7
Thin ni nge yan ngak Ahaz ni Pilung
1 Ngiyal’ ni Ahaz ni Pilung u Judah, ni Jotham e chitamngin, me Uzziah e tutuw rok e ni mael. Rezin ni Pilung nu Syria, nge Pekah ni Pilung nu Israel, ni Remaliah e chitamngin e ra m’agew e mael nga Jerusalem, machane de yag ni ngar kolew.
2 Me taw e thin ngak fare pilung nu Judah ni salthaw nu Syria e ka ra mufgad ngalan yu Israel, me yib e marus ngak nge gubin e girdi’ rok ngu’ur t’on gad ni bod e gek’iy ni mithmitheg e nifeng.
3 Me ga’ar SOMOL ngak Isaiah, “Mu fek fare pagel ni fakam i Shear Jashub ngam marow ngam mada’gad Ahaz ni Pilung. Bay mpiri’egew u daken e kanawo’ ko fa gin ma maruwel girdi’en e mulmad riy, u taban ba wol’ e ran nma yib ko fare yibu’ ni bay nga talang.
4 Mog ngak nge par nike fal’eg rogon’, ma dabi wagagey laniyan’, ma dabi rus ara magafan’. Damumuw rok Rezin ni Pilung nge yu Syria ni girdi’ rok, nge damumuw rok Pekah ni Pilung e dabi rus ngay, ya dariy ban’en nra rin’, ya bod rogon e ath ni be yib u l’agruw ley i l’ud.
5 Syria nge yu Israel nge pilung riy e ka ra makathgad.
6 Ka ra leam niged ni ngar feked e mael ngalan yu Judah nge rus e girdi’ riy ngar uned ko ba’ rorad miyad pilungnag fare mo’on ni fak Tabeel.
7 “Machane gag SOMOL e gu be yog ndabi yodorom.
8 Mangfan? Ya yu Syria e de gel ko fare binaw nu Damaskus ni tochuch rok, ma yu Damaskus e de gel ngak Rezin ni Pilung. Ma yu Israel e ra yan i gaman nel’ i ragag nge lal e duw ma kari me’waer ndabiyag ni nge par rok ni reb e nam.
9 Yu Israel e de gel ko fare binaw ni tochuch rok nu Samaria, ma yu Samaria e de gel ngak Pekah ni Pilung.
“Fa’anra dabi muduwgil e michan’ romed, ma dab mmuduwgilgad.”
Fare pow rok Immanuel
10 Me pi’ SOMOL bbugithin nge yan ngak Ahaz bayay ni ga’ar:
11 “Mu wenig ngak SOMOL nge pi’ ba pow ngom. Rayag ni nge yib u ar ko fayleng ko yam’ ara u lang u tharmiy.”
12 Me ga’ar Ahaz, “Dab gu wenignag ba pow, ya dab gu sikengnag SOMOL.”
13 Me fulweg Isaiah ni ga’ar, “Pi owchen David ni Pilung, mu telmed. Ka mu gafgow niged e gumaen’ ko girdi’, ere ngkum gafgow niged e gumaen’ rok Got?
14 I SOMOL e bayi pi’ ba pow ngomed. Be’ ni bpin ni ka ba rugod nike diyen. Bayi gargel ni bochi pagel ma bayi tunguy fithingan ni Immanuel.
15 Ra taw yangren ko ngiyal’ nrayag ni nge turguy ban’en, ma girdi’ e bayi unum e milik miyad kay e honey.
16 Ra dawori taw ko ngiyal’nem, ma nam ko gali pilung nem ni yow be k’aring e marus ngom e kann’ag.
17 “I SOMOL e bayi girengiy nga dakenam nge nga daken e girdi’ ko nam rom nge nga daken girdi’en e tabinaw rom nib pilung, boch e rran ni kab gel e gafgow riy ko gafgow nike yib ni ka nap’an ni ki’ yu Israel rok yu Judah, ya bayi fek e pilung nu Assyria i yib!
18 “Ra taw ko ngiyal’nem, me falgernag SOMOL yu Egypt ni ngarbad ni yad bod e lal ko fa yu pa’ i lul’ nrib orel ni yib ko fare lul’ ni Nile fithingan, ma ku bayi yodoromnag yu Assyria ngarbad ngaray ko nam rorad ni yad bod e ngul.
19 Bay ra suggad u lan e pi loway ni pire’ e malang riy ngu lan e pi yiy ni bay u tan e war, ma bay ra sug niged fithik’ i ran’ urngin kaen e yochi ke gek’iy ni bay rachangalen nge urngin e yungin ma kay e gamanman e pan riy.
20 “Ra taw ko ngiyal’nem, me gagiyegnag SOMOL be’ nma puy lolgey nge yib u ba’nem e Eufrates ngaray, ni aram fare emperor nu Assyria, ma bayi puy sorobmed me th’ab piyan lolugmed nge piyan dowmed.
21 “Ra taw ko ngiyal’nem, ma fa’anra kemus ni ta’reb e garbaw nge l’agruw e kaming ni bay rok be’,
22 ma ra yib logowen e thuthrad ni pire’ nge yag ngak fa’anem urngin e milik nib t’uf rok. Errogon, urngin e pi’in bay ra mageygad u daken e nam ndar m’ad e bayi yag ngorad e milik nge honey ni ngar ked.
23 “Ra taw ko ngiyal’nem ma yungi woldug ni grapes ni bfel’ nra bang ma bbiyu’ kaen e woldug ni grape ni bay riy, mra bang ma bbiyu’ yang e silber nni pi’ ngay, e bayi sug e pan riy ni bay rachangalen.
24 Dariy be’ nra yan ngay ndabi fek e gat’ing nge gan. Ya nam ni ga’ngin e bayi sug ko pan ni bay rachangalen.
25 Ma yungi ted ni un wolduguy e bayi suguy e pan ni bay rachangalen ndakuriy be’ nra yan ngay. Bayi par ni garbaw nge saf e be kay e pan riy.”