44
Fare kap ni yan nga bang
1 Me ga’ar Josef ngak fare tapigpig nib milfan e naun rok Josef ngak, “Mu suguy e tutuw rok e pi cha’ney ni urngin e ggan nrayag ni ngar feked, me bagayad ma ga fulweg e salpiy rok ngam tay nga daken e ggan u lan e tutuw rok.
2 Ma ga fek e kap rog nib silber ngam tay nga daken e ggan u lan e tutuw rok e en nth’abi bitir rorad, mu kum tay e salpiy rok ngay nike pi’ ni puluwon e grain.” Me rin’ ni bod rogon ni kanog ngak.
3 Ri kakadbul mi ni pagrad ngranod ni kar feked e dongki rorad.
4 Kranod ndawor rmal’afgad ko fare binaw nga orel, me ga’ar Josef ngak fare tapigpig nib milfan e naun rok ngak, “Mu fal’eg rogom ngam lek fa picha’. Ma nap’an ni ga ra piri’egrad, me lungum ngorad, “Mangfan ni tin nib kireb e kam rin’ed ni taban e tin ni bfel’ ni kan rin’ ngomed?
5 Mangfan ni kam iringed fare kap nib silber? Re kap ney e ma unum e masta rog ban’en riy, me ir e ma maruwel ngay nge yog e n’en ni bay yib i m’ug. Rib kireb e ren’ey ni kam ngongliyed!’ ”
6 Ma fa’ani taw fare tapigpig ngorad, me weliy ngorad e pi thin ney.
7 Me lungurad ngak, “Siro’ pi thin nir ni ga be weliy e be mang e ga be yog? Dabi taw e leam romad ko tinir ni nggu ngongliyed.
8 Kam guy e salpiy ni kug fulweged u Kanaan ngom, ni salpiy ni gu pir’eged u daken e ggan u lan e tutuw romad. Ere ra di’in ma gamad iring e silber ara gol u naun rok e masta rom?
9 Fa’an ga ra pir’eg rok bagamad min li’ ngem’, ma pi aromad nike par e ngar manged sib rom.”
10 Me ga’ar, “Kefel’; machane fa’an yira pir’eg bigimed ni bay fare kap rok, me ir e nge mang sib rog, ma tin nike magey i gimed e nge yan.”
11 Miyad fek e tutuw rorad nga but’ nib gur, mra be’ me bing e birok e tutuw.
12 Me yan fare tapigpig rok Josef u fithik’ e chugum rorad ni tabab rok e en ni pi ilal nge yan i mada’ ngak e en ni bitir, mi ni pir’eg fare kap u tutuw rok Benjamin.
13 Miyad guchthuy e mad rorad nike kireban’rad, miyad chugum nga daken e dongki rorad miyad sul ngalan binaw.
14 Fa’ani yib Judah nge pi’in walagen ko naun rok Josef, ma kabay Josef u rom. Marbad ra siro’gad ngak,
15 me ga’ar Josef, “Mang e biney ni kam ngongliyed? Da mu nanged ni be’ ni bay ko re liw rog ney e rib mom ni nge nang e n’en ni bay mrin’ed?”
16 Me ga’ar Judah, “Dakuriy e n’en ni gamad ra weliy. Uw rogon ni nggu malu’ag thingad ngom? Uw rogon ni nggu micheged nda gu kirebgad? I Got e ke fek e upong u daken e kireb romad. Gamad gubin e chiney ni kug manged e sib rom ma gathi kemus ni en ni ka ni pir’eg fare kap ni bay rok.”
17 Me ga’ar Josef, “Danga’! Dab gu rin’ e bin. Kemus ni en ni ka ni pir’eg fare kap ni bay rok e ir e nge mang sib rog. Mi gimed sul ngak e chitamangimed ndab nrin’ ban’en ngomed.”
Judah ni wenignag Benjamin
18 Me yan Judah ngak Josef me ga’ar ngak, “Wenig ngom, mpi’ mat’wug nggu non ngom. Dab mu puwan’ ngog; ya gur e ta’reb rogom ngak Farao.
19 Mfithmad ni lungum, ‘Kabay e chitamangimed ara be’ ni walagmed?’
20 Me lungumad ngom, er rogon, bay be’ ni chitamangimad nike pilibthir, nge be’ nib mo’on ni walagmad ni ir e bbitir romad, nni gargeleg ngak e chitamangimad ko ngiyal’ nike pilibthir. Ma be’ nib mo’on ni walagen e ke yim’, ma kemus ni ir e kabay ni fak e chitiningin; ma rib t’uf rok e chitamngin.
21 Mog ngomad ni nggu feked i yib ngaray ngam guy.
22 Ma gamad yog ngom ndabiyag ni nge pag e chitamngin; ya ra rin’, mra yim’ e chitamngin.
23 Me lungum ngomad, ‘Fa’anra dabi un e bin th’abi bitir i walagmed ngomed ngambad, ma dab ku ni pagmed ngambad nga p’eowcheg.’
24 “Fa’an gu sulod ngak e chitamangimad ni tapigpig rom, ma gamad weliy ngak e tin kamog.
25 Ma aram me yog ngomad ni nggu sulod nggu chuw’iyed bochu’uw e ggan.
26 Me lungumad, ‘Dabiyag ni gu warod; ya dab ni pagmad nggu warod ngak fare mo’on ni fa’anra de moy romad e bin th’abi bitir i walagmad. Fa’anra un e bin th’abi bitir i walagmad ngomad, ma aram e gamad ra yan.’
27 Chitamangimad e ga’ar ngomad, ‘Gimed manang ni Rachel ni le’engig e l’agruw e pumo’on ni diyennag ni fakag.
28 Bagayow e ke yan ngabang; nsana ke popof e gamanman ni malboch, ya ka aram e yan ma dawor gguy ke mada’ ko chiney.
29 Fa’an gimed ra fek e biney rog me yan i yim’, ma gelngin e kireban’ ni gimed ra pi’ ngog ko re yangar ney ni kug taw ngay e ra li’eg.’
30-31 “Ere gu ra sul ngak e chitamag ni de moy e re pagel ney rog, ma nap’an ni yugra guyeg ni de moy rog, me yim’. Ya ke par ni re pagel ney e ke pagan’ ngak. Ere gamad ra k’aring e kireban’ ngak e chitamangimad ko binem e yangar nike taw ngay mra yim’.
32 Ma ku er rogon ni gu micheg ngak e chitamag ni gag e ke milfan e re pagel ney ngog, ya gog ngak ni fa’anra dab gu fulweg ngak, me gag e bayi aw e kireb riy nga dakenag u p’eowchen e chitamag ni n’umngin nap’an e yafos rog.
33 Ere chiney e nggu par u roy nggu mang sib rom nggu wan nga luwan; ma ga pag nge un ngak pi walagen ngar sulod.
34 Uw rogon ni nggu sul ngak e chitamag ni fa’anra de moy e re pagel ney rog? Dabiyag rog ni ngug guy e re gafgow ney ni nge tay e chitamag.”