51
Thin ni nge fel’eg laniyan’ yu Jerusalem
I SOMOL e be ga’ar,
“Motoyil ngog, gur e en ga ba’adag ni ngam thap,
i gur e en ga be man ayuw ngog.
Mu leamnag fare war ni mub riy
ni ir e ni thirfem riy ngan ngongliyem.
Mu leamnag e ga’ rom i Abraham,
nge Sarah, ni yow e mub rorow.
Ngiyal’ ni gu pining Abraham e dariy fak,
machane mu gu tow’athnag nggu pi’ e bitir ngak;
mu gu yo’ornag e pi’in owchen.
 
“Bay gu dag e runguy rog nga Jerusalem,
ngak gubin e pi’in yad be par u fithik’ e gafgow u rom.
Ni yug aram rogon ni kan n’ag e re but’ rok nem, ma bay gu mangnag bangi milay’,
ni bod fare milay’ ni gu yung u lan yu Eden.
Madnom nge felfelan’ e yira tay u rom,
mi ni tangnag e sorok ngog nge ogmagaer.
“Mmotoyilgad e girdi’ rog ngog,
murung’aged e n’en ni nggog:
Ku gu pi’ e machib rog ko pi nam;
pi motochiyel rog e bay i fek e tamilang i yib ngorad.
Bay gub nib papey nggu aywegrad;
ngiyal’ ni nggu gel e ke chugur.
I gag rog e bay gu gagiyegnag e pi nam.
Tin nib palog e nam e be son nigeg ni nggu taw;
ni yad be son nike lagan’rad ngog ni nggu aywegrad.
Mu changar nga lanelang; ma ga changar ko fayleng!
Lanelang e bayi m’ay ngabang ni bod e ath;
ma fayleng e bayi wod ni bod e mad nike kaday,
ma girdi’ riy e bay i yim’ ni bod e chachangeg.
Machane pufrogon nge mat’aw ni nggu fek i yib e bayi par ndariy n’umngin nap’an;
aram e gel ni nggu tay ko tomur.
 
“Mmotoyil ngog, ni gur e en gamnang e n’en nib mat’aw,
nike rich e machib rog nga fithik’ i lanin’um.
Dab murus ko ngiyal’ ni be kak’aringem e girdi’ ma yad be yog e thin nib kireb ngom;
ya bay ram’aygad ngabang ni bod e mad nike longuy e ngael!
Machane nganpuf kodenen ni kug fek i yib e rapar ndariy n’umngin nap’an;
gel ni nggu tay e ra par ni dabimus bi’id.”
 
SOMOL, mu’ od ngam aywegmad!
Mu maruwel nga gelngim ngam aywegmad;
mu maruwel ngay ni bod ni mu rin’ kakrom.
I gur faram e mu theth’ab fare gamanman nu maday ni Rahab nge yochyang.
10 Ku gur e mu mliknag e regur
ma ga ngongliy e kanawo’ nge th’ab e day nga barba’,
pi’in mu aywegrad e yag nra thapgad nga barba’.
11 Pi’in mu lagrad ko gafgow
e bay ra tawgad nga Jerusalem u fithik’ e felfelan’,
yad be tang ma yad be garusnag e felfelan’.
Bay ra pired ni yad ba felfelan’ ndariy n’umngin nap’an,
ni ka ra pufgad ni urun ko kirban’ nge gafgowan’.
 
12 I SOMOL e be ga’ar,
“I gag e cha’ ni gu pi’ gelingmed.
Ere mangfan ni gimed be rus ko girdi’,
ni bod e pan ni dar ma n’uw nap’an.
13 Kam paged talin SOMOL ni sunmiymed,
ni ir e filath lanelang
me ayliy e deaf ko fayleng?
Mangfan ni ngu’um pired ni gimed bmarus
ko dumumuw rok e pi’in yad ma gafgow nagmed,
ni pi’in ka ra fal’eged rograd ni ngar gafgow niged gimed?
Dumumuw rorad e dabkiyag ni nge bit ngomed.
14 Pi’in yad ba kalbus e dabki n’uw nap’an mi ni pagrad;
bay ra pired ko re fayleng ney nib n’uw nap’an
me yag ngorad urngin e ggan nib t’uf rorad.
 
15 “I Gag SOMOL ni Got romed;
i gag e gu pug e day
nge mada’ lingan e n’ew riy ngalang.
Fithingag e SOMOL ni Gubin ma Rayag Rok!
16 Gu fileth lanelang
mu gu ayliy deaf ko fayleng;
gu be ga’ar ngak Jerusalem, ‘Gimed e girdi’ rog!
Kug pi’ ngomed e thin rog,
ma gu ma yororiy pa’ag ngomed.’ ”
Tomuren e gafgow nga Jerusalem
17 Jerusalem, mu od!
Mu sak’iy!
Ka mu unum fare kap ko gechig
ni fithik’ e damumuw rok SOMOL e ke pi’ riy ngom ni ngam unum;
kam unum kem’ay, ga be thigthig.
18 Dariy be’ ni nge pow’iyem,
dariy be’ ko tirom e girdi’
ni nge kol pa’am.
 
19 Ba l’agruw e riya’ nike aw nga dakenam:
ke mogothgoth e binaw rom ko mael,
ke yim’ e girdi’ rom ko blig.
Ma dariy be’ ni be dag nike magfan’ ngom.
20 Urngin e bug ko kanawo’
ma ke aw e girdi’ rom riy nga but’ nike m’ay gelingrad;
yad bod e gamanman ni deer nike aw ko nug ni kanpag.
Kar thamiyed gelngin e damumuw rok Got.
 
21 Gimed e girdi’ nu Jerusalem e kam gafgowgad,
ni gimed be thigthig ni gowa gimed ba ching,
22 I SOMOL ni Got romed ni be n’ufegmed e be ga’ar,
“I gag e nggu chuweg fare kap
ni gu pi’ ngomed u fithik’ e damumuw rog.
Bayi dab kum unumed
fare wayin nma thigthig nagmed.
23 Bay gu pi’ ngak e pi’in ku ur gafgow niged gimed,
ni fapicha’ ni yad e ur gagiyeg niged gimed ngu’um thiggad nga but’ u lan yupa’ i kanawo’
mu’un yot’yot’med nga but’ ni gowa gimed e rungdu’.”