3
Liyor ni tabab bayay
1 Fa’ani taw ko pul ni medlip, ma ke sul yu Israel kar pired ngalan e pi binaw rorad. Miyad mu’ulung nga Jerusalem ni yad gubin.
2 Mi Jeshua ni fak Jehozadak, nge pi prist ni yad nga maruwel, nge Zerubbabel nib mo’on ni fak Shealtiel nge girdi’en Shealtiel e ra cheaggad ngar ubunged bayay fare altar rok fare Got nu Israel, ya nge yag ni ur urfiyed e pi gamanman ni maligach u daken nrogon ni be yog e motochiyel rok Moses, ni ir be’ ni girdi’ rok Got.
3 Yug aram rogon ni yad be rus ngak girdi’en yug boch e nam ni kebi par nga daken fare nam, machane miyad ubung fare altar bayay nga tagil’ e bin som’on. Miyad tabab bayay i urfiy u daken e re altar nem e gamanman ni maligach ni yima pi’ ni kadbul nge blayal’.
4 Miyad madnomnag fare Madnom ko Nochi Naun ni bod ni bay ko motochiyel, mra reb e rran miyad pi’ e pi gamanman ni maligach ni bod nike yog e motochiyel.
5 Ma ku yad be pi’ e pi gamanman ni maligach ni ngan urfiy ni yu reb, nge gamanman ni ngan pi’ ni maligach ko Madnom ko M’ug e Pul, nge urngin e pi mu’ulung ni yima tay ngu’un tayfan SOMOL ma yibe meybil ngak, nge pin’en ni yad ma pi’ ngak SOMOL ni yad e leam rorad.
6 Dawor ra tababgad i toy fare tempel, machane miyad tabab i urfiy e pi maligach ni mo’oruf ngar pi’ed ngak SOMOL ko re rran ni som’on ko pul ni medlip.
Tempel ntabab i toy bayay
7 Me pi’ e girdi’ e salpiy ni nga ni pi’ ni puluwon e pi’in ni ba salap i ubung malangen e naun nge girdi’ nib salap ko dimow naun; miyad pi’ e ggan nge garbod nge gapgep ko olive ni nga ni pi’ nge yan ko binaw nu Tyre ngu Sidon ni ngan thiliyeg ko gek’iy ni cedar ni yibe fek u Lebanon ni ngan fek u maday nga Joppa. Nrin’ urngin e pin’ey ni Cyrus ni Emperor nu Persia e pithig e thin riy ngan rin’.
8 Ere bin migid e pul ko re duw nem ni kar sulod nga Jerusalem, ko gin ni immoy e Tempel rok SOMOL riy miyad tabab ko maruwel. Zerubbabel nge Jeshua nge girdi’en e nam rorow, nge pi prist nge pi Levi nge urngin e girdi’ ni ur kalbusgad u Babylon ni kar sulod nga Jerusalem e ra uned ko re maruwel nem. Urngin e pi Levi ni rliw’ e duw rorad ngalang e ntayrad ni nge milfan e maruwel nu tempel ngorad.
9 Ere Jeshua ni reb e Levi nge pi pumo’on ni fak nge girdi’ rok, nge Kadmiel nge pi pumo’on ni fak, ni fare tabinaw rok Hodaviah e ra cheaggad nge mil fan e maruwel nu tempel ngorad. Ma be ayuwegrad e pi Levi ni girdi’en e tabinaw rok Henadad.
10 Nap’an nra tababgad i ubung e def ko Tempel me yan i sak’iy e pi prist nga tagil’rad ni karon’ed fapi mad rorad ni n’un’uw, ni bay e rappa u pa’rad, ma pi Levi ni girdi’en e tabinaw rok Asaf e yad bay u rom ni bay e cymbal rorad ni tatelin e musik. Miyad pining e sorok ngak SOMOL nrogon ni duwgiliy David ni Pilung nu Israel kakrom.
11 Miyad tang ni yad be pining e sorok ngak SOMOL ma yad be sul u daken e pi thin ni ba’aray:
“I SOMOL e rib manigil, ma rogon
nib t’uf piyu Israel rok e bay i
par ndariy n’umngin nap’an.”
Urngin e girdi’ nra be’ me non ni kemus ga’ngin laman ni be pining e sorok nge magaer ngak SOMOL, ni bochan e kan tabab i muruwliy fare def ko Tempel.
12 Pire’ e prist nike ilal, nge pi Levite, nge pi lolugen e tabinaw nra guyed nga owcherad fa bin som’on e Tempel. Ra pired ngu’ur guyed fare def ko Tempel ni yibe ngongliy rogon miyad yor ma yad be dololoy’. Ma tin kabay e girdi’ ni yad bay u rom e ur tolulgad u fithik’ e felfelan’.
13 Ra motoyil be’ nga lamay ni ba ga’ ni be yan ma de nang ko yibe felfelan’ fa yibe yor, ya girdi’ e yad be tolul, ni yira par u orel ma yira rung’ag lamrad.