20
Zofar
1-2 Job, ka mu k’aring e damumuw ngog. Dabkiyag ni nggu kadan’ug ni dab gu fulweg lungum.
3 N’en ni ga be yog e be kun ngog,
machane gu manang e fulweg riy.
4 Ri gamnang ni kab kakrom,
ni kanap’an ntay e girdi’ nga fayleng,
5 ma dariy reb e girdi’ nib kireb nike par nib felfelan’ nib n’uw nap’an.
6 Sana mang e ra gilbugwan nge yan feni sorok nge mada’ ngalan e lang,
ni kari gilbugwan ke dad lolugen ko manileng,
7 machane bayi un ko nifeng bod e fiyath.
Pi’in yad manang owchen
e bay i balyangan’rad ko uw e ke yan ngay.
8 Bayi m’ay ngabang ni bod ba lik’ay, ni bod nni pilyeg e changar rok be’ nge guy ban’en nnep’,
ma dab kuniguy bi’id.
9 Bayi may ngabang nge chuw ko gin i par riy;
10 ma pifak e bay ra fulweged labgen e tin nni iring rok e pi gafgow.
11 Downgin e immoy ni kab pagel ma ba gel,
machane dabi n’uw nap’an ma bayi ngal’ ni ab.
12-13 Tin ba kireb e rib fel’ lamen u langan
ra tay boch u lan lugun ni ngi i fal’eg lamen l’ugun.
14 Machane lan yin e ra pig fapi ggan nge mo’oy riy,
ni bod feni mo’oy e yub.
15 Fare mo’on ni kireb e sul u lugun nga but’ e pi felel’ ni i iring;
Got e ra sulweg rok, ni aram rogon ni sulweg u lan e yal rok nga but’.
16 N’en nike ful’ be’ nib kireb e bod e yub;
ra yim’ riy ni bod nike k’ad ba porchoyog ni bay e yub rok.
17 Dabi par nib fos nge guy e lul’ ni gapgep ko olive
ara yu pa’ i lul’ ni be yan ni milik nge honey.
18 Ri bayi digey urngin e pin’en nike muruwliy;
ma dariy bangiyal’ nra felfelan’ ko fla’ab rok,
19 ni bochan e i gafgownag e pi’in gafgow ma i fek owchen u dakenrad.
ma i leag e pi naun ni gathi ir e toy.
20 Dariy bangiyal’ nra tal ko chogow.
21 Nap’an nra abich ma dakuriy ban’en nra magey.
Machane chiney e bayi mus e fla’ab rok.
22 Nap’an ni kari yani tun tolngin e fla’ab rok
ma ke madle’ u tan malngin e gafgow nike yib ngak.
23 Mu pag nge kay gubin e tin ba’adag!
I Got e bayi gechignag u fithik’ e puwan’ nge damumuw nib gel.
24 Nap’an nra guy rogon ni nge mil u bangi saydon ni wasey,
ma ba nguwalen e gat’ing ni bronze e ra aw ngak nge thig nga but’.
25 Me aw gan e gat’ing ngak nge yan i bogor u barba’ rok;
ni be lul’ racha’en u nguwalen fare gan e gat’ing ni be galgal ra’en,
me m’ag e morus.
26 Ke mogoth gubin e chubgil rok;
ma ir nge chon e tabnaw rok e yad be yik’
u ba nifiy ni gathi girdi’ e k’oreg.
27 Tharmiy e dag e denen rok e re mo’on ney,
ma fayleng e be micheg nib buch e rok.
28 Urngin e pi fla’ab rok ni bay ni gathay
u fithik’ e damumuw rok Got.
29 Irera’ e n’en nra machda’nag e girdi’ ni kireb,
ni aram e n’en nike duwgiliy Got nga dakenrad.