43
Got ni micheg nra chuweg e girdi’ rok u pa’ e to’ogor rorad
1 Israel, i SOMOL ni ir e sunumiyem e be ga’ar,
“Dab mu rus, ya bay gu yoror rom.
Kug pining fithingam, ya mmil suwom ngog.
2 Ga ra yan u fithik’ e ran nib to’ar ma gu bay rom;
gafgow ni bay i yib ngom e dabiyag ni nge gel ngom.
Ga ra yan u fithik’ e nifiy ma dab mu gak’;
ma pin’en nib mo’maw’ ni bay i yib ngom e dariy ban’en nra rin’ ngom.
3 Ya Gag e SOMOL ni Got rom,
ni fare Got nib thothup nu Israel ni ir e ma chuwegem u pa’ e to’ogor rom.
Bay gu tay yu Egypt nga luwam ni fan e ngan pagem;
bay gu tay yu Ethiopia nge yu Seba nga luwam.
4 Gu ra tay bogi nam ni polo’ nga luwam ni fan e nggu ayuweg e pogofan rom,
ya ri gab fel’ u wun’ug
ma bochan e ri ga ba t’uf rog rog ma aram e gu be gagiyeg nagem ngu’un tay fam.
5 Dab mu rus, ya gu bay rom!
“Bay gu fek e girdi’ rom i yib nga taferad,
ni mus u lan e ngek nib mal’af nge yan i mus ngalan e ngal nib orel.
6 Bay gog ko lel’och ni nge pagrad,
mu gog ngak e yimuch ni nge dabi telrad.
Ya pi nam nib orel e nge sul e girdi’ rog riy,
ni gubin yang u fayleng ni ngar sulod riy.
7 Yad e girdi’ rog,
ma gu sunumiyrad ni ngar ted fag.”
Israel e ir e mich rok SOMOL
8 Be ga’ar Got,
“Mpininged e girdi’ rog nga tafen e puf oloboch.
Bay lan owcherad, machane yad ba ma’ew;
bay telrad, machane yad bbaling!
9 Mpininged e pi nam ngarbad ko pufthin.
Bin ngan e pi got rorad e rayag rok ni nge yog e tin bay fini yib?
Mini’ e arorad e yi’iynag e pin’en ni be m’ug e chiney?
Pi got nem e ngar feked e pi mich rorad ngarbad
ngar micheged ni yad e sororad,
ngar micheged ni thin rorad e ba riyul’.
10 “Gimed e girdi’ nu Israel, gimed e mich rog;
kug duwgiliymed ni ngam manged ba nam ni tapigpig rog,
ni fan e ngam nanged gag mu gu mich u wun’med,
me tamilangan’med riy ni kemus ni Gag e Got.
Dakuriy yu gu reb e got nga bang;
immoy ndariy, ma ku dariy ni bayib.
11 “Kemus ni Gag e SOMOL,
kemus ni gag e rayag rog ni nggu ayuwegmed u pa’ e to’ogor romed.
12 Gog ngomed u m’on e tin bayib,
mu gub gu ayuwegmed.
Dariy reb e got ngabang nike rin’ ni aray rogon;
gimed e mich rog.
13 I gag e Got, ma gubin ngiyal’ ni bay ug par ni Gag e Got.
Dariy be’ nrayag rok ni nge thay u gelngig;
dariy be’ nrayag rok ni nge thiliyeg e n’en ni gu be rin’.”
Mil ntay u Babylon
14 I SOMOL ni fare Got nib thothup nu Israel ni ir e lufmed u pa’ e to’ogor romed e be ga’ar,
“Bay gu l’oeg baraba’ i salthaw ni pire’ nga Babylon ngar chuweged gimed u pa’ e to’ogor romed;
bay gu t’ar e mab ko pi garog ko binaw,
ma tolul ni be tay e girdi’ riy e bayi ngal’ ni meyor.
15 I Gag SOMOL, ni Got romed nib thothup.
Israel, i gag e gu sunumiyem, mi gag e pilung rom.”
16 Kakrom e ngongliy SOMOL ba kanawo’ ni yan u maday,
bpa’ i kanawo’ ni yan u fithik’ e day ni be gireng nib gel.
17 I waliy baraba’ i salthaw ni pire’ ngarm’ad,
ni baraba’ i salthaw ni pire’ ni yad ma yan u chariot nge os.
Miyad thig nga but’ ma dakiyag rsuwongad,
ni bod ba daramram u ba kindel ni math!
18 Machane be ga’ar SOMOL,
“Dab mu ted u lanin’med e tin ke thumur ban’en
ara um leam niged e pin’en nike kaday.
19 Mu sapgad ko n’en nib be’ech ni nggu ngongliy.
Be yib i m’ug e chiney, rayag ni ngam guyed e chiney!
Bay gu ngongliy bpa’ i kanawo’ nge yan u daken e ted,
mu gu pi’ yu pa’ i lul’ ngomed u rom.
20 Mus ko gamanman ni malboch ni bayi tay fag;
gamanman ni jackal nge arche’ ni ostrich e bay ra pininged e sorok ngog
ko ngiyal’ ni bay gu gagiyegnag e lul’ nge yan u lan e ted ni desert,
ya nggu pi’ e ran ngak e girdi’ rog ni gag e gu mel’egrad.
21 Yad fapi girdi’ ni gu sunumiyrad ni ngar pired ni girdi’ rog,
ma bay ur tanggad ni yad be pining e sorok ngog!”
Denen rok yu Israel
22 Be ga’ar SOMOL,
“Machane gathigag e um meybilgad ngog;
ya chalabanmed yu Israel ngog.
23 Da ku um feked i yib ngog e saf ni maligach ni mo’oruf;
da ku mur ted fag ko pi maligach romed.
Da gu tomal nagmed ni nggu tuwasariymed nthingar mu pi’ed e maligach ngog,
ara aw porawmed ni bochan e incense ni gu be yog ni ngu’um pi’ed ngog.
24 Da mchuw’iyed e incense ni fan ngog,
ara mu fal’eged lanin’ug ko mam ko gamanman romed.
Ya mu gafgow niged lanin’ug ko denen romed;
i thay porawog ko kireb ni um ngongliyed.
25 “Machane Gag fare Got ni gu ma chuweg e denen romed,
ma gu ma rin’ ni bochan e Gag e En ni Gag.
Dab kug leamnag e denen romed.
26 Darod nga tafen e puf oloboch; mired nga mogned e tin ni gomanga kam dabuyed rog.
Mu welthingad ngam micheged ni gimed ba mat’aw!
27 Bin th’abi m’on e chitamangimed e denen,
ma pi’in yad ma yog e thin romed e ka ra denengad nib togopluw ngog.
28 Pi’in yad be gagiyeg nagmed e ur darifan niged e naun rog nib thothup.
Ma aram mu gu girengiy e riya’ nga daken yu Israel,
mu gu pag e girdi’ rog ngu u nog e thin nib kireb ngorad.”