3
Yu Jerusalem nra wagagay lanin’rad
1 Chiney e Somol, ni SOMOL ni Gubin ma Rayag Rok, e nge fek rok yu Jerusalem nge yu Judah gubin ban’en nge urngin e pi’in nma pag e girdi’ e taga’ ngorad. Me chuweg garad nge ran rorad,
2 nge pi falu’ rorad, nge pi salthaw rorad, nge pi tapuf oloboch nge pi profet rorad, nge pi’in ma bey nge pi tolang ko am rorad,
3 nge pi tolang ko salthaw nge pi’in ma fanownag e girdi’, nge pi tamal’ugun e am nge pi’in ma pig ngu’ur gagiyeg niged boch ban’en.
4 I SOMOL e bayi pag nochi pagel ni bitir ngu’ur gagiyeg naged e girdi’.
5 Gubin e girdi’ nra be’ ma bayi dumpumon ngak be’. Pi’in kab pagel e bay dab ku’ur tedfan e pi’lal, ma pi’in nib sobut’ e bay dab ku’ur tedfan e pi’in yad e ga’ rorad.
6 Bayi taw nga bangiyal’ nra bakean e girdi’ ma bay ra mel’eged be’ u fithik’rad ngar ga’argad ngak, “I gur e kabay e mad ni ga ra yin’, are ngam mang ga’ rodad e ngiyal’ney nnap’an e gafgow.”
7 Machane ra fulweg ngorad ni ga’ar, “Gathi gag! Dabyag ni gu aywegmed. Ku dariy e ggan nge mad rog. Dab mu ted gag nggu gafaliymed!”
8 Arogon, Jerusalem e ke riya’! Ma Judah e ke puth! Urngin e tin yad be yog ma yad be rin’ e ba togopluw ngak SOMOL; bgagyal ni yad be gernag Got!
9 Changar ni fanenikan u owcharad e ke dag e kireb rorad. Denen ni yad be tay e ba gagyal ni bod ni i rin’ e girdi’ nu Sodom. Kar riya’gad, ni yad e kar girngiyed e riya’ nga dakenrad.
10 Pi’in mat’aw e yad ra felfelan’ mra fel’ e urngin rorad. Ma yad e bay ra felan’gad ko tin ur marwuliyed.
11 Machane girdi’ nib kireb e gafgow yad; ya tin ur bucheged rok boch e girdi’ e nge buch rorad e chiney.
12 Pi’in yad ma pi’ e salpiy ni ku yira sulweg e yad be gafgownag e girdi’ rog, ma pi’in karted e malfith e yad ra sasalap ngorad.
Girdi’ rog, pi’in ma tayethin romed e yad be sasaliyab nagmed, ya nge dab mu nanged ko uw e gin ngam chelgad ngay.
I SOMOL e ma pufthinnag e girdi’ rok
13 I SOMOL e ke fal’eg rogon ni nge yog e tin nge buch, nike fal’eg rogon ni nge pufthinnag e girdi’ rok.
14 I SOMOL e ke fek e pi’in pi’lal nge pi’in tayugang’ ko girdi’ rok ko pufthin. Me yog e tin ka ra bucheged ni ga’ar: “Kam giliw naged e pi milay’ ko grape, ma pi naun romed e ba sug ko pin’en ni ka mu feked ko pi’in gafgow.
15 Dariy mat’awmed ni ngam pirdi’iyed e girdi’ rog, ma ke mang i tay ngomed ni ngu’um gafgow niged e pi’in gafgow. I Gag, fare SOMOL ni Th’abi Tolang ma Gubin ma Rayag Rok, e kugog e pi thin ney.”
Ba ginaeng ngak e ppin nu Jerusalem
16 Me ga’ar SOMOL, “Amsap nga feni ufanthin e ppin nu Jerusalem! Yad be yan ni ka ra tolang naged e changar rorad. Urngin ngiyal’ ni yad ma sdadawol ma yad ma falfal’eg ya’an e yan rorad, ma pi churwa’ u tungun ayrad e be mada’ lingan ngalang.
17 Machane rug ra gechig nagrad bay gu puy piyan lolugrad nggu pagrad ni kar mudro’gad.”
18 Bayi taw reb e rran ni nge fek Somol urngin e pin’en nma uf uf e ppin nu Jerusalem ngay — nunuw u tungun ayrad, nge tin u lolugrad, ngu bilel’ugunrad
19 nge tin nu rifrifen pa’rad. Ra chuweg e mad ni yad ma upnguy nga owcharad
20 nge urwach rorad, nge florida ni yad ma thiy nga pa’rad nge tungun pa’rad;
21 nge luwaw ni yad ma yon’ nga buglipa’rad nge pethungrad;
22 nge pi mad rorad ni fafalel’, nge pi wuru’ e mad rorad, nge ku yugmad rorad nge kabang rorad;
23 nge mad ni mat’uft’uf rorad, nge hangkach ni wech, nge yungi mad ni yima m’ag nga lolgey nge yung i mad nib n’uw yang ni yad ma upnguy lolugrad ngay.
24 Florida ni yad ma thiy ngay e thil nge kirebnag bon dowrad, pi le’ed rorad ni fafalel’ e thil nge mang yuyal’ i tal, piyan lolugrad ni bfel’ e thil ngar pired ni kar madro’gad, mad rorad ni fafalel’ e bayi thil nge par ni mad ni mogmogchoth e yad be yin’; tamra’ e bayi yin’ luwan e ufan pidorang rorad.
25 Arogon, pi pumo’on ko fare binaw ni mada’ ko tin th’abi famsow, ma bay nli’rad ngarm’ad ko mael.
26 Pi garog ko binaw e ra kireban’rad ngar yorgad, ma fare binaw e ra bod be’ ni bpin ni kan th’ab e mad u daken nike par nga but’.