28
Fonow ni nge yan ko ley ni lel’och e nam
1 Nam nu Israel e kan turguy e gechig ni nge aw ngak! Fla’ab rok e be chuw ni bod yu kiy i te’eliyaw ni floras ni bay u lolugen e pi’in yad be yog e thin riy ni karm’ad ko rrum. Lolugrad nib uf e ka ni floridanag ni bfel’ rogon, machane kar thiggad nga but’ ni kar balyanggad ko rrum.
2 I SOMOL e ke fal’eg rogon be’ nrib gel ni nge cham ngorad. Bay yib ni bod ba yoko’ ni bay e ayis ni gagang’ yang u fithik’ ni be mul nga but’, ni bod e n’uw ko sarbul, ni bod e ran ni yib i tharey daken e binaw nib machreg.
3 Ma ufan e pi’in yad be yog e thin ni yad ma balyang ko rrum e bay u not’not’ nga but’.
4 Fla’ab rok e pi’in yad be yog e thin ni yad ba uf e bayi m’ay ni bod e tin som’on i wom’ngin e fig ko ngiyal’ nma k’uf e fig riy, yugu ra lol min t’ar ngan unum.
5 Bay reb e rran ni be yib ni SOMOL ni Gubin ma Rayag Rok e ra yan i par ni bod ba kiy i floras ni te’eliyaw nrib fel’ ya’an ni fen e tin ni magey e girdi’ rok nde yim’.
6 Bayi pi’ e leam nib yal’uw ngak e pi’in bay ra pired ni yad e tapuf oloboch, me pi’ e athamgil nga laniyan’ e pi’in ngar sabthiyed e cham ko fapi garog ko binaw.
Isaiah nge pi profet nu Judah ni yad be balyang ko rrum
7 Mus ko pi profet nge pi prist ni yad be balyang ko rrum yad be yan ni yad be thigthig. Kari pire’ e wayin nge rrum ni ka ra unumed be tun ayrad ni ka ra balyanggad. Pi profet e kaygi gel e chingnag rorad ndabiyag ni ngar nanged fan e pin’en ni be piliyeg Got e changar rorad yad be guy, ma pi prist e kaygi gel e chingnag rorad ndabkiyag ni ngar turguyed e n’en ni ngan rin’ ko yu pa’ i oloboch ni ka ni fek i yib ngorad.
8 Pi tebel rorad ni gubin e ke sug e sul’ugun u daken, ndariy bang riy ni kab be’ech.
9 Yad be gathibthib nigeg. Yad be ga’ar, “I mini’ e be leamnag re mo’on nir ni nge fil e llowan’ ngak? Mini’ e ra rung’ag e tin e thin? Kemus ni bitir ni kafin ra paged e thuth e bfel’ ngorad!
10 Be guy rogon ni nge fil e yol ngodad ni reb nge reb, bathael nge bathael, reb e ban’en nge reb e ban’en.”
11 Fa’anra dab mu telmed ngog, ma aram e bayi maruwel Got ngak girdi’en yugu boch e nam ni yad be yog e thin nda mu nanged fan ngar machib niged gimed.
12 Ba’adag ni nge pi’ e toffan ngomed me fal’eg lanin’med ni gimed gubin, machane dabumed ni ngam telmed ngak.
13 Aram fan ni SOMOL e nge sukul nagmed ni tata’reb e yol, nge ta’ab thal e yol, nge murung’agen reb e ban’en nge reb. Ma aram e bayi tun aymed ni gubin yay ni gimed ra yif aymed. Bay um ma’adadgad, ma yibe kolmed ko wup, ma yibe fekmed ngam kalbusgad.
Ba malang ni ir e ba th’abi ga’ fan u Zion
14 Gimed e girdi’ ni ufanthin ni gimed be gagiyegnag e pi girdi’ ney u roy u Jerusalem, mu telmed ko tin be yog SOMOL.
15 Gimed be uf ni ka mu ngongliyed e m’ag u thilmed nge yam’, ma ke ta’reb lungmed fare fayleng ko yam’. Mmich u wun’med nra yib e riya’ ma dabi bit’ ngomed, ya gimed be toer ko malulifith l’ugun nge sabanban ni nge yororiymed ndabi buch ban’en romed.
16 Ba’aray e n’en ni be yog SOMOL ni Th’abi Tolang ni be ga’ar, “Nggu tay ba def ngalan yu Zion, ni ba def ni bay i par nib muduwgil ma ba gel. Bay gu tay ba malang nga fithik’ nib el ni ka ni yoloy e yu bugithin ni ba’aray ngay: ‘Michan’ nib muduwgil e ku ba gumaen’.’
17 Yal’uw e bayi mang fol ko re def nem, ma yul’yul’ e ra par ni fare fol ni ba yil’ i gaf ni ka ni m’ag e malang nga taban kan tay nib tagafgaf.”
Ma ayis ni gang’ yang ni bayi mul u lanelang nga but’ e bayi walagriy urngin e malulifith l’ugun ni gimed be toer ngay, ma ran ni bayi sugubur e lul’ nge yib e bayi kirebnag e n’en ni gimed be naf ngay.
18 Tha’ ni mu ngongliyed u thilmed e yam’ e bayi math’, ma m’ag romed e fayleng ko yam’ e bay nthang. Ma nap’an nra ngolol e riya’, me pirdi’iymed nga but’.
19 Ra aw ngomed bayay nge bayay, u reb e kadbul ngu reb. Ma thingar mu athamgilgad riy ni rran nge nnep’. Ra reb e thin nib be’ech ni yib rok Got mra fek i yib ku reb e marus nrib ga’!
20 Gimed ra bod rogon fare mo’on ko proverb, ni i guy rogon ni nge k’iyag ir nga ba chob ni yugba ngoch, ma nge bachiy ir nga bangi blangkit ni yugub achig radan.
21 I SOMOL e ra cham ni bod ni rin’ ko fare Burey nu Perazim ngu lan e loway nu Gibeon, ni bochan e nge rin’ e tin ni leamnag ni nge rin’, nib thil nga rogon e tin marin’. Ra mu’nag e maruwel rok, ni maruwel ni dab nnang fan.
22 Dab mminmingad ko n’en ni gu be ginangmed ngay! Fa’an gimed ra minmin, ma ra gel fene mom’aw ni ngam milgad. Ku gu rung’ag ni SOMOL ni Gubin ma Rayag Rok e nge kirebnag ga’ngin fare binaw.
Gonop ku Got
23 Mtoyil ko n’en ni nggog; mag tay u wun’um e n’en ni gu be yog ngom.
24 Ba girdi’en e milay’ e gathi gubin ngiyal’ nma gi’ e yungi flang rok ni nge bung rogon ni ngan yung.
25 Yug nap’an nra mu’ i fal’egin rogon e but’, me yung e pi awochngin e herb nge dill nge cumin. I yuthalnag e wheat nge barley nge yung, ma marichlen e yung i flang rok nem me yung yug boch e grain ngay.
26 Manang rogon ni nge rin’ e maruwel rok, ni bochan e ke fil Got rogon ngak.
27 Dar ma fanay yulay i gul nib tomal ni nge pirdi’iy awochngin e dill ara cumin ngay; ke mang yoch ley i gek’iy ni achichig ni bfel’ ga’ngin e be fanay.
28 Dar ma kirebnag e wheat ni nge pirdi’ir nib gal, manang rogon i bilig ni ngi i pi’ e cart u daken ndabi tagannag fapi grain.
29 Gubin e pi gonop ney e ma yib rok SOMOL ni Gubin ma Rayag Rok. Tin ni tanomnag Got e go’ bfel’, ma urngin ngiyal’ mma yan i aw ni bfel’.