31
Sul ni bayi tay piyu Israel ko nam rorad
1 Be ga’ar SOMOL, “Bay ba ngiyal’ ni be yib ni bay gu par ni kugmang Got rok urngin e pi ganong nu Israel, ma bay ra manged girdi’eg.
2 Pi’in rmageygad ndar m’ad u daken e ted e gu runguyrad. Nap’an e finey yu Israel ni gomang e ra toffangad,
3 mu gu par u palog nggu m’ug ngorad. Gimed e girdi’ nu Israel, gubin ngiyal’ ni ug par ni gimed ba t’uf rog, ere bay ug par ni gu be dag ngomed e t’ufeg rog ni dabimus.
4 Bay gu fal’eg rogomed bayay. Ma aram e bay ku mu sulod bayay ngam feked e pi talin e musik romed ni tambourine ngu’um churu’gad ni ka mu felfelan’gad.
5 Ma aram e bay ku mu yunged yungi milay’ ni grapes u daken e flang nu Samaria, ma pi’in bay ra yunged e bay ra ked wom’ngin.
6 Er rogon, bay ba ngiyal’ ni bayi taw ngay me pong e damit u daken e flang u Efraim ni be lungurad, ‘Mired! Ngdarod nga talang nga Zion, ngak SOMOL ni ir e Got rodad.’ ”
7 Be ga’ar SOMOL,
“Mu tang niged e felfelan’ ni fan ngak yu Israel,
ni ir fare nam nib th’abi sorok u fithik’ urngin e pi nam.
Mon’ed e tang romed ni gimed be pining e sorok ngak ni nge lungumed,
‘I SOMOL e ke ayuweg e girdi’ rok,
ma pi’in ni magay e lagrad nde buch ban’en rorad.’
8 Bay gu fekrad u lel’och ngaray,
mu gu kunuyrad u tungun e fayleng i yib.
Pi’in malmit nge pi’in mugutgut e bay ra uned ngorad ngarbad,
nge ppin diyen nge tin ke chugur ni ngar gargel gad.
Bay ra sulod ni kar manged ba nam ni ba ga’.
9 Girdi’ rog e bay ra sulod ni yad be yor,
bay gu fekrad i yib ni yad be meybil.
Bay gu pow’iyrad nga yu pa’ i lul’,
mu gu fekrad u daken ba pa’ i kanawo’ nib pach ndabi tun ayrad riy.
Gu bod ba matam ngak piyu Israel,
ni Efraim e ir e bin nganni’ e pumo’on ni fakag.”
10 Be ga’ar SOMOL,
“Mmotoyil gad e pi nam ngog
mi gimed weliy e thin rog ko pi nam nib orel nib liyeg e day.
I gag e gu wereg piyu Israel i yan, machane bay gu kunuyrad,
mu gu matanagiyrad ni bod ba tagafaliy e saf ni be matanagiy e saf rok.
11 Kug biyuliy piyu Israel,
ma ku gu ayuwegrad u pa’ ba nam nib gel gelngin.
12 Bay rabad ngar tang niged e felfelan’ u daken e burey ni Zion,
miyad felfelan’ ko pi tow’ath rog ngorad,
ni grain nge wayin nge gapgep ni olive,
nge saf nge garbaw.
Bay ra pired ni yad bod bangi milay’ ni bfel’ rogon ni yibe tarannag,
ma aram e bayi yag ngorad gubin e tin ba t’uf rorad.
13 Ma pi’in nrugod e bay ur churu’ gad ni kar felfelan’ gad,
ma pumo’on, ni tin nib pagel nge tin ke pilibthir, e bay ra felfelan’ gad.
Bay gu fal’eg lanin’rad mu gu pingeg e meyor ni yad be tay nge ngal’ ni felfelan’,
ma kireban’ ni yad be tay e bay gu pingeg ko felfelan’.
14 Ma bay gu suguy e pi prist ko tin th’abi fel’ e ggan,
mu gu chum’ernag e girdi’ rog ko urngin e tin bt’uf rorad.
I Gag SOMOL e kugog e pi thin ney.”
Runguy rok SOMOL ngak piyu Israel
15 Be ga’ar SOMOL,
“Ka ni rung’ag ba lam u lan yu Ramah,
ni laman e meyor nib gel.
I Rachel e be yornag pifak;
ndabiyag i fal’eg laniyan’,
ni bochan e daki moy pifak.
16 Mu talgad ko meyor,
ngam n’iged e lu’ u owchemed.
Urngin e tin ka mu ngongliyed ni fan ngak pifakmed
e dabiyag ni nge yan ndab ni fulweg labgen;
bay ra sulod ngar chuwgad ko nam rok e pi to’ogor.
17 Tin ni bfel’ ni bay yib ngom e kabay nga m’on;
pi bitir rom e bayi sul ngom nga tabinaw.
I Gag SOMOL e kugog e pi thin ney.
18 “Ku gu rung’ag laman e girdi’ nu Israel ni be lungurad u fithik’ e kireban’,
‘SOMOL, ug moyed ni gamad bod ba gamanman ni dawor i mangmor,
machane ka mu fil rogon ngomad ni nggu folgad.
Mu fulwegmad;
ku gu fal’egged rogomad ni nggu sulod ngom,
I gur SOMOL, ni gur e Got romad.
19 Gu pi’ed keru’mad ngom,
machane de n’uw nap’an me pigan’mad ni nggu sulod ngom.
U tomuren ni ka mu gechig nagmad,
e gup’ed owchemad nga but’ u fithik’ e kireban’.
Ya ku gu tamra’gad, nike m’ay famad,
ya gu denengad ko ngiyal’ ni gamad bbitir.’
20 “Israel, i gur fakag nri gab t’uf rog,
nri gur e th’abi t’uf rog.
Gubin ngiyal’ ni gu ra yog fithingam
mu gu leam nigem nri gab t’uf rog.
Lanin’ug e be un ngom;
ri bay gu runguyem.
21 Mu reg yungi plang u kanawo’ nge par ni pow ko kanawo’;
ma ga sul ngam gay fare kanawo’ ni ka mu pag.
Gimed e girdi’ nu Israel, e ngam sulod,
mu sulod ko fapi binaw ni kam paged.
22 Uw n’umngin nap’an ni ngam pired ni gimed be toruruw, gimed e pi girdi’ nir ndariy e michean’ romed?
I Gag SOMOL e ku gu ngongliy ban’en nib be’ech mab thil nga daken e fayleng:
bod feni thil be’ ni bpin ni be yoror rok be’ nib pumo’on ni nge dabi buch ban’en rok.”
Fel’ rogon ni bayi tay e girdi’ rok Got
23 I SOMOL ni Gubin ma Rayag Rok, ni Got rok piyu Israel e be ga’ar, “Nap’an ni bay gu fulweg piyu Israel ko nam rorad, ma aram e bay rogned bayay u daken e nam nu Judah ngu lan e yochi binaw u rom ni bayi lungurad,
‘I SOMOL e nge fal’eg wa’athan fare burey nu Jerusalem nib thothup,
ni fa gin nib thothup nma par riy.’
24 Girdi’ e bay ra pired u Judah ngu lan urngin e pi binaw ni bay riy, ni bay e pi’in be woldug riy, nge pi’in ma gafaliy e saf ni bay yu ran’ i saf ni fakrad.
25 Bay gu pasignag laniyan’ e pi’in ke aw porowrad, ma pi’in kar waer gad ni bochan e bilig e bay gu chum’er nagrad ko ggan.
26 Ma aram e bayi be’ me ga’ar, ‘Gu mol ma kug od nike ba’udan’ug.’
27 “I Gag SOMOL e gu be yog ni bay i taw nga bangiyal’ mu gu suguy e nam nu Israel ngu Judah ko girdi’ nge gamanman.
28 Ma rogon ni gu tayan’ug i pug ngalang, mu gu buthug, mu gu thirifrad u but’, mu gu kirebnag, mu ggiliwnag, e aram rogon ni bay gu yung mu gu sul nggu fal’eg rogon.
29 Nap’an nra yan i taw ko ngiyal’nem, ma dabki ga’ar e girdi’,
‘Pi matam e kar unumed e grape ni mugunin,
ma pifakrad e ke m’urm’ur nguwelrad.’
30 Ya en nra unum e grapes nib mugunin e ra m’urm’ur nguwelen; ma ra be’ ma bay yim’ ni bochan e denen rok.”
31 I SOMOL e be ga’ar, “Bayi taw nga bangiyal’ mu gu ngongliy reb e m’ag nib be’ech u thilmad e girdi’ nu Israel nge girdi’ nu Judah.
32 Dabi bod fare m’ag ni gu ngongliy u thilmad pi chitamangirad ko fa ngiyal’nem ni gu kol pa’rad nggu fekrad nga wuru’ yu Egypt. Ni yug aram rogon ni bod ni gag figirngirad, ma dar ted fare m’ag u gil’.
33 Ra taw ko ngiyal’nem, ma ba’aray e bin be’ech e m’ag ni bay gu ngongliy u thilmad e girdi’ nu Israel: bay gu tay e motochiyel rog nga lanin’rad mu gu yoloy ngalan ngorongorrad. Bay gu mang Got rorad, ma bay ra manged girdi’ rog.
34 Ma dakuriy bagayad ni nge machibnag bagayad, ma dakuriy bagayad ni nge weliy e thin ngak bagayad ni nge ga’ar, ‘Ngam nang SOMOL.’ Yad gubin ni bay ra nanged gag ni mus rok e en nth’abi sobut’ nge mada’ ngak e en nth’abi tolang rorad. Bay gu n’ag fan e denen rorad u wun’ug ma dab ku gu leamnag e kireb ni kar ngongliyed. I Gag SOMOL e kugog e pi thin ney.”
35 I SOMOL e ke pi’ e yal’ ni nge pi’ e tamilang ni rran,
ma ke pi’ e pul nge pi t’uf ni nge gal nnep’.
I ir e pug e day nge chub lingan;
i SOMOL ni Gubin ma Rayag Rok fithingan.
36 Ke micheg nn’umngin nap’an ni ka be par e tin ni sunmiy u gil’,
e aram n’umngin nap’an ni be par fare nam nu Israel.
37 Fa’an mang e bay reb e rran nrayag ni ngan foleg lanelang,
mi ni lekag e pi def u enggin e fayleng,
ma aram e rofen nra n’ag e girdi’ nu Israel
ni bochan urngin e tin kar rin’ed.
I SOMOL e keyog e pi thin ney.
38 Be ga’ar SOMOL, “Bayi taw nga bangiyal’ min ngongliy rogon fare binaw ni polo’ ni fan ngog, ni ngan tabab ko fare wulyang nu Hananel ni bay ko ngal ko fare garog ni Garog ko Tabthung fithingan.
39 Ma mathil e bay yan u rom u ba’ ni ngal nge yan ko burey nu Gareb, me cheal u rom nga Goah.
40 Ma fare loway ni ga’ngin ni yima yin’ e yam’ ngay nge dow, nge urngin yang e ted ni bay nga talang ko lul’ ni Kidron nge yan i mada’ ko fare garog ni Garog ko Os fithingan ko ngek e bayi par nib thothup ni fan ngog. Ma re binaw nem e gathi bay kun buthug e naun riy ara ni kirebnag bayay.”