18
Bildad
1-2 Job, mog dabyag ni nge th’ab e girdi’ ni bod gur gulungan?
Fa’an ga ra tal ngam motoyil, ma rayag ni nggu nonad ngom.
Mang e n’en ni ka mu leamnag me lungum e gamad bod feni aliliy e garbaw?
Ga be gelnag e gafgow rom ko damumuw ni ga be tay’.
Gur, yira chuw u daken e fayleng ni bochan e kam damumuw?
Gur, bayi mithmitheg Got e burey ni bochan e nge fal’eg lanin’um?
Magal rok e en nib kireb e bay nthang;
ma dakuriy bi’id ni ku ra af.
Re magal ni bay u lan e tent rok e bayi math.
Immoy nib mudugil e yan rok, ma chiney e be doldol’;
ke paraw — ngongol rok e ke gafgownag.
I yan ngalan bangi nug, me mit e rifrif u ay;
me mit ay ko wup ni daki thay.
10 Ma bay ba tafich ni kan mithag u daken e but’;
ma kan fal’eg rogon ba wup kan tay nga kanawo’ rok.
 
11 Ma marus e ke liyeg ni be sonnag;
gubin ngiyal’ nra yif’ ay ma be lek e marus.
12 Immoy ni bfel’ rogon, ma chiney e be yan nib mak’iy;
ma ba sak’iy e riya’ ni be son u barba’ i cheren.
13 Ba m’ar ni ubchiya’ e ke fanay downgin
nike k’aring e malad nga pa’ nge ay.
14 Ka ni chuweg ko fare tent ni i par riy nib pagan’,
ma ka ni girengiy i yan nga mit fare Pilungen e Yam’.
15 Chiney e demturug be’ mra par u lan fare tent rok —
u tomuren ni ka ni wereg e falay riy ni sulfur! *
16 Pi lik’ngin nge pa’ngin e go’ ke mororoy ke mlik’.
17 Ke math murung’agen u gubin yang;
ma dakuriy be’ ni ku ra yib ngan’.
18 Bay ni tuluf nge yan nga wuru’ e nam rok e pi’in kabfos,
bay ni tuluf ko tamilang nga fithik’ e lumor.
19 Dariy be’ ni owchen, ma dariy be’ rok ni kabfos.
20 Gubin e girdi u lan e ngek nge mada’ ko ngal e yad ra rung’ag e tin ke buch rok
e go’ yad ra dada’ miyad t’on ni marus.
21 Ireram wa’athan e pi’in kireb,
wa’athan e pi’in ndariy fan Got u wan’rad.
* 18:15 SULFUR: Bmit i falay kakrom yima be’echnag e senggil ni ku’un tayam’ riy nge chuw bon.