4
1 Machane nggu ul ul ngay ni nge lungug: re tir ni ir e ra lekag tafen e chitamngin e yima tay ni bod rogon ba sib ko ngiyal’ ni kab bitir riy, machane ri ir e ra mil suwon urngin ban’en rok e chitamngin ngak.
2 Ma ngiyal’ ni kab bitir, e bay e girdi’ ni yad be ayuweg, ma yad be ayuweg e tirok’ ban’en nge yan i mada’ ko ngiyal’ ni yog e chitamngin.
3 Ma ku aram rogodad ni ud moyed ni gadad e sib ko pi motochiyel nge yalen nge rok e pi kan ni yad ma gagiyegnag e gin’en ni bay urngin ban’en u lanelang riy nib mu’un e fayleng ngay, ko ngiyal’ ndawori ilal e michan’ rodad ngak Kristus.
4 Machane fa’ani taw nga nap’an e ngiyal’ ni duwgiliy Got, me pi’ Got Fak nge yib. Me yib ni ba girdi’ e chitiningin, mi i par u tan fare Motochiyel rok piyu Israel,
5 ni fan e pi’in yad bay u tan e re Motochiyel nem e nge chuwegrad u tan, ni fan e nge yag nda manged pifak Got.
6 Me pi’ Got fare Kan Nthothup rok Fak nge yib i par nga lanin’dad, nma ga’ar, “Chitamag, Chitamag,” ni fan e nge dag ni kam manged pifak.
7 Ere gathi kigimed e sib, machane kam manged fak. Me ere fa’anra kam manged pifak, ma bayi pi’ Got ngomed urngin ban’en ni bay rok ni fan ngak e pifak.
Magafan’ rok Paul ngak e girdi’ nu Galatia
8 Kakrom e um pired nda mu nanged Got, ma aram fan ni um pired ni gimed e sib rok bogi kan ni gathi yad e Got.
9 Machane chiney e kam nanged Got — fa reb e nggog nike nangmed Got e chiney — ere uw rogon ma kam adaged ni ngam sulod ngak fapi kan ni yad be gagiyeg ni yad mme’waer ma dariy farad? Mangfan ni gimed ba’adag ni ngkum sulod ngam manged sib rorad bayay?
10 Ma bay boch e rran, nge boch e pul, nge yu ngiyal’, nge boch e duw ni ir e kam turguyed ni ngu’um ted fan!
11 Kug rusnagmed! Gur aram e urngin e maruwel ni kug tay ni fan ngomed e ke yan i aw ndariyfan?
12 Pi walageg ni girdi’en Kristus, gu be wenig ngomed ni ngam boded gag. Ya ku er rogog ni gub girdi’ ni gu bod gimed. Ya dawor mbucheged ban’en rog.
13 Ki gimed manang ko mangfan ni gu machibnag ngomed ko som’on e Thin Ni Bfel’ ni yib rok Got, bochan e gu m’ar nggu par romed.
14 Machane da mu darifan niged gag ara mu siyeged gag ndab gu machib ngomed, ni yugu aram rogon nib gel e gafgow ni mu ted ko liliy ni bay rog. Machane mu t’ufeged gag ni bod rogon ni gimed ra t’ufeg ba engel rok Got; mu t’ufeged gag ni bod rogon ni gimed ra t’ufeg Kristus Jesus!
15 Ma ri mfelfelan’gad! Ere mang e kam rin’ed? Ba’aray bbugithin nrayag ni gog ni murung’agmed ni nge lungug: re ngiyal’ i n’em e fa’an manga rayag ma kam lufed lan owchemed kam pi’ed ngog!
16 Ere kug di’in e chiney u lanin’med? Kug mang to’ogor romed ni bochan e gu be weliy e tin riyul’ ngomed?
17 Tin ni be’er e girdi’ e gimed be par u lanin’rad, machane tin ni yad be finey ngomed e ba kireb. Ya kemus ni tin ni yad be finey ni ngar rin’ed ngomed e ngar feked gimed rog, ni fan e ngu’um leam niged yad ni bod rogon ni yad be leam nagmed.
18 Mmanigil ni ngu’un leamnag e girdi’ nga ban’en ni bay gam’ingin ni bfel’ — re bugithin ney e gubin ngiyal’ nib riyul’, gathi kemus ni ngiyal’ ni gu bay romed.
19 Pifakag ni gimed ba t’uf rog ni gimed girdi’en Kristus! Ke gaman e l’agruw yay ko yaney ni kug bod be’ ni bpin ni nge gargel, ireray e mit i amith nike yib ngog ni bochmed, ni bayi par rog nge yan i mada’ ko ngiyal’ nra bigimed ma ke sum rarogon Kristus nga fithik’.
20 Ku gum’ ni bochan ni manga errogon ma gu bay romed e chiney, nge siy kug non ngomed ni eray gelngin; ya kug par ni kari magafan’ug ngomed!
Fanathin ni murung’agen Hagar nge Sarah
21 Mu son gad nggu fith e pi aromed ni ba’adag ni Motochiyel e nge suweyrad ni nge lungug: damur rung’aged e n’en ni be yog e Motochiyel?
22 Be yog ni Abraham e l’agruw fak ni pumo’on, bagayow e be’ ni bpin nib sib e gargelnag, ma bagayow e be’ ni bpin nde sib e gargelnag.
23 Bin ba’aram i fak ni gargeleg fare pin nib sib e ni gargeleg nrogon ni kayi ma gargel, machane bin ba’aram i fak ni gargeleg fare pin ni gathi ir e sib e ni gargeleg ni bochan e Got e yib i yog ni bay ni gargeleg.
24 Re bugithin ney e ba fanathin: gali ppin nem e be yip’ fan l’agruw i m’ag. Bagayow nni gargeleg pifak ni yad e sib e aram Hagar, ni be yip’ fan fare m’ag ko burey ni Sinai.
25 I Hagar e be yip’ fan e burey ni Sinai u lan yu Arabia, mi ir e be yip’ fan fare binaw nu Jerusalem ni bay e chiney, nike un ngak urngin e girdi’ rok kar manged sib.
26 Machane bin bay u tharmiy e Jerusalem e gathi ir reb e sib, me ir e chitiningdad.
27 Ya be yog e babyor nib thothup ni be ga’ar:
“Mu felfelan’, i gur e re pin nir ndawor mu gargelnag e bitir bi’id!
Mu tolul ma ga non ni ba ga’ lamam ni kam felfelan’, ni gur e cha’ ndawor mu thamiy e amith ko gargel!
Ya fare pin nn’ag e bayi yo’or e bitir rok
ngak fare pin ni ka be par ko pumo’on rok.”
28 Gimed pi walageg ni girdi’en Kristus, gimed pifak Got ni bochan e tin ni yog ni bay rin’, ni bod rogon Isak.
29 Re ngiyal’ i n’em e fare tir ni pumo’on nni gargeleg nrogon e gargel ni yima tay e gafgownag e bin ba’aram nni gargeleg ni bochan gelngin fare Kan Nthothup; me ere ku errogon e chiney.
30 Machane mang e tin ni be yog e babyor nib thothup? Be yog ni be ga’ar, “Mu n’ag fare pin nib sib nge fak ni pumo’on; ya fak fare pin nib sib e dab ra f’othew fak fare pin nde sib tafen e chitamangirow.”
31 Ere pi walageg ni gimed girdi’en Kristus, gathi gadad pifak fare pin nib sib, ya gadad pifak fare pin ni gathi ir e sib.