33
Are chiney o, Job e ngarim fal’eg e motoyil
ko gubin e tin ba’aray ni nggog.
Ku gu fal’eg rogog ni nggog ko mang e bay u lanin’ug.
Gubin e thin rog ma ba rriyul’,
ma tin rriyul’ e gu be yog.
Kan nthothup rok Got e chamayeg me pi’ e yafos ngog.
 
Mu fulweg lungug ni fa’anra yag rom. Mu fal’eg rogom ni nga da tugthingow.
I gag e ta’reb rogodow u owchen Got;
gadow l’agruw nni chamaydow ko but’.
Ere dariy rogon ni ngam tamdag ngog;
ya dabi gel fanag ngom.
 
Chiney e ba’aray e n’en ni ku gu rung’ag ni kamog:
“De buch e rog; dariy ban’en nib kireb ni ku gu rin’.
I gag e fel’ e rog ma dariy e denen rog.
10 Machane Got e ke pir’eg e taway ni nge og ngog
be teg ni gu bod ba to’ogor.
11 Ke m’ag e chen nga rifrifen eg;
be yaliy urngin e mithmith rog.”
 
12 Machane, nggog ngom o Job, ni gur e ga be oloboch.
Ya Got e ba ga’ ngak urngin e girdi’.
13 Mang ni ga be abngiy Got
ni der fulweg e gun’gun’ ni gadad be tay?
14 Yu gu, am rogom ni be non Got bayay nge bayay,
ma dariy be’ ni be motoyil ko n’en ni be yog.
15 Ra nep’ nike mol e girdi’,
ma Got e ma non u malk’ay nge changar nma pilyeg.
16 Ma pagrad ngar rung’aged e n’en ni be yog,
miyad rus ko tin ni be puwan’nag ngorad.
17 I non Got ngorad ni ngar talgad ko denen
me aywegrad nge dabki tolngan’rad.
18 Dabi pagrad ngan li’rad ngarm’ad;
ma aywegrad u pa’ e yam’.
19 Got e ma yal’uwegdad ko m’ar nma pi’
mma sugnag fithik’ i dowdad ko amith.
20 Be’ nike m’ar e ke fangan’
mus ko ggan ni bfel’ nra guy me kirkireb ngorngoren.
21 Ma kem’ay ngabang;
nrayag ni mu guy urngin e yil rok;
22 nike chugur ni nge yan ko fayleng ko yam’.
 
23 Ma fa’anra yib ba engel ngak ni nge ayuweg —
ni reb e engel ko yu bbuyu’ i engel rok Got,
ni yad ma pugoran ko girdi’ e maruwel rorad.
24 U fithik’ e wurengan’ mra yog fare engel ni nge ga’ar, “Ngan pag e cha’anir!
Ya dabiyan nga’ar ko fayleng ko yam’.
Ba’aray puluwon ni ngan pag.”
25 Bay ki pagel bayay nge sul gelngin;
26 ma nap’an e ra meybil, me fulweg Got taban e meybil rok;
bay i liyor ngak Got u fithik’ e felfelan’;
me ayliy Got urngin ban’en u puluwon nge fel’ bayay.
27 Ra yog u fithik’ e yo’or ni nge ga’ar, “Kug denen.
Ngongol rog e de mat’aw, machane de thangeg Got.
28 De pageg ngu wan ko fare fayleng ko yam’,
ma ku gu bay ni ku gu bfos.”
 
29 Ma rin’ Got urngin e pin’ey bayay nge bayay;
30 ma ayweg e pogofan rok be’
me pi’ e felfelan’ ko yafos rok.
 
31 Job, chiney ngam faleg’ e motoyil ko n’en ni nggu weliy;
mu thab gulngam nggu non.
32 Ma fa’anra bay ban’en ni ngamog, magog ngu rung’ag;
gu ra felfelan’ ngay ni nggu micheg nib mat’aw e rom.
33 Ma fa’anra dariy ban’en ni ngamog,
ma ga thabgulngam ngam motoyil ngog,
nggu fil ngom konawo’en e gonop.