6
I SOMOL rdabun ni ngan tay fan e liyos
1 I SOMOL e non ngog.
2 I ga’ar, “Fak e girdi’, mu changar ko pi burey nu Israel ngamog e thin rog ngorad.
3 Mog ko pi burey nu Israel ni ngar rung’aged e thin rok SOMOL ni Th’abi Tolang — ni ngar rung’aged e n’en ni Gag SOMOL ni Th’abi Tolang e gu be yog ko pi burey ni tolang, nge yochi burey, nge yungi thilin burey nib wa’ich’ich, nge yochi loway: Bay gu l’oeg bang i saydon ni nge gathay e yungi n’en nma tay e girdi’ fan e pi liyos riy.
4 Pi altar e bay ni buthug nga but’ nge pi altar ko incense e ra ni bilig. Gubin e girdi’ u rom ni bay ni thang e fan rorad u mit fapi liyos rorad.
5 Bay gu werwereg u but’ e ldow rok piyu Israel; bay gu wereg yilrad nge liyeg e pi altar rorad.
6 Urngin e binaw nu Israel e bay ni gathay, ma aram e gubin e pi altar rorad nge pi liyos e bay ni bilbilig nge yoch yang u but’, pi altar rorad ni fan ko incense e bayi wearwear, ma gubin e tin nra ngongliyed ni bayi m’ay ngabang.
7 Girdi’ e bay ni li’rad u gubin yang, ma pi’in nra magach nib fos e bayi mich uwan’rad ni Gag SOMOL.
8 “Bay gu pag bochiyad ngar thaygad ko riya’ miyad wear ko pi nam i yan,
9 ni aram e yungin ni bay un kalbus nagrad riy. U rom e bay gub riy ngan’rad miyad nang ni gag e kug gechig nagrad ma kug m’aynag farad, ni bochan e dag mich u wan’rad kar pi’ed keru’rad ngog kar m’oneged e pi liyos u wan’rad ngog. Bay ra dabuyed yad ni bochan e kireb rorad nge tin ni de mat’aw ni karrin’ed.
10 Bay ra nanged ni Gag fare SOMOL, ma tin ni ug gineangrad riy e gathi yan i aw ni yug dariy.”
11 I SOMOL ni Th’abi Tolang e ga’ar, “Mu pirdi’iy ngorngorem mag fafalig nga but’! Mu yor nag e gafgowan’ ni bochan gubin e kireb nge pin’en nib sunsonogor nike rin’ piyu Israel. Bay ram’ad u tan e mael ara uyngol ara liliy.
12 Pi’in yad bay u orel e bay ra m’argad ngarm’ad; ma pi’in yad ba chuchugur e bay ram’ad u fithik’ e mael; ma pi’in nra fosgad e bayi math e pogofan rorad ni bilig. Ma bay ra thamiyed ga’ngin gelngin e damumuw rog.
13 Ma ldow e bayi wear u fithik’ fapi liyos nge to’oben e altar i yan, ngu daken nochi burey, nge daken urngin e burey nib ga’, ngu tanggin urngin kaen e gak’iy nge gek’iy ni oak, ngu lan urngin e yungi n’en ni yad ma orfeg e maligach rorad riy ni fan ko liyos. Ma aram e bayi nang urngin e girdi’ ni gubin ni Gag SOMOL.
14 Aram rrogon, bay gganam ngug gathay e nam rorad. Bay gu gagiyegnag but’an nge par ni dakriy ban’en ni bfel’ riy, ni mus ko ted u yimuch nge mada ko binaw nu Riblah ko lel’och, dariy bang nma par yu Israel riy ni gu ra pag. Ma aram e gubin e girdi’ nra nang ni Gag fare SOMOL.”