8
Girdi’ nra Sulod ko Kalbus ni ur ted u reb e nam
1 Irera’ fithingan e pi’in lolgen e yuke girdi’ ni urmed ni yad ba kalbus u lan yu Babylonia mar sulod ni yad Ezra nga Jerusalem ko ngiyal’ ni Artaxerxes e pilung:
2-14 Gershom, ko fare ke girdi’ rok
Finehas
Daniel, ko fare ke girdi’ rok
Ithamar
Hattush nib mo’on ni fak
Shekaniah, ko fare ke girdi’ rok David
Zekariah, ko fare ke girdi’ rok
Parosh, nge 150 e pumo’on ko ka rok e girdi’ (immoy e babyoren e tabnaw rorad)
Eliehoenai nib mo’on ni fak
Zerahiah, ko fare ke girdi’ rok Pahath Moab, ni yad 200 e pumo’on
Shekaniah nib mo’on ni fak
Jahaziel, ko fare ke girdi’ rok Zattu, ni yad 300 e pumo’on
Ebed nib mo’on ni fak Jonathan,
ko fare ke girdi’ rok Adin, ni yad wugem e pumo’on
Jeshayah nib mo’on ni fak
Athaliah, ko fare ke girdi’ rok Elam, ni yad medlip i ragag e pumo’on
Zebadiah nib mo’on ni fak
Maikal, ko fare ke girdi’ rok Shefatiah, ni yad meruk i ragag e pumo’on
Obadiah nib mo’on ni fak Jehiel,
ko fare ke girdi’ rok Joab, ni yad 218 e pumo’on
Shelomith nib mo’on ni fak
Josifiah, ko fare ke girdi’ rok Bani, ni yad 160 e pumo’on
Zekariah nib mo’on ni fak Bebai, ko
fare ke girdi’ rok Bebai, ni yad rliw’ nge meruk e pumo’on
Johanan nib mo’on ni fak
Hakkatan, ko fare ke girdi’ rok Azgad, ni yad 110 e pumo’on
Elifelet, Jeuel, nge Shemaiah, ko
fare ke girdi’ rok Adonikam, ni yad nel’ i ragag e pumo’on (yad e tomur nra sulod)
Uthai nge Zakkur, ko fare ke girdki’
rok Bigvai, ni yad medlip i ragag e pumo’on
Pi Levi ni piri’egrad Ezra ni fan ko Fare Tempel
15 Mug kunuy fare ulung ni ga’ngin nga to’oben fare lul’ ni yan ko fachi binaw nu Ahava, nggu pired u rom ni dalip e rran. Mug pir’eg ni bay e prist u lan fare ulung machane dariy reb e Levi.
16 Mug mol’og nge yan ngak mereb e tayugang’: Eliezer, Ariel, Shemaiah, Elnathan, Jarib, Elnathan, Nathan, Zekariah, nge Meshullam, nge l’agruw i sensey, ni Joyarib nge Elnathan.
17 Mug l’ograd ngranod ngak Iddo, ni ir lolgen fare ulung nu Kasifia, ni ngar fithed ngak nge pi’in yad nga bang, ni yad ma maruwel u Tempel, ni ngar pi’ed e girdi’ ngomad ni ngar pigpiggad ngak Got u lan fare Tempel.
18 Mu daken e runguy rok Got e ra pi’ed i Sherebiah ngomad, nib mo’on nib salap ko maruwel, ni reb e Levite ni be’ ko fare ke girdi’ rok Mahli; ma ragag nge meruk e pumo’on nra uned ngak ni pifak nge puwalagen.
19 Mu ku ra l’oged Hashabiah nge Jeshayah ko fare ke girdi’ rok Merari, nike un rliw’ e girdi’ ngorow ni yad tabnaw.
20 Kub dachug ngorad 220 girdi’en e maruwel u Tempel ni pi ga’ rorad e ka David ni Pilung nge pi tayugang’ rok e ra melegedyad ni ngar ayweged e pi Levite. Yad gubin ma go’ ni yoloy fithingrad.
Me pow’iy Ezra fapi girdi’ ngar paged e abich ngar meybilgad
21 U rom u to’oben fare Lul’ ni Ahava mu gog ngomad ni gamad gubin ni go’ nggu paged e abich magmad sobut’ nagmad u owchen Got magmad ning ngak ni nge pow’iymad ko milekag romad me ayuwegmad nge pifakmad nge urngin e tiromad ban’en.
22 Gu tamra’ ni nggu ning ngak fare pilung ni nge pi’ barba’ i salthaw ni yad mayan u os ni ngar matanagiyed gamad ko pi to’ogor romad u nap’an e milekag romad, ni bochan e kugog ngak ni Got rodad e ma fal’eg wa’athan gubin e pi’in ma pagan’rad ngak, machane pi’in yad ra cheal ngar pi’ed keru’rad ngak e ra dabuy mra gechig nagrad.
23 Ma aram magmad pag e abich nggu meybilgad ni fan e nge ayuwegmad Got, me fulweg taban e meybil romad.
Pi tow’ath ni fan ko fare Tempel
24 U fithik’ fapi prist ni yad ma gagiyeg e gu mel’eg Sherebiah, Hashabiah, nge ku ragag i yad.
25 Ma aram mug thabthabelnag fapi silber, gol, nge fapi tatalin e maruwel ni pi’ fare pilung, nge pi’in yad ma puruy’ nge pi tayugang’, nge girdi’ nu Israel ni ngan fanay u langgin fare Tempel, nggu pi’ ngak fapi prist.
26-27 Ba’aray e n’en ni gu pi’ ngorad:
silber — rliw’ nge lal e ton
100 tatalin e maruwel nib silber — 150 e pawn
gol — 7,500 e pawn
rliw’ raba’ e dabiy nib gol — 270 e ounce
l’agruw raba’ e dabiy ni bronze nrib fel’, ni ta’reb feni fel’ ko yu raba’ nib gol
28 Me lungung ko fapi prist, “Gimed ba tabgul ni fan ngak SOMOL, ni fare Got rok e pi chitamangimed kakrom, ma ku arita’ e silber nge gol nge fapi tatalin e maruwel ni bogi maligach ni girdi’ e leam rorad ni ngar pi’ed ngak SOMOL.
29 Nopa’med ni ngam matnagiyed nge dabi buch ban’en ko pin’ey nge mada’ ko ngiyal’ ni kam tawgad ko fare Tempel. Mu rom u lan e pi senggil rok fapi prist e ngam thabthabel niged e pin’ey mi gimed pi’ nga pa’ e pi tolang ko prist nge ngak e pi Levite, nge ngak pi tayugang’ rok e girdi’ nu Israel u lan yu Jerusalem.”
30 Ma aram me milfan fapi silber, nge gol nge fapi tatalin e maruwel ngak fapi prist ni ngar feked ko Tempel ngalan yu Jerusalem.
Sul ntay nga Jerusalem
31 Rofen ni ragag nge l’agruw ko bin m’on e pul e gu chuwgad ko fare lul’ ni Ahava nggu warod nga Jerusalem. Got romad e un ngomad ngi i yororiymad ko cham nge gafgow ni be yibnag e pi to’ogor romad ngomad nap’an ni gamad be milekag.
32 Nap’an ni gu tawgad nga Jerusalem, ma gamad toffan ni dalip e rran.
33 Ma aram me yan i aningeg fen ma gamad yan ko fare Tempel, nggu thabthabel niged fapi silber, gol, nge pi tatalin e maruwel, nggu pi’ed ngak Meremoth ni fare prist, nib mo’on ni fak Uriah. Ma pi’in yad bay rok e Eleazar nib mo’on ni fak Finehas nge l’agruw i Levite ni Jozabad nib mo’on ni fak Jeshua nge Noadiah nib mo’on ni fak Binnui.
34 Gubin e pin’ey min the’eg ngan thabthabelnag, ma yigo’ ni yoloy nga babyor ni gubin ko ngiyal’nem.
35 Gubin e kalbus ni karsulod u bang e rafeked e maligach rorad i yib ni ngan urfiy ngan pi’ ngak fare Got nu Israel. Ra pi’ed ni maligach ragag nge l’agruw e garbaw ni pumo’on ni fan ngak ga’ngin yu Israel, nge mereb i ragag nge nel’ e saf ni pumo’on, nge medlip i ragag nge medlip e pifak e saf; mu kura pi’ed ragag nge l’agruw e kaming ni nge be’ech nagrad ko denen. Gubin e pi gamanman ney ma ni urfiy ni maligach ngak SOMOL.
36 Mu kura feked fare gi babyor nike yoloy fare pilung ke pi’ ngorad ngar pi’ed ngak e pi governor nge pi tayugang’ u ley ni ngal e nug nu Eufrates, ma aram me pi’ e pi cha’ney e ayuw ngak fapi girdi’ nge fare Tempel.