40
1-2 Job, ga be tugthin ngak Got ni Gubin ma Rayag Rok;
ere ngam tal e chiney fa kabay ban’en ni ngamog?
Job
3-4 SOMOL, gu non ni gu be yog e thin ko balyang. Ere be mang e kabay ni nggog?
Bay gguy rogon ni dab kugog ban’en.
5 Tin kugog e ke yo’or ko tin nsusun e ir e nggog.
6 Me non SOMOL bayay u fithik’ fare nanyor ngak Job.
SOMOL
7 Mu sak’iy ngalang nrogon e pumo’on,
ngam fulweg e pi de’er rog.
8 Mog, ga be guy rogon ni nge m’ug ni gu ba kireb
me par ni gur e ga ba manigil?
9 Mog, ta’reb rogon gelngim ngog?
Rayag ni nge dirra’ lungum ni bod gag?
10 Fa’anra yag rom me ere mu sak’iy ngalang u fani sorom nge fanam madangdang;
magon’ nga dakenam fanam rir nge fanam gilbugwan.
11 Mu changar ko pi’in yad ba tolngan’;
mu pu’og e damumuw rom nge sobutan’rad.
12 Mu sap ngorad ngam fulwegrad nga but’;
mu pirdi’iy e pi’in nib kireb ko gin ni yad ba sak’iy riy.
13 Mu k’eyagrad ni yad gubin;
ma ga michigiyrad u lan e fayleng ko yam’ karmad.
14 Ma aram e Gag e som’on ni gu ra yog e sorok ngom
mu gog ni gur e kam gel.
15 A mu guy fare gamanman ni ba ga’ ni Behemoth;
I Gag e gu sunumiy, me Gag e gu sunumiyem.
Ma kay e pan ni bod ba garbaw,
16 mu sap nga feni famusow,
ga’ngin yang rok!
17 Pachan e ba k’iy ngalang ni bod ba ke gek’iy ni cedar,
ma ba famusow tungun ay.
18 Ma yil rok e bod gelngin e bronze,
ma ay e bod yu ley i duga’ ni wasey.
19 Ni ir e yima ngat ngak u fithik’
urngin e gamanman ni gu sunumiy!
Kemus ni en ni ir e Sunumeg e rayag ni gel ngak.
20 Pi burey nma fafel e gamanman ni malboch riy
e bay e pan riy ni ir e ggan rok.
21 Ma mol u tan e gek’iy ni bay rachangalen,
mma yan i mith nga fithik’ e uchel u lan e ma’ut.
22 Gek’iy ni bay rachangalen nge gek’iy ni willow ni bay u to’oben e lul’
e ke mang naun ngak ni be pi’ e tagalul’ ngak.
23 Der ma tamdag nga mirin e lul’ nib gel,
ra gireng e lul’ nib gel ngi i aw nga owchen ma be par nib gapas.
24 I mini’ e rayag rok ni nge ma’ewnag nge kol?
Ara mini’ e rayag rok ni nge ngongliy e wup nge l’eg p’ethungun?