35
Jeremiah nge fare ke girdi’ ni Rekab
Nap’an ni ba pilung Jehoyakim nib mo’on ni fak Josiah u Judah, me ga’ar SOMOL ngog, “Man ngak girdi’en fare ke girdi’ ni Rekab ngam non ngorad. Ma aram ma ga fekrad i yib ngalan fapi senggil ko Tempel ngam pi’ boch e wayin ngorad.” Aram mug fek ga’ngin e re ke girdi’ nem ni Rekab — i Jaazaniah (nib mo’on ni fak yug rebe Jeremiah, nib mo’on ni fak Habazziniah) nge gubin pi walagen ni pumo’on nge pifakrad ni pumo’on — mug fekrad I yan nga Tempel. Gu fekrad ngalan fare senggil rok pi gachelpen fare profet i Hanan nib mo’on ni fak Igdaliah. Re senggil ney e bay nga daken e birok Maaseyah e senggil nib mo’on ni fak Shallum, ni be’ nib tolang u Tempel, ma bchugur e re senggil ney ko fa tinem e senggil rok e tin kabay e tolang u rom. Ma aram mu gu tay boch e kap nge yu raba’ i dabiy nib sug ko wayin nga sabal ko fapi Rekab, mug ga’ar ngorad, “Mu unumed boch e wayin.”
Machane miyad ga’ar, “Da gur unumed e wayin. Ya chitamangimad i Jonadab nib mo’on ni fak Rekab e yog ngomad ni dariy bagmad fa reb e pi’in owchamad ni ra unum bu uw i wayin. Miki yog ngomad ni dab gu dumow naun gad ara gu wolduggad ko fare nam ara gu yunged e grape ara gu chuw’iyed. I ta’chiylen ngomad ni gubin ngiyal’ ni tent e ngu’ug pired riy, ya nge yag ni gu magachgad u daken e re but’ ney ni gin gamad be par riy ni bod e milekag. Gu folgad u gubin fapi gafal ni pi’ Jonadab ngomad. Gamad e dagur unumed e wayin, ma ku arrogon pi le’engimad, nge pifakmad ni pumo’on nge ppin. 9-10 Dagur dumow naun gad ni nggu tafaned — gamad ma par u tent— ma dariy tafi’imad grape, nge pi flang romad ara grain. Kug folgad u gubin e tin ni yog Jonadab ni ga’ romad kakrom ni nggu rin’ed. 11 Ya nap’an ni kol Nebukadnezzar ni Pilung fare binaw, mu gu duwgiliyed ni ngugbad nga Jerusalem nggu paloggad ko salthaw nu Babylon ngu Syria. Aram fan ni gamad be par u Jerusalem.”
12-13 Aram e fare SOMOL ni Gubin ma Rayag Rok, ni Got nu Israel, e yog ngog ni nge lungug ko girdi’ nu Judah ngu Jerusalem, “I Gag SOMOL e gu be fithmed ko mangfan dabumed ni ngam motoyilgad ngog ma gimed fol ko thin rog. 14 Pi’in owchen Jonadab e ra folgad ko n’en nni ta’chiylen ni dab ni unum e wayin, ke mada ko daba’ ni dariy bagyad nma unum e wayin. Ma gag e yug guma non ngomed, ma damur folgad rog. 15 Kug par ni yuggu be l’oeg e pi profet ni tapigpig rog ngomed, ngu u roged ngomed ni ngam paged ngongolmed ni kireb ngam rin’ed e n’en nib mat’aw. Yad be ginangmed ni dab kum tedfan mi gimed pigpig nga yug boch e got, ya nge yag ni ngkum pired u daken fare nam ni kug pi’ ngomed nge pi chitamangimed. Machane damur motoyilgad ngog ara mu tiyan’med ko tin kugog. 16 Pi’in owchen Jonadab e ra folgad ko n’en ni tay e pi chitamangirad kakrom chiylen ngorad, machane gimed e damur folgad rog. 17 Ere chiney, I Gag, fare SOMOL ni Gubin ma Rayag Rok, ni Got rok yu Israel, e bay gu fek nga daken e girdi’ nu Judah ngu Jerusalem gubin fapi riya’ ni kug micheg. Bay gu rin’ ni aray rogon ni bochan e damur motoyilgad ko ngiyal’ ni gu be non ngomed, ma damur fulweged lungug ko ngiyal’ ni gu be piningmed.”
18 Ma aram mu gog ko fare ke girdi’ ni Rekab ni SOMOL ni Gubin ma Rayag Rok, ni Got rok yu Israel, e ke ga’ar, “Gimed e kam folgad ko n’en ni tay Jonadab ni chitamangimed chiylen ngomed; ma gimed be falwok u gubin e motochiyel rok, ma gubin e tin ni tay chiylen ngomed e go’ ka mu rin’ed. 19 Ere gag, fare SOMOL ni Gubin ma Rayag Rok, ni fare Got rok yu Israel, e gu micheg ni Jonadab nib mo’on ni fak Rekab e gubin ngiyal’ ma bay reb e pumo’on ni owchen ni ir e nge pigpig ngog.”