46
1 “Irera’ e ngiyal’ ni nge mus e pi got nu Babylon!
Bel nge Nebo e un meybil ngorow,
machane chiney e kan tayrow nga daken keru’ e dongki,
nib gilab u daken keru’ e gamanman nike aw porowrad!
2 Pi liyos e dabiyag ni ngar ayuweged yad;
kan kolrad, kan fekrad nga bang.
Irera’ e ngiyal’ ni ngnge mus e pi got nu Babylon!
3 “Gimed e pi’in owchen Jakob, mu telmed ngog,
ni gimed urngin e pi’in kam mageygad ko girdi’ rog.
Kug ayuwegmed ni ka nap’an nni gargel nagmed.
4 I Gag e Got romed, ma bay ug ayuwegmed
nge mada’ ko ngiyal’ ni kam pilibthirgad nike manna’ piyan lolugmed.
Kug ngongliymed ma bay ug ayuwegmed;
bay ug fekmed ngam mada’gad ko gin ndabki buch ban’en romed riy.”
5 Be ga’ar SOMOL, “I mini’ e gimed ra susun nigeg ngak?
Gur bay be’ ngabang ni bod gag?”
6 Girdi’ e yad ma bing tafen e salpiy rorad ngar pu’oged e gol riy nga but’;
miyad thabthabelnag e silber.
Miyad pi’ puluwon be’ nma maruwel ko gol nge ngongliy ba liyos riy;
mu ur siro’gad ngay ma yad be meybil ngay!
7 Miyad tay nga porad ngar feked;
mranod ra ted nga tagil’ me par u rom,
ndabiyag ni nge chuw u tagil’.
Ra meybil be’ ngay, ma dabiyag ni nge fulweg taban e meybil rok,
ara ayuwegrad ko gafgow.
8 “Gimed e pi tadenen, mu leam niged e re bugithin ni ba’aray;
mu tafinay niged e n’en ni kug ngongliy.
9 Mu leam niged e n’en ni gu rin’ kakrom;
mu nanged ni kemus ni Gag e Got,
ma dariy be’ ni bod gag.
10 Gog ko tabolngin e tin bay ko tungun;
kab kakrom mu gog e tin bayib.
Mu gog ni tin kem’ay i leamnag rog e dabiyag ni nge thil;
ya gu ra rin’ urngin e tin kem’ay i leamnag rog.
11 Gu be pining be’ nib mo’on ni nge yib u ngek;
bay yib ni bod ba arche’ ni pag ir nge yib nga but’ ni nge kol ban’en,
me rin’ e tin kem’ay i leamnag rog.
I gag e kug non, ma tin kugog e bay nrin’.
12 “Mu telmed ngog, gimed e girdi’ ni gelan’,
ni gimed be leamnag ni gel ni ngam ted e kab mal’af.
13 Rofen ni nga ni gel e kug chugurnag,
daki mal’af.
Gel ni bay gu tay e dabi sowath.
Bay gu chuweg yu Jerusalem u pa’ e to’ogor rok,
mu rom e bay gu gagiyegnag yu Israel riy ngan tay farad.”