23
Job
1-2 Ku gu be togopluw ma ku gu be gun’gun’nag e tin dabug ngak Got;
dabiyag ni nggu tal ndab kug gel’gel’.
3 Gu be athpeg ni mang e yi gu nang e gin gu ra pir’eg Got riy,
mu gu nang rogon mu gu wan ko gin bay riy.
4 Gu ra weliy ngak e tin ke buch rog
mu gog ngak gubin fan ni bfel’ e rog.
5 Gu ba’adag ni nggu nang ko mang e ra yog
nge rogon nra fulweg lungug.
6 Gur polo’ i gelngin Got nra togoluwnag ngog?
Danga’, ya ra motoyil ngog.
7 Gag e gu ba yul’yul’; rayag ni gu weliy salpeg ngak Got;
mra yog ni gag e de buch e rog.
8 Kug gow u lan e Ngek, ma demo’ Got u rom;
ma da gu pir’eg nap’an ni ug gow u lan e Ngal.
9 Ka be maruwel Got u lan e Lel’uch ngu lan e Yimuch,
machane ka dawor gguy.
10 Yug aram rogon ma Got e manang gubin yay ni gu be yif’ eg;
ra sikeng nigeg, ma ra pir’eg ni gu ba machalbog.
11 Gub yul’yul’ i lek fare kanawo’ ni mel’eg,
ma dariy bingyal’ ni ku gu thum’ nga wuru’ e wo’.
12 Gubin ngiyal’ ma gu ma rin’ e tin keyog Got ni ngan rin’;
gu ma fol u lanyan’, gathi tin ni taban lanin’ug e gu be fol riy.
13 Got e der ma thil. Dariy be’ nrayag ni nge togopluw ngak
ara taleg ndabki rin’ e tin ni ba’adag ni nge rin’.
14 Ra tay nga tagil’ e tin ni tanomnag ni fan ngog;
re tanom nem e ri ta’reb u fithik’ yooren e pi tanom rok;
15 gu be durru’ ko marus u p’eowchen.
16-17 I Got ni Gubin ma Rayag Rok e ke muleg an’ug.
I Got, ma gathi lumor, e ke k’aring e marus ngog —
ni yug aram rogon ni lumor e ke ma’ew nigeg.