11
Zofar
1-2 Mog, dariy be’ nra fulweg gubin e pi thin ney ni dariyfan?
Mog, ra yo’or e thin ni yog be’ me mat’aw riy?
Job, ga be leamnag ma dabiyag ni nggu fulweged lungum?
Pi moning rom nir e ra m’aynag e thin u langmad?
Ga be yog ni n’en ni ga be weliy e ba riyul’;
ma ga be yog ni ga ba machalbog u mit Got.
Rug be athpeg ni mang e yigi fulweg Got lungum!
Ya ra yog ngom feni yo’or rogon e gonop;
bay boch ban’en ni kay gi to’ar ndabi dad e llowan’ rok e girdi’ ngay.
Got e be gechig nagem ni ba’achig nga rogon ni nge aw ngom.
 
Mog, rayag rom ni ngam pir’eg e tirok Got ban’en nib to’ar?
Rayag ni ngam pir’eg e gin ni mus gelngin e en ni Gubin ma Rayag Rok riy?
Lan e tharmiy e gathi aram e gin ni mus Got riy,
machane dab mu dad ngay.
Got e manang fare fayleng ni tagil’ e yam’,
machane gur e damnang.
Feni ga’ Got e ba ga’ ko fayleng,
ma ba ga’ radan ko day.
10 Fa’anra oloboch Got ngom nge fekem i yan ko puf oloboch,
me mini’ e bay u rom nra taleg?
11 Got e manang ko mini’ e pi’in ndariy ban’en ni yad bfel’ ngay;
be guy urngin e ngongol rorad nib kireb.
12 Girdi’ nib pinat e bay ra gonopgad
ko ngiyal’ nra gargel e dongki ni malboch ma ba mangmor fak.
 
13 Job, mu yal’uweg gumircha’em. Mu nameg Got.
14 Mu tay e kireb nge denen u orel ko tabnaw rom.
15 Me yag ni ku mu pug owchem ngalang nike fel’ dakenam bayay, ni gab mayluy ma dab kumrus.
16 Ma aram e urngin e gafgow rom e bay i mathmath u lanin’um,
ni bod e lul ni sugbur nge thumur mi ni pagtalin.
17 Yafos rom e bay i ga’ ra’en ko yal’ ni misiw’,
ma pi awa nth’abi lumor u lan e yafos ra gal ram’en ni bod ni puf e woch’.
18 Ga ra par nib pagan’um ma gabsug ko lagan’;
Got e re yoror rom me pi’ e toffan ngom.
19 Ma dab kumrus ngak e pi to’ogor rom;
ma bo’or e girdi’ ni bay ur ninged e ayuw ngom.
20 Machane pi’in kireb e bay u ra sapsapgad nike math e liyab rorad
miyad pir’eg ndariy kanawo’en miyad thay.
Ta’a re lagan’ rorad e yam’ ni nge taw ngorad.