4
Ezekiel ni yan u ya’an e mael ni ngan m’ag nga Jerusalem
I Got e ga’ar, “Fak e girdi’, mu fek e rengnga ngam tay nga puluwom, mag yoloy ya’an yu Jerusalem nga daken. Ma aram ma ga dum’midil ni ngam cham ko fare gi rengnga ni susun e rriyul’ nib binaw. Mag ubung e but’ nge taw nga p’ebgul mag longbiy fare gi rengnga ko pi tent rok e pi to’ogor. Gubin raba’ riy ni ngam tay yu lay i ren riy nib ga’ ni susun e aram e ngam buthug nga but’ e garog ko fare binaw. Ma ga fek barba’ i dabiy nib wasey ngam suweg ngalang ni bod e rungrung u thilmew fare binaw. Mag sabliy fare binaw ni kan m’ag e mael ngay, ni gur e ga be m’ag e mael. Irera’ e pow ni nge guy e nam nu Israel.
4-5 “Ma aram mag thig nga but’ ni gab thigichar ko ba’ ni gilay’, ma bay gu tay e kireb ko nam nu Israel nga dakenam. 390 e rran ni ngam par u rom ngam gafgow ni bochan e kireb rorad. Kug duwgiliy ni ngam gafgow nra reb e rran ma fen reb e duw u nap’an e gechig rorad. Ma nap’an e ga ra mu’ ko binem mag pig ko ba’ ni mat’aw i chirem ngam gafgow ni aningeg i ragag e rran ni fan ko kireb nu Judah nra reb e rran ma fen reb e duw ko gechig rorad.
“Mu yuluy owchem nga daken fagi rengnga ni aram yu Jerusalem ni yi be m’ag e mael ngay. Ma ga folfoleg e tug ko fare binaw ma gog e tin bayi buch nib togopluw ngay. Bay gu michgiyem nge dabiyag ni mpig nga barba’ i chirem nge barba’ nge taw ko ngiyal’ ni kam mu’ nag fare m’ag mael.
“Mu fek boch e wheat, barley, mame, peas, millet nge spelt. Mu athkuy e pin’em nga ta’bang ngam ngongliy e flowa riy. Ni irera’ e n’en ni ngu’um koy u nap’an 390 e rran ni gab thig ko ba’ gilay’ rom. 10 Kemus ni meruk ounces ko flowa e yira pi’ ngom u reb e rran, ni ngam thap riy nga reb e rran. 11 Ku aram rogon e ran ni kub mudugil oren ni l’agruw e kap reb e rran. 12 Ma ga orfeg e tar ni t’ay e girdi’ nike fengfeng, ngam wumnag e flowa u daken e nifiy riy ngam koy u p’eowchen e girdi’.”
13 Me ga’ar SOMOL, “Biney e be dag rogon yu Israel ni bay ur ked e ggan, ni de mat’aw ko motochiyel, u nap’an ni gu ra weregrad ko pi nam i yan.”
14 Machane mug ga’ar, “ SOMOL ni Th’abi Tolang, danga’! Dariy bangiyal’ ni kug alit nigeg. Ka nap’an e kugub bitir i yib ma dariy bangiyal’ ni kug way e ufin u ba gamanman ni yim’ ni bod rogon e gamanman nma yim’ fa li reb e gamanman ni malboch. Ma ku dawor gu way ba ggan nib alit.”
15 Ere, me ga’ar Got, “Fa’anra arrogon, ma bayi mang t’ay e garbaw e bay mu fanay, ngam wumnag e flowa rom riy.”
16 Miki ul ul ngay nge ga’ar, “Fak e girdi’, bay gu m’aynag e flowa nu Jerusalem. Girdi’ u rom e bay i ngochngochan’rad ni math liyab ni yad be machbeg oren e ggan ni ngar ked nge ran ni ngar unumed. 17 Bayi m’ay e flowa nge ran rorad; miyad par ni kari math e liyab ngorad, ma bay ur m’aygad ngabang ni bochan e denen rorad.”