni yima ta’farad mab tolang e liw rorad; go’ yad picho’ay ni kayad ba pagel ni yad bogi tolang ko pi’in nma yan u os.
7 I Oholah e i af u pa’ urngin e tayugang’ nu Assyria, ni waliy e dawol rok nge alitnag ir ko pi liyos nu Assyria nma tayfan.
8 Miki tabab ko n’en ni ki i rin’ u Egypt ni i falchuway’ ngak, ni aram e gin ni nang e pumo’on riy. Ka nap’an e kabochi rugod, mi i moleg e pi pumo’on ni bod rogon be’ ni bpin nma falchuway’ ngak.
9 Ma ere gu pi’ Oholah nga pa’ e pi’in nu Assyria ni pi ilngen ni kariyim’ ni bochrad.
10 Miyad luf madan nge par u tamilang, miyad fek pifak ni pumo’on nge ppin, ma aram miyad li’ ko saydon nge yim’. Pi’in ni ppin u gubin yang e ur non non niged.
11 “Yug aram rogon ni guy Oholibah ni walagen e n’en nike buch rok, ma ir e rigel boch e atlonglong rok nge chuway’ ni i tay ngak nga rogon ni i rin’ Oholah.
12 Ku ir ma dabki wulgo’ ni be dawolnag e pumo’on nu Assyria ni yima ta’farad nge pi tayugang’, nge salthaw ni kar chuwggad ko mad nta’reb rogon nib ga’ ra’en, nge pi tolang ko pi’in ma yan u os, ni gubin e picha’ney miyad ba picho’ay ni kayad ba pagel.
13 Kug guy nrib thum’ ngaru’ e kireb rok, ni kab gel e kireb rok ko bin nganni’ i walagen.
14 “Ma i gel fane kireb i yan. Oholibah e guy ya’an e pumo’on nu Babylon ni kan ker nga downgin e rungrung kan achay ko row.
15 Ni bay e leed u lukngurad nge yung i mad ni kan bachiy u daken lolugenrad, me yib wuran ngan’ fa picha’ nu Babylon ni pi’in tolang ko girdi’en e yan u os.
16 Nap’an e yigi guy fapi ya’an e pumo’on, me suguy e darngar lanyan’ me pi e mal’og nge yan ngak fapi pumo’on nga Babylon.
17 Me yib piyu Babylon ngak ngu’ur moleged. U ra gosgos niged nib pag rogon nge thiyear me tomur riy me chuwan’ nge fanenikayrad.
18 Me dag downgin u fithik’ e girdi’ ni yo’or ma go’ nnang nib gathar. Ri chuwan’ug rok ni bod ni chuwan’ug rok e bin ilal i walagen.
19 Miki almarin boch ni i falchuway’ ngak, ni bod ngonglen ni kabochi rugod, ni ba’aram ni’ i falchuway’ ngak u lan yu Egypt.
20 Ridaki wulgo’ ni be darngalnag e pumo’on ni tin bagel e darngal rorad ni bod e dongki nge os ni kab pagel.” (
21 Oholibah, ri kag ba’adag ni ngkum sul ko gafarig rom fa ngiyal’nem ni kag bochi rugod u lan yu Egypt, ni i math e pumo’on riy nga thuthum ma ga par ngagil’ e pumo’on.)
Pufthin rok Got nga daken fa bin bitir ko fagal walag
22 “Oholibah, irera’ e n’en ni gu be yog ngom i Gag SOMOL ni Th’abi Tolang. Ke chalibam ngak pi ilngem, machane bay gu gagiyeg nagrad ngar damumuwgad ngom miyad yon’em nga langob.
23 Bay gu kunuy gubin e tayugang’ ni kab pagel ma yad ba picho’ay nge pi’in nib tolang e liw rorad ko pi salthaw nma yan u os u Babylonia ngu Assyria, nge pi ganong ko pi Kaldean nu Pekod, Shoa, ngu Koa.
24 Bay ra chamgad ngom ko lel’och, ni kar feked barba’ i salthaw nib ga’ ni bay e chariot rorad nge wagon nma fek e chugum. Yad ra rungrung ko shield nge helmet ngarbad ron’ed gur nga longob. Ma bay gu pi’em nga pa’rad, ma bay ra pufthin niged gur u rogon e tirorad e motochiyel.
25 Bochan e kug damumuw ngom, ere bay gu pag ngar rin’ed e tin yad be finey ngom u fithik’ e damumuw rorad. Yad ra th’ab p’ethingum nge telim miyad thang e pogofan rok pifakam. Arrogon, bay ra feked rom pifakam ni pumo’on nge ppin ngar urfiyedrad ni kayad bfos.
26 Bay ra guchthuyed madam miyad fek e machaf nge nunuw rom.
27 Bay gu taleg ngonglem ni kireb nge tin golong e gafarig ni mu tabab ngay u lan yu Egypt. Ma dakuriy bangiyal’ ni ga ra sap ngab liyos ara mu leamnag yu Egypt bayay.”
28 Irera’ e n’en ni yog SOMOL ni Th’abi Tolang: “Bay gu pi’em nga pa’ e girdi’ ndabum daken ma gab sonogor ngorad.
29 Ma bochan e yad be fananikayem, ma aram e bay ra feked urngin ban’en ni thay parwom riy ngar paged gur ni dakriy e upong u dakenam. Mag par ni kam tamra’ ko tin ni um rin’. Darngal rom nge falchuway’ ni um tay ngom
30 e ke girengiy e biney nga dakenam. Um falchuway’ ngom ko pi nam mu’um tayfan e liyos rorad ngi i alit nagem.
31 Um lek lon ay walagem, ere bay gu pi’ ngom ere kap ko gechig ni i unum ngkum unum.”
32 I SOMOL ni Th’abi Tolang e be ga’ar,
“Bay mu unum e n’en ni bay ko kap rok walagem;
nib ga’ ma ba to’ar.
Gubin e girdi’ ni bay rogned e thin ni kireb ngom miyad be moning nagem;
ya ba sug fare kap.
33 Ra pingegem ngam ching nga ri gafgowan’um,
ya ba kap ko marus nge magothgoth,
ni fare kap rok Samaria ni walagem.
34 Ngam unum nge par ni kari mlik;
ma ga fek m’ilin nike pilpil,
ngam sesey thuthum ngay.
I Gag SOMOL ni Th’abi Tolang e gu be non.”
35 Irera’ e n’en ni be yog SOMOL ni Th’abi Tolang: “Bochan e kampag talig kam pi’ ker’um ngog, ere thingar mu fek wenegan e darngal nge falchuway’ ni um tay ngom.”
Pufthin rok Got nga daken fagal walag
36 Ga’ar SOMOL ngog, “Fak e girdi’, kam fal’eg rogom ni ngam pufthinnag Oholah nge Oholibah? Mog ngorow e pin’en nib sonogor ni kar rin’ew.
37 Da ku rir yul’yul’ gow ngog, gamad bmabgol mayow be iling ni yow be tayfan e liyos, ma yow be thang e pogofan ya yow be pi’ pifakag ni maligach ko pi liyos.
38 Ma gathi kemus urngin e tin nra ngongliyew. Ra dariyfan nigew ngar ta’aynag e Tempel rog ma dakrir tew fan fare Sabbath, ni Gag e gog.
39 Chirofen ni ba’aram nra thangew e pogofan rok pifakag ngar maligach nigew ko liyos, e ra bow nga Tempel rog ngar dariyfan nagew!
40 “Ra tew reb e malwol nga daken reb ni yow be pining e pumo’on nu bang nib orel, marbad. Me maluk fagal walag mar acheyew owcharow miyow nunuw ko churwa’ nge bachael.
41 Ma yow par nga daken bang i sofa ni bfel’ ya’an, miyow fal’eg rogon e tebel nga charen nib sug daken ko tin fafalel’ ban’en, nib mu’un e incense nge gapgip ko olive ngay nigag e gu pi’ ngorow.
42 Senggil rorow e urngin ngiyal’ ma ke sug nga lungun e chingaw’ ni dakuriy yarmen ya bogi pumo’on nni fekrad u daken e ted. Pi pumo’on ney e ra yuy’ed e bachael nga pa’ fagal ppin mar te’eliyaw niged yow ko te’eliyaw nib gamog.
43 Ma aram mug ga’ar u lanin’ug, pi pumo’on nem e yad be rin’ ni bod ni yima rin’ ngak be’ nma falchuway’ ngak ni be’ ni bpin nib mabgol nike thay parwon ko iling.
44 Ma ur sulsulod ko fagal ppin ngu’ur moleged yow. Ni aram Oholah nge Oholibah ni fagal ppin ni tadenen.
45 Pi pumo’on nib mat’aw e yad ra duwgiliy nib kireb e rorow ko motochiyel ni kar th’abew, ni yow be par e pumo’on ni gathi mabgow rorow ma yow be thang e pogofan, ya kemang ba maruwel ngorow ni yow be par ko pumo’on ni gathi mabgol rorow ma ke alitnag e racha’ pa’ row.”
46 Irera’ e n’en ni be yog SOMOL ni Th’abi Tolang ni be ga’ar, “Mu kunuy e girdi’ ni yo’or ngan gafgow nagrow ko marus min fek gubin ban’en rorow.
47 Mu pag e may ngar malang niged yow min th’eth’abrow ko saydon, min li’ pifakrow, min urfiy e naun rorow nga but’.
48 Nggu taleg e puwalag u daken e nam ni ga’ngin. Ngug ginaeng gubin e ppin ndab ku ra ngongliyed e denen ni puwlag ni bod ni ur rin’ew.
49 Gimew e gali walag nir — bay mu gafgow gow ko gechig ni labgen e ngongol ni puwlag, migmew fek wenegan e denen romew ni um tew fan e pi liyos. Ma aram e bay mu nangew ni Gag SOMOL ni Th’abi Tolang.”