35
Ba fare Kanawo’en e Thothup
Bay i felfelan’ e ted ni desert,
ma floras e bay i puf ko yungi binaw ni kan pag.
Ted ni desert e bayi tang ma be tolulnag e felfelan’;
bayi bod feni fel’ ya’an e Burey nu Lebanon,
ma ba yong’ol e but’ riy ni bod e ted u Karmel ngu Sharon.
Gubin e girdi’ ni bayi guy e muluplup rok SOMOL,
nge feni ga’ nge feni gel gelngin.
 
Mu pi’ gelngin e pi pa’ef ndakuriy gelngin,
nge pi bug ni be da’da’ nike me’waer.+
Nganog ko pi’in ke mulan’rad ni ngan ga’ar,
“Mu pired ni gimed ba gel ma dab mu rusgad!
Got e bayib i ayuwegmed,
me gechignag e pi to’ogor romed.”
 
Pi ma’ew e bay ra guyed ban’en
ma pi biling e bay rrung’aged ban’en.+
Pi mugutgut e bay ra oggad ngalang ngu’ur churu’gad,
ma pi’in ndabiyag ni ngar nonod e bay ur tolul niged e felfelan’.
Ma bay i yan yu pa’ i lul’ u daken e ted ni desert;
ma yan’ ni be yik u desert e bayi ngal’ ni bangi lipath,
ma yungi but’ nike mlik e bayi sug ko alublub.
Ma gin i par e gamanman ni jackal riy
e bay i tugul e pan nge ro’uy riy.
 
Bayi sum ba pa’ i kanawo’ ni ba ga’ riy,
ni fithingan ni bay u nog e “Kanawo’en e Thothup.”
Dariy ba tadenen nra yan u daken e re kanawo’ nem;
girdi’ ni be yan u daken e re kanawo’ nem e dakuriy be’ nib balyang nra waliyrad ko kireb.
Ma dariy e gamanman ni layon riy;
ma dariy e gamanman riy nma cham.
Pi’in ke lagrad SOMOL u fithik’ e gafgow
e yad ra yan nga taferad u daken e re kanawo’ nem.
10 Ma bay ra tawgad nga Jerusalem nike felan’rad,
ni yad be tang ma yad be tolulnag e felfelan’.
Ma bay ur pired ni yad be felfelan’ ndariy n’umngin nap’an,
ndabki yib e kireban’ nge gafowan’ ngorad.
+ 35:3 Heb 12:12 + 35:5 35:5, 6 Mat 11:5; Luk 7:22