41
N’en ni micheg Got ngak piyu Israel
1 Be ga’ar Got,
“Mu th’abed gulungmed ngam telmed ngog gimed e pi nam ni gimed bmal’af!
Mu fal’eged rogomed ni ngam feked e oloboch romed nga tafen e puf oloboch.
Bay ni pagmed ngam welthingad.
Ngad mu’ulunggad ngad guyed ko mini’ e bmat’aw.
2 “I mini’ e gagiyegnag fa’anem nma gel ko mael nge yib u ngek
demturug e gin be yan riy mma gel ko mael?
I mini’ e be gagiyegnag nge gel ngak e pi pilung nge pi nam ko mael?
Saydon rok e ma toy ngorad nga but’ ni gowa yad e fiyath!
Gan e gat’ing rok e ma weregrad ni bod e nifeng nma wereg e pan nike mlik’!
3 Ma lekrad ni be lol’ograd ndariy ban’en nra buch rok,
nib machreg ni be yan ni nge langlang u but’ ngalang!
4 I mini’ e ke gagiyegnag ke yodorom?
I mini’ e turguy e n’en ni ngi i rin’ e girdi’ nu fayleng ko tabolingin i yib?
I Gag SOMOL e ug moy ko tabolngin,
mi Gag SOMOL e gu bay ko tungun.
5 “Girdi’ ko pi nam ni yad bmal’af e ka ra guyed e pin’en ni ku gu ngongliy;
ka ra tamdaggad ni yad be t’on ko marus.
Ka ra mu’ulunggad ni yad gubin karbad.
6 Pi’in yad ba salap i ngongliy ban’en nga pa’rad e ra bagayad ma be pi’ e athamgil nga laniyan’ bagayad.
7 Pi salap ko dimow naun e be ga’ar ngak e en nma maruwel ko gol, ‘Bfel’ e maruwel ni ka mu ngongliy!’
En ma ayiliy e gol nga downgin e liyos
e be pi’ e athamgil nga laniyan’ e en ni be richibiy nga ta’bang.
Be ga’ar be’, ‘Bfel’ rogon ni kan puthuy’.
Miyad richibiy fare liyos nge par nike muduwgil.
8 “Machane i gur Israel ni tapigpig rog,
gimed e pi girdi’ ni ku gu mel’egmed,
ni gimed e pi’in owchen Abraham ni fager rog.
9 Yungi n’en ni mus e fayleng riy e ku gu fulweggem riy;
yungi n’en nu fayleng ni um par riy nib orel e ku gu piningem riy
me lungug ngom, ‘Gur e tapigpig rog.’
Da gu n’igem, ya gu mel’egem ni ngam mang girdi’ rog.
10 Dab mu tamdag, ya gu bay rom.
I Gag e Got rom, dariy ban’en ni nga mu rus ngay.
Bay gu gel nigem mu gu ayuwegnem;
bay gu yoror rom mu gu ayuwegnem nga pa’ag nib gel.
11 “Pi’in yad be damumuw ngom
e bayi m’ayfarad miyad par ni ka ra tamra’gad.
Pi’in yad ra cham ngom e yad ra yim’.
12 Pi’in yad ra mael ngom e yira thirifrad u but’.
13 I Gag SOMOL ni Got rom;
i gag e gu ma pi’ gelngim ma be lungug ngom,
‘Dab mu rus; ya bay gu ayuwegnem.’ ”
14 Be ga’ar SOMOL,
“Israel, ri gab achig ma gab me’waer,
machane dab mu rus; ya bay gu ayuwegnem.
I Gag fare Got nu Israel ni gu ba thothup e bay gu ayuwegnem u pa’ e to’ogor rom.
15 Bay gu ngongliyem ngam bod bangi plang ni yima gunugunuy e wheat ngay,
ni bang nib be’ech ma bay e richib riy nib m’uth.
Bay mu chubu’uy ma ga kirebnag e pi burey ngay;
pi burey e bayi puth nge ngal’ ni fiyath.
16 Bay mon’rad ngalang;
me yib e nifeng i fekrad,
me weregrad e nifeng nib gel.
Ma aram e bay mu felfelan’ ni bochan e Gag e Got rom;
bay mu pining e sorok ngog i Gag fare Got nu Israel ni gub thothup.
17 “Ra gafgow e girdi’ rog ko ran miyad gay e ran,
nike mlik’ e k’onganrad ni bochan e belel,
me gag SOMOL e bay gu fulweg taban e meybil rorad;
I gag fare Got nu Israel e ri dab gu n’agrad.
18 Bay gu gagiyegnag e lul’ nge yib ko yochi burey ndariy ban’en riy,
ma ran ko alublub e bay i yan u lan e pi loway.
Daken e ted ni desert e bay gu pingeg nge ngal’ ni lipath,
mu gu gagiyegnag e but’ nib mlik e yib e ran ni alublub riy.
19 Bay gu gagiyegnag e gek’iy ni cedar nge tugul u daken e ted ni desert,
nge gek’iy ni acacia nge myrtle nge olive.
Yu chuwo’ i gek’iy e bayi tugul u daken yungi ted nder ma tugul ban’en riy,
ni yu chuwo’ i gek’iy ni pine nge juniper nge cypress.
20 Girdi’ e bay ra guyed miyad nang
ni Gag SOMOL e kug yodoromnag.
Bay ra nanged
ni fare Got nib thothup rok yu Israel e ke yodoromnag.”
Tagenging rok SOMOL ngak e pi got ni go’ bogi ban’en
21 I SOMOL ni ir e pilung nu Israel e ba’aray e thin ni nge yog:
“Gimed e pi got rok e pi nam, mu weliyed mat’awmed.
Mu leam niged e tin ni bfel’ ni ngambad mu weliyed me ayuwegmed.
22 Mired ngaray ngam yi’iy niged e tin bayib,
me yag nda nanged e ngiyal’ ni nge yodrom,
mi gimed weliy ngomad rogon urngin ban’en ni bay yan i aw,
ya nge yib i m’ug ma gadad nang.
23 Mogned ngomad e tin bay yib nga m’on,
mu gu nanged ni gimed e got!
Mu rin’ed ban’en ni bfel’ ara mu feked e gafgow i yib;
mu guyed rogon nggu rusgad ma gamad gin ngay!
24 Gimed nge urngin e tin gimed be rin’ e mm’ay fan;
pi’in yad ma meybil ngomed e ri yad ba sonsonogor!
25 “Kug turguy be’ nib mo’on nma par ko ngek;
bay gu gagiyegnag nge yib u lel’och i cham ngomed.
Bay i yot’yot’ e pi’in yad ma gagiyeg ni gowa yad e rungdu’,
ni bod be’ nma ma’ th’ib ni be yot’yot’ e but’.
26 I mini’ e aromed ni ka’a yi’iynag nra yodro’ ni arrogon,
me yag ni gogned e sorok ngak ni dawor i yodrom?
Dariy bigimed nike yog bbugithin ni murung’agen;
dariy be’ ni rung’ag ni mogned ta’ab bugithin!
27 I Gag SOMOL e som’on ni gog ngak yu Zion e re bugithin ney ni bfel’;
kug l’oeg be’ nga Jerusalem ni nge ga’ar,
‘Girdi’ rom e yad be yib! Yad be sul i yib nga tabinaw!’
28 Nap’an e gu changar nga fithik’ e pi got,
ma dariy bagayad ni bay bbugithin ni nge yog;
dariy ta’a bagayad ni yag rok ni nge fulweg e n’en ni gu fith.
29 Urngin e pi got nem e dariy farad;
dariy ban’en nrayag ni ngar rin’ed,
pi liyos rorad e yad bme’waer ma dariy gelngirad!”