46
Fare pagel ni fak e pilung nge fapi Madnom
1 I SOMOL ni Th’abi Tolang e be ga’ar, “Bin ngek e garog ko thal ni langgin e yoror e ngan tay nib man u nap’an fa n’el i rran ni bay e maruwel, machane yira bing ko rofen ni Sabbath nge rofen ni bay e Madnom ko M’ug e Pul.
2 Fare pagel ni fak e pilung ni ir e be gagiyeg e nge yan u lan e thal ni wuru’ e yoror nga langgin ba senggil, ni bay u mit e garog nge sak’iy nga charen e rumog ko fare garog u nap’an ni be urfiy fapi prist fapi maligach ni polo’ ni fen, me pi’ fare maligach rok nma gapaseg thilin Got nge girdi’. U rom u langan e garog e thangri meybil riy me sul nga wean. Fare garog e thangri dab nning nge mada’ ko blayal’.
3 Pi Sabbath nge pi Madnom ko M’ug e Pul e ra siro’ gubin e girdi’ miyad meybil ngak SOMOL u mit fare garog.
4 Rofen ni Sabbath e fare pagel ni fak e pilung e nge fek i yan ku SOMOL e pi maligach ni ngan urfiy nib polo’, ni nel’ i fak e saf nge reb nib pumo’on i yib ngak SOMOL ni dariy bang u downgin bagyad nib kireb.
5 Ra reb fapi saf ni pumo’on ma nge chagiy rliw’ e pawn e grain ngay, ma ra reb fapi fak e saf ma demturug ban’en ni ba’adag me chagiy ngay nge pi’ ni maligach. Ra riliw e pawn e grain ma nge chagiy ngay dalip e quart e gapgep ni olive nge pi’ ni maligach.
6 Rataw ko Madnom ko M’ug e Pul e nge pi’ ni maligach ba fak e garbaw, nge nel’ e fak e saf ni pumo’on, nge ba saf ni pumo’on ni dariy bang u downgin bagyad nib kireb.
7 Fare garbaw ni pumo’on nge reb e saf ni pumo’on ma ngan chagiy rliw’ e pawn e grain ngay ngan pi’ ni maligach, ma ra reb fapi fak e saf ma nge chagiy ngay demturug e n’en ni ba’adag ni nge pi’ ni maligach. Dalip e quart e gapgep ni olive ngan dachuguy rliw’ e pawn e grain ngay ngan pi’ ni maligach.
8 Fare pagel ni fak e pilung e thangri chuw u langgin fare senggil ko garog nge sul nga wuru’ ko gin ni yib riy.
9 “Nap’an nra yib e girdi’ ni nge liyor ngak SOMOL u reb fapi madnom, ma pi’in yad ra yib u lan e bin yimuch e garog e yad ra sul ko bin lel’och e garog u tomuren ni karmu’gad ko meybil, ma pi’in rabad u lan e bin ni lel’och e garog e yad ra sul ko bin yimuch e garog. Dariy be’ nra sul nga wean ko gin ni yib riy nga naun, machane dabisiy ni nge yan nga wean ko re garog ni bay u puluwon nga barba.
10 Fare pagel ni fak e pilung e nge yib nga langan e garog ko ngiyal’ ni be yib e girdi’, me chuw ko ngiyal ni yad be sul.
11 Pi rran ni madnom ni baga’ e rliw’ e pawn e grain ni ngan chagiy nga reb e garbaw ni pumo’on ara saf ni pumo’on ngan pi’ ni maligach, nge demturug ko mang e ba’adag reb fa pi’in yad be meybil ni nge chagiy nga reb e pifak e saf. Dalip e quart e gapgep ni olive e thingar ni dachuguy rliw’ e pawn e grain ngay ngan pi’.
12 “Ngiyal’ ni ba’adag fare pagel ni fak e pilung nma gagiyeg ni nge pi’ ba maligach ngak SOMOL, ni demturug ko ba maligach ni ngan orfeg nib polo’ fa ba maligach nma gapaseg thilin Got nge girdi’, ma fare garog ko ngek ni wub ko thal ni langgin e yoror e ngan bing ngak. Ir e nge ngongliy rogon e maligach nge pi’ ni bod rogon nma rin’ ko Sabbath, ma fare garog e yira ning u tomuren nike thumur nga wean.”
Maligach ni yu rran
13 I SOMOL e be ga’ar, “Gubin e kadbul ma ngan urfiy ba saf ni ta’reb e duw yangren ni dariy bang u downgin nib kireb ni kab polo’ ni maligach ngak SOMOL. Biney e maligach e thingar un pi’ ni gubin e rran.
14 Ku yira ngongliy lal e pawn e flour ni maligach ni gubin e kabul, nib dachug ta’reb e quart e gapgep ni olive ngay ni ngan aruy ko flour. Yalen e re maligach ney ngak SOMOL e nge par u gil’ ni dariy n’umngin nap’an.
15 Fare fak e saf, nge fapi flour, nge gapgep ni olive e ngu’un maligachnag ngak SOMOL ni gubin e kadbul ni dariy n’umngin nap’an.”
Fare pagel ni fak e pilung nge binaw
16 I SOMOL ni Th’abi Tolang e be ta’chiylen ni be ga’ar: “Fa’anra pi’ fare pagel ni fak e pilung ni ir e ma gagiyeg bang e binaw ni tafen ngak reb e pagel ni fak ni tow’ath rok, mra milsuwon ngak fare pagel ni fak ni aram e kemang bang e binaw ko tabnaw rok.
17 Machane fa’anra pi’ fare pagel ni fak e pilung ni ir e ma gagiyeg bang e binaw ngak be’ nma pigpig ngak, ma ku ra sul fare gi binaw ngak bayay u nap’an nra taw ko Duwan e felfelan’. Kemus ni ir nge pifak ni pumo’on e ra par ni taferad ni dariy n’umngin nap’an.
18 Fare pagel ni fak e pilung e ri dabi fek bang e binaw u pa’ be’. Re gi binaw ni nge pi’ ngak reb e pagel ni fak e dabisiy ni bang i binaw nni duwgiliy ni ir e nge par rok, ya nge dabi gafgownag reb e tirog e girdi’ ni nge fek e binaw rorad.”
Pi ta’ang ko Tempel
19 Ma aram me fekeg fare mo’on ko gin yima yan riy nga senggil ko lel’och nib chugur ko garog u ba’ ni yimuch e thal ni langgin e yoror. Pi senggil ney e fen fapi prist nib tabgul. Me fal owcheg ngabang i ban’en ni bay ko ngal ko fapi senggil
20 me ga’ar, “Irera’ e re gin’en ni nge lith fapi prist e ufin riy ngar pi’ed ni bogi maligach ni fan ko denen ara maligach ni mathang malfith, nge flour ni maligach ni ngan wumnag, ya nge dariy ban’en nib tabgul ni ngan fek i yan ngalan e thal ni wuru’ e yoror ya ra af e girdi’ machan.”
21-22 Ma aram me fekeg ngalan e thal ni wuru’ e yoror nge dag ngog nra reb fa aningeg i tabthug ma bay boch reb e yoror riy nib achig, ni nel’ i ragag nge meruk e fit n’umngin ma aningeg i ragag nge meruk e fit radan.
23 Ra reb e yochi yoror nem ma bay e rungrung riy nib liyeg nni ngongliy ko malang, ni kan toy tagil’ e nifiy riy nga downgin e rungrung.
24 Me ga’ar fare mo’on ngog, “Irera’ gil’ e tanfiy ni nge lith e pi’in ni girdi’en e pigpig u Tempel e maligach ni be pi’ e girdi’ riy.”