6
1 Me ga’ar SOMOL ngak Moses, “Chiney e bay mu guy e n’en ni bay gu rin’ ngak Farao. Bay gu gel nigeg ngak nge pagrad ngranod. Ara’ rogon, bay gu gel nigeg ngak nge mang ir e yog ngorad ni ngar chuwgad u daken e nam rok.”
Got ni pining Moses
2 Me welthin Got ngak Moses ni ga’ar, “I gag SOMOL.
3 Gu m’ug ngak Abraham, nge Isak, nge Jakob ni gag Got ni Gubin ma Rayag Rog, machen da gog fithingag ngorad nib thothup, ni Gag SOMOL.
4 Ku er rogon ni gu ngongliy e m’ag u thilmad, ni gu micheg ni nggu pi’ fare nam nu Kanaan ngorad, nre nam ni ba’aram ni ur pired riy ni bogi milekag ngaram.
5 Chiney e kug rung’ag e gel’gel’ ni be tay piyu Israel, ni piyu Egypt e kar ted yad ni sib, ma ku gu manang e m’ag ni kug ngongliy u thilmad.
6 Ere ngamog ngak piyu Israel ni gu be ga’ar ngorad, ‘I gag SOMOL, e bay gu lagmed u tan gelngin e sib ni gimed be tay u Egypt. Bay gu pug pa’ag ngalang nib gel gelngin nggu pi’ ba gechig nib gel nga dakenrad, ma aram mu gu aywegmed.
7 Bay gu taymed ni gimed girdi’eg, mu gu par ni kug mang Got romed. Ma bay mu nanged ni gag SOMOL ni Got romed ko ngiyal’ ni bay gu lufmed ko sib ni um ted u lan yu Egypt.
8 Bay gu fekmed ko fare nam ni gu micheg ni gu ra pi’ ngak Abraham, Isak, nge Jakob; bay gu pi’ ngomed nge milfan ngomed. I gag SOMOL.”
9 Me yan i weliy Moses e pi thin ney ngak piyu Israel, machane dar motoyilgad ngak, ya ke mulan’rad ko maruwel ni sib ni yad be tay.
10 Me ga’ar SOMOL ngak Moses,
11 “Mman mog ngak Farao, ni ir e pilung nu Egypt, ni thangri pag piyu Israel ngar chuwgad ko nam rok.”
12 Machane me fulweg Moses ni ga’ar, “Fa’anra mus ngak piyu Israel ni darir motoyilgad ngog, ma mangfan e en pilung ni nge motoyil? Ya gag e gu ba kirkireb ko welthin.”
13 Me yog SOMOL ngak Moses nge Aron ni ngranow ra weliyew ngak piyu Israel nge pilung nu Egypt, nike yog ngorow ni ngar gafaliyew yu Israel nga wuru’ e nam nu Egypt.
Chon e Tabnaw rok Moses nge Aron
14 Bin nganni’ u fak Jakob e Ruben ni aningeg e pagel ni fak ni aram Hanok, Pallu, Hezron, nge Karmi; yad e pi chitamngin e yuke girdi’ nni tunguy fithingarad ngorad.
15 I Simeon e nel’ e pagel ni fak ni aram e Jemuel, Jamin, Ohad, Jachin, Zohar, nge Shaul, nib pagel ni fak be’ ni bpin nu Kanaan; yad e pi chitamngin e yuke girdi’ nni tunguy fithingirad ngorad.
16 I Levi e dalip e pagel ni fak ni aram e Gershon, Kohath, nge Merari; yad e chitamngin e yuke girdi’ nni tunguy fithingirad ngorad. Me Levi e par ni bfos nge gaman 137 e duw rok.
17 I Gershon e l’agruw e pagel ni fak ni aram e Libni nge Shimei, ma bo’or e pi’in owcherow.
18 Kohath e aningeg e pagel ni fak ni Amram, Izhar, Hebron, nge Uzziel. Me Kohath e par ni bfos nge gaman e 133 e duw rok.
19 Merari e l’agruw e pagel ni fak ni aram e Mahli nge Mushi. Ireray e yuke girdi’ rok Levi nge pi’in ni owcherad.
20 I Amram e le’engiy Jokebed ni be’ ni bpin ni walagen e chitmangin, miyow diyennag Aron nge Moses. I Amram e par ni bfos nge yan i gaman 137 e duw rok.
21 I Izhar e dalip e pagel ni fak ni aram Korah, Nefeg, nge Zikri.
22 Me Uzziel e ku dalip e pagel ni fak ni aram e Mishael, Elzafan, nge Sithri.
23 Me le’engiy Aron Elisheba ni be’ ni bpin ni fak Amminadab ma walagen Nahshon; miyow diyennag Nadab, Abihu, Eleazar, nge Ithamar.
24 I Korah e dalip e pagel ni fak ni aram Assir, Elkanah, nge Abiasaf; yad e pi chitamngin e pi tabnaw ko fare ke girdi’ rok Korah.
25 Me Eleazar ni fak Aron e le’engiy reb e bpin ni fak Putiel ngar diyen nigew Finehas. Ireray e pi lolugen e tabnaw nge fa yuke girdi’ ko fare ganong rok Levi.
26 Aron nge Moses e ireram faglicha’ ni ga’ar SOMOL ngorow, “Mu pow’iyew fapi ganong nu Israel nga wuru’ yu Egypt.”
27 Yow fagali cha’ nrogew ngak Faraoh ni pilung nu Egypt ni nge pag e girdi’ nu Israel ngar chuwgad u Egypt.
Thin ni yog SOMOL ngak Moses nge Aron ni ngar rin’ew
28 Ngiyal’ ni ba’aram ni welthin SOMOL ngak Moses u lan e nam nu Egypt,
29 e ga’ar ngak, “I gag SOMOL. Mu weliy ngak e pilung nu Egypt urngin e tin kug weliy ngom.”
30 Machane me ga’ar Moses, “Ga manang ni gag reb e girdi’ nri da gu nang rogon e welthin; ere ra di’in me motoyil fare pilung?”