17
Denen nge gechig ngak yu Judah
1 SOMOL e ga’ar, “Girdi’ nu Judah, denen romed e kan yoloy ko pen ni wasay; ma kan ker ngab p’ebgul e diamond nga lanin’med nge nga daken e pi tabthung ko pi altar romed.
2 Girdi’ rom e yad be meybil ko pi altar nge ngak fare ya’an Asherah ni kan suweg ngalang u to’oben gubin kaen e gek’iy nib galunglung nge daken p’ebgul e yochi burey
3 nge daken e pi burey ni gagang’ u lan e tafelfel’. Bay gu gagiyegnag e pi to’ogor romed ngar feked e fla’ab u pa’med nge machaf romed ni bochan gubin e denen ni ka mu rin’ed u daken tafenmed ni ga’ngin.
4 Bayi thor u pa’med fare binaw ni gu pi’ ngomed, ma bay gu gagiyeg nagmed ngu’um pigpigad ngak e pi to’ogor romed u lan ba nam ni dariy ban’en ni gimed manang u murung’agen, ni fan e damumuw rog e ke bod ba nifiy, ni bayi daramram ni dariy n’umngin nap’an.”
Boch e sabathin
5 SOMOL e ga’ar,
“Bay gu gechignag e en
nra pi’ keru’ ngog
kemang girdi’ e ke tay e pagan’ rok nga daken,
ni gelngin e girdi’ nra yim’ e bay rok.
6 Ir e bod rogon boch ke gek’iy u lan e ted,
nike tugul u daken e but’ nib fengfeng ni dariy yong’olen,
nib buday but’an ni dariy ban’en nra tugul riy.
Dariy ban’en ni bfel’ nra yib riy ngak.
7 “Machane gu ra towaathnag be’
ni gag e ke pagan’ ngog.
8 Ra bod bake gek’iy ni tugul u charen e lul’
ni pi’ likngin nga fithik’ e ran.
Ni darmayib e marus ngak u ngilan’ e yal’,
ni bochan yuwan ni be par nib galunglung;
dar ma magfan’ ko n’uw ni dakir aw;
yug be par ni bay e mak’uf riy.
9 “Mini’ e rayag ni nge nangfan lanyan’ e girdi’?
Dakriy yug reb e ban’en ni aram feni sasaliyab;
ke pag rogon feni m’ar ni dabki gol.
10 I Gag SOMOL e gu ma wurgiy lanin’uy
gu ma sikengnag gumircha’en e girdi’.
Rogon e par rok bagyad e aram rogon labgen ni gu ra pi’ ngak,
nib paluw nga rogon e ngongol rorad.”
11 Be’ ni be fek e salpiy u fithik’ e sasalap
e bod rogon ba arche ni bilig e tamango ni gathi ir e tay.
Ra yan i taw nga falngin e yafos rok me mul e faab rok u pa’,
ma tomuren e ir be’ ni dariy rogon kemus ni be’ nib balyang.
12 Tempel romad e bod ba tagil’ e pilung nib sorok
nib suwon u daken bburey nib tolang ni ka nap’an tobolngin e fayleng.
13 SOMOL, I gur e lagan’ rok yu Israel;
urngin e pi’in yad ra n’igem e yad ra tamra’.
Yad ra m’ay nga bang ni bod fithngey nni yoloy nga daken e fiyath,
ni bochan e ka ra furyed gur, ni gur SOMOL,
ni fare alublub nib machalbog.
Jeremiah ni ning e Ayuw ngak SOMOL
14 SOMOL, mu gol nigeg ngarug gol; ma ga lageg nggu par ni dabi buch ban’en rog. Ri gur e gu ma pining e sorok ngom!
15 Be ga’ar e girdi’ ngog, “Bu uw fapi buch wa’athan ni yog SOMOL nra rin’ ngodad? Ere mog ngak nge rin’ e pin’em e chiney!”
16 Machane SOMOL, gathi gu be towasar ngom ni ngam girengiy e riya’ nga dakenrad; da gu finey bangiyal’ ni ngar gafgow gad. SOMOL, I gur e gamnang e ran’ey, gamnang ko mang e u gog.
17 Dab mmang marus ngog; I gur e gil’ e pagan’ rog ko ngiyal’ nike yib e oloboch.
18 Mu tamra’nag e pi’in yad be gafgow nageg, ma ga faleg riy nga bang, SOMOL. Mu suguyrad ko marus, machane dab mu k’ar marus ngog. Mu girengiy e riya’ nga puluwrad nga mu tet’arad ngar yoch yang gad.
Tay fan e Sabbath
19 I SOMOL e ga’ar ngog, “Jeremiah, mman ngam weliy e thin rog ko fare Garog ko Girdi’, nma yib e pilung nu Judah riy ngalan e binaw ma yad ma sul riy nga wuru’; ma aram mu ku mman ko tin kabay e garog u Jerusalem.
20 Mog ngak e pilung nge urngin e girdi’ nu Judah nge gubin e pi’in yad ma par u Jerusalem ngranod nga langgin e pi garog nem ngar motoyilgad ko mang e nggog.
21 Mog ngorad ni fa’anra ba t’uf rorad e yafos rorad, ma thingar dabra feked ban’en nib tomal ko rofen ni Sabbath; ma thingar dabra feked ban’en nga langgin fapi garog nu Jerusalem
22 ara rifeked ban’en nga wuru’ e naun rorad e rofen ni Sabbath. Thangri dabra maruwel gad e rofen ni Sabbath; thingar ra ted ni reb e rran nib thothup, ni bod ni gu ta’chiylen ko pi chitamangirad.
23 Pi chitamangirad e da ur motoyilgad ngog fa ra tiyan’rad ko tin gog. Ya ra pig gad nge gel lanin’rad; ni da kur folgad rog ara rafiled ban’en rog.
24 “Mog ko pi girdi’ ney ni thingar ra ted gubin e tin ku gu ta’chiylen u gil’. Thangri dabra feked ban’en nib tomal ngalan e garog ko re binaw ney e rofen ni Sabbath. Thingar ted fan fare Sabbath ni bod reb e rran nib thothup ma thangri dab rin’ed ba maruwel.
25 Ma aram e pi pilung rorad nge pifak e pilung e bay rabad ngalan e garog nu Jerusalem ni bay fare gelngin e pilung rorad ni immoy rok David. Ra’un e girdi’ nu Judah nge yu Jerusalem ngorad, yad ra yan u lan e chariot nge daken e pi os, ma fare binaw nu Jerusalem e bay i par ni urngin ngiyal’ nike suguy e girdi’.
26 Girdi’ e yad ra yib ko yochi binaw nu Judah nge boch e binaw nib liyeg yu Jerusalem; bay rabad ko gin nib milsuwon ngak Benjamin, ngu enggin e pi yochi burey, nge pi burey ni totolang, nge yimuch u Judah. Bay ra feked i yib ko Tempel rog e maligach ni mo’oruf, nge grain nge incense nib dachug e maligach ngay ni fan ko ogmagaer.
27 Machane thingar ra folgad rog ngar tedfan e Sabbath ni bod borran nib thothup. Thangri dabra feked ban’en nib tomal ngalan e pi garog nu Jerusalem e rofen nem, ma fa’an yad ra rin’, ma bay gu urfiy e pi garog nu Jerusalem nem. Bayi urfiy e nifiy e pi tafen e pilung u Jerusalem nga but’, ni dariy be’ nrayag ni nge thang.”