18
Got e bayi gechignag yu Ethiopia
Ba’ nem e pi lul’ nu Ethiopia e bay bbinaw riy ni yima rung’ag lingan pon ban’en riy. Pi owchen reb e nam nga reb e nam ko fare binaw e rabad u lan e lul’ ni Nile ni yad be yan u fofot ni kan ngongliy ko ro’uy. Mu suled nga tabnaw ni papay, gimed e pi tafek thin! Mu feked e malwol i yan ko but’ romed ni nike th’eth’ab e pi lul’, ko nam romed nib gel ma ba ga’ lungun, nge girdi’ romed ni n’un’uw mab pachpach dowrad, ni yima rus ngorad u ga’ngin e fayleng.
Ngam motoyilgad, gimed gubin e girdi’ nma par u fayleng! Mu sap niged bangi flak ni pow, ni ngan tining u daken p’ebgul e burey. Mi gimed motoyil nga lingan e rapa! I SOMOL e ga’ar ngog, “Bay gu changar u tharmiy nga but’ ni bod feni mocho’ e garbeb nma sum nnep’ ko ngiyal’ nike el wom’ngin e woldug, bod feni mayluy ram’en e yal’ nimsiw’. U m’on ni yira kunuy wom’ngin e grape, u nap’an nike mulmul e mak’uf ni flores ma be lol e grape, ma aram e bayi gathay e en to’ogor piyu Ethiopia ni bod feni mom papa’ngin e grape ni yima th’eth’ab ko yar. Pi ldow ko salthaw rorad e bay ni pag u but’ nib m’ug ko pi arche’ nge gamanman ni malboch. Nap’an fangin e gowal ma bay i longuy e arche’ fapi ldow, me taw fangin e garbeb me languy e gamanman.”
Ra taw nga bangiyal’ ma bay un pi’ e maligach ngak SOMOL ni Gubin ma Rayag Rok ko re nam ney nike th’eth’ab e pi lul’, ni re nam ney nib maduwgil ma ba gel gelngin, ni girdi’ riy e ba n’un’uw ma ba pachpach downgin, ni yima rus ngorad u ga’ngin e fayleng. Bay rabad ko Burey ni Zion, ni aram e gin yima liyor riy ngak SOMOL ni Gubin ma Rayag Rok.