39
Josef nge le’engin Potifar
1 Me fek fa pi Ishmaelite Josef nga Egypt ngar pi’ed ni chuway’ ngak Potifar, i Potifar e ir reb e salthaw rok Farao nib tolang, ya ir e kapten rok e pi salthaw nma matanagiy tafen Farao.
2 Ma bay SOMOL rok Josef, me ayuweg nge par nib yal’uw urngin nga puluwon. Mi i par u tabinaw rok e masta rok ni be’ u Egypt.
3 Me guy e masta rok ni bay SOMOL rok Josef, ni urngin ban’en nra muruwliy Josef mra fel’ ni bochan e bay SOMOL rok ni be ayuweg.
4 Me par Josef ni bfel’ u wan’ Potifar nge rogon ni be pigpig Josef ngak; ma aram me tay Josef ni ir e ke milfan e tabinaw rok ngak nge urngin ban’en rok.
5 Me fal’eg SOMOL rogon e tabinaw rok fa’anem nu Egypt ni bochan Josef. I fal’eg SOMOL rogon urngin ban’en ni bay u lan e tabinaw rok fa’anem nge tin bay u daken e milay’ rok.
6 Potifar e pag fan urngin ban’en rok ngak Josef, ndakuriy ban’en ni tel ni de pagfan ngak, me par ni kemus ni ggan ni nge kay e ir e ka be un i leamnag.
Mi Josef e bfel’ rarogon ni girdi’ ma ba picho’ay.
7 Me munmun mi i changar le’engin e masta rok Josef ngak. Josef ni be yim’ ni bochan; me pining ni ngranow nga chob rok.
8 Me siyeg Josef fare pin me ga’ar ngak, “Dakuriy ban’en u roy u naun ni be magafan’ e masta rog ngay, ni bochan e gu bay u roy. Ya urngin ban’en ni bay rok e gag e ke pag fan ngog.
9 Ba ga’ lungug u lan e re naun ney ni ta’reb rogog ngak, ma dariy ban’en nike tel ndawori pag fan ngog, kemus ni le’engin, ni gur, e dawori pag fam ngog. Ere uw rogon ni nggu ngongliy e binir e ngongol nib kireb nib denen nib togopluw ngak Got?”
10 I wenig ngak Josef ni gubin e rran, machane dar pirew, ya de fol Josef ko tin be yog.
11 Machane me reb e rran me yan Josef ngalan e re naun nem ni nge ngongliy e maruwel rok, ma dariy bagayad fapi pumo’on ni tapigpig u rom;
12 me yib fare pin i kol e mad rok Josef me ga’ar, “Moy ngdarow nga chob rog.” Machane me mil Josef rok nga wean, me magey e mad rok u pa’ fare pin.
13 Ma fa’ani guy nike magey e mad rok Josef u pa’ ma ke mil Josef ke yan nga wean
14 me pining fapi pumo’on ni yad ma maruwel u naun rok me ga’ar ngorad, “Mu sapgad ko re mad ni ba’aray! Figirngig e fek fare Hebrew i yib nga naun romow ma chiney e be darifan nagmow. Ke yib ngalan e singgil rog keb i wenig ngog ni nggu pirew, machane mu gu tolul ni kari musmus ga’ngin lungug.
15 Ma fa’ani rung’ag lungug ni kug tolul, me pag wuru’ e mad rok u to’obeg, me mil nge yan nga wean.”
16 Me cha’riy fare mad nge mada’ ko ngiyal’ ni ba’aram nike sul e masta rok Josef nga tabinaw.
17 Miki weliy ngak fare bugithin ni ga’ar, “Fare sib ni ba Hebrew ni gur e mfek i yib ngaray e yib nga singgil rog nike finey ni nge darifan nigeg.
18 Machane fa’an gu tolul, me mil nga wean me pag wuru’ e mad rok u to’obeg.”
19 Mri damumuw e masta rok Josef nnap’an ni ga’ar le’engin ngak, “Irera’ e n’en ke rin’ e sib rom ngog.”
20 Me yog ni nga ni yan ni fek Josef nga nin’ nga kalbus ko gin ni kan tay e pi’in ni kalbus rok e en ni pilung ngay, ma aram me par u rom.
21 Machane bay SOMOL rok Josef ni be ayuweg, ma aram fan ni fel’ Josef u wan’ e cha’ nib milfan e kalbus ngak.
22 Me tay fa’anem Josef ni ir e ke milfan urngin fapi kalbus ngak ma ku ir e ke milfan ngak urngin ban’en ni yibe rin’ u lan e kalbus.
23 Ma fa’anem nib milfan e kalbus ngak e yan i par ndakuriy fan ni ngi i guy e pin’en nike pag fan ngak Josef, ni bochan e bay SOMOL rok Josef, ni be ayuweg Josef be fel’ urngin ban’en ni be ngongliy.