43
Jeremiah nni Fek nga Egypt
1 Kug mu’ i yog ko girdi’ gubin e tin ni l’oegeg SOMOL ni Got rorad ni nggog ngorad.
2 Ma aram e Azariah nib mo’on ni fak Hoshayah nge Johanan nib mo’on ni fak Kareah nge gubin e girdi’ nib tolangan’rad e ra ga’argad ngog, “Ga be ban. I SOMOL ni Got romad e de l’oegem ni ngamog ngomad ni dab gu warod gu pired nga Egypt.
3 Baruk nib mo’on ni fak Neriah e ke k’aring lanin’um ni ngam togopluw ngomad, ya nge gel piyu Babylon ngomad nrayag ni yad ra li’mad fa ra feked gamad ni kalbus nga Babylon.”
4 Ere Johanan nge fapi tolang ko salthaw nge fapi girdi’ e dar folgad ko tin ke tay SOMOL chiylen ni ngar pired u lan fare binaw nu Judah.
5 Ma aram me fek Johanan nge gubin fapi tolang ko salthaw gubin e girdi’ ni magach u Judah nga Egypt, nib mu’un gubin e girdi’ ni urmed ko fapi nam nni weregrad riy ni kar sulod nga Judah:
6 pi pumo’on, ppin, bitir, nge pi ppin ni fak fare pilung. Ra feked gubin e pi’in ni tay Nebuzaradan ni fare tolang ko salthaw nga tan pa’ i Gedaliah, ni gub mu’un ngay nge Baruk.
7 Dar folgad ko tin ke tay SOMOL chiylen miyad yan ngalan yu Egypt ngar tawgad ko fare binaw nu Tahpanhes.
8 U rom e ga’ar SOMOL riy ngog,
9 “Mu fek boch e malang nib ga’ ngam k’eyag u tan malngen e kanawo’ u mit e garog ko naun ko am u lan e re binaw ney, mu guy rogon nge guy boch e girdi’ nu Israel e n’en ni ga be rin’.
10 Ma aram ma gog ngorad ni Gag, fare SOMOL ni Gubin ma Rayag Rok, ni fare Got rok yu Israel, e bay gu fek e tapigpig rog i Nebukadnezzar ni Pilung u Babylon ngaray, ni ir e bayi tay e chiya rok nga daken e pi malang ney ni kam k’eyag, ma bay i garareg e tent ko pilung u daken.
11 Bayib Nebukadnezzar nge gel ngak yu Egypt. Girdi’ ni kan bucheg wa’athan ni ngarmad’ ko liliy e ireram e n’en ni yad ra yim’ riy, pi’in ni kan turguy ni ngan fekrad nga bang ni kalbus e yira fekrad, ma pi’in ni kan turguy ni ngarmad’ u fithik’ e mael e yira li’rad u fithik’ e mael.
12 Bay gup’ e nifiy ko tempel rok fapi got nu Egypt, ma fare pilung nu Babylon e reb e ra urfiy fapi got fa reb e ra chuweg fapi got. Bod ba tagafal saf nra feked e mad rorad nike chuw e yanuk riy, e aram rogon fare pilung nu Babylon nra pug fare but’ nu Egypt ngalang nike be’ech ma aram me yan nike gel.
13 Bay i kirebnag fapi malang ni gang’ ni yima meybil ngay u Heliopolis u lan yu Egypt me urfiy nga but’ e pi tempel ko pi got nu Egypt.”