17
Pi liyos rok Mikah
1 Immoy be’ nib mo’on ni Mikah fithingan, ni i par u Efraim ni go’ burey.
2 Me ga’ar ngak e chitiningin, “Nap’an nni iring be’ fa ragag nge ta’reb yang i silber rom, mag yibley e buch wa’athan nga daken e re moro’ro’ nem. Gu rung’ag ni mu rin’. Amsap, ba’aray fapi salpiy rog. I gag e cha’ ni gu fek.”
Me ga’ar e chitiningin, “Nge fal’eg SOMOL wa’atham, i gur fakag!”
3 Me fulweg fapi salpiy ngak e chitiningin. Me ga’ar e chitiningin, “Ngkug pi’ e pi silber ney ngak SOMOL, ya nge dabi aw fare buch wa’athan ngak fakag. Bay ni fanay ngab liyos ni gek’iy ni kan ing ko silber. Ere chiney e bay gu fulweg ngom fa yungi silber.”
4 Ma aram me sulweg fapi salpiy ngak e chitiningin. Me fek e chitiningin 200 ko fa yungi silber nge pi’ ngak be’ nma maruwel ko wasey, me ngongliy ba liyos riy, ni nongliy ko gek’iy me ing ko silber. Min tay ngalan e naun rok Mikah.
5 Re mo’on ney i Mikah e immoy tagil’ e meybil rok. I ngongliy boch e liyos nge ba efod, me mel’eg reb e pagel ni fak nge mang prist rok.
6 Ngiyal’ nem e dariy e pilung nu Israel; ere yug ra be’ ma be rin’ e tin ba’adag.
7 Ma ku ngiyal’nem ma immoy be’ nu Levi ni kab pagel ni i par ko fachi binaw nu Bethlehem u lan yu Judah.
8 Me chuw u Bethlehem ni be gay bang ni nge par riy. Ma nap’an ni be milekag, me yib ko naun rok Mikah ni bay u Efraim ni go’ burey.
9 Me fith Mikah ngak ni ga’ar, “U uw e ka mub riy?”
Me fulweg ni ga’ar, “I gag e gu be’ nu Levi u Bethlehem u lan yu Judah. Gu be sapnag bang ni nggu par riy.”
10 Me ga’ar Mikah, “Mu par rog. Mmang tafanow rog nge prist, mug ra pi’ ragag yang e silber ngom u reb e duw, nge boch e mad, nge ggan rom.”
11 Me pining fare Levi ni kab pagel e kefel’ ngay ni nge par rok Mikah nge bod bpagel ni fak.
12 Me turguy Mikah fare pagel ni nge mang prist rok, mi i par u tafen Mikah.
13 Me ga’ar Mikah, “Chiney e ke yag ngog be’ nu Levi ni nge mang prist rog, kugnang ni SOMOL e bayi fel’eg urngin ban’en nge fel’ ngog.”