12
Fa gal Pilung ni Gel Moses Ngorow
1 Girdi’ nu Israel e ka’ ra gelgad kar tafned fare gi binaw ni bay ko ngek u Jordan, ni tabab ko loway nu Arnon me yan nga talang ko loway ni Jordan me yan i mus ko Burey ni Hermon. Ra gelgad ngak l’agruw e pilung.
2 Reb fa gal pilung e Sihon, ni ba Amorite ni ir e ma gagiyeg u Heshbon. Gil’ilungun e bmu’un baley yu Gilead ngay: ni tabab u Aroer (ni bay u thathren fare Loway ni Arnon) me yan ko fare binaw ni bay u lukngun fare loway nge mada’ ko lul’ ni Jabbok, ni aram e mathil rok yu Ammon,
3 mu’un fare Loway ni Jordan ngay ni tabab ko lel’och ko Lipach nu Galilee nge mada’ nga Beth Jeshimoth (bay ko ngek ko Dead Sea) me yan u rom nga enggin e Burey ni Pisgah.
4 Ku ra gelgad ngak Og ni Pilung nu Bashan, ni ir reb e tin tomur ko pi Refaim ni magach; ni i gagiyegnag yu Ashtaroth nge yu Edrei.
5 Gil’ilungun e bmu’un fare Burey ni Hermon ngay, nge Salekah, nge ga’ngin yu Bashan me yan nge taw ko mathil nu Geshur ngu Maakah, ma ku arita’ baley yu Gilead, me yan nge mada nga tafen i Sihon ni Pilung nu Heshbon.
6 Gali pilung ney e gel Moses nge girdi’ nu Israel ngorow. Me Moses ni tapigpig rok SOMOL e pi’ e binaw rorow ngak fapi ganong rok Ruben nge Gad nge ngak baley ko fare ganong rok Manasseh ni ngar tafned.
Fapi Pilung ni Gel Joshua Ngorad
7 Joshua nge girdi’ nu Israel e ra gelgad ngak urngin e pilung u langgin fare gi nug ni bay ko ngal u Jordan, ni tabab u Baalgad u lan e loway nu Lebanon me yan nge mada’ ko fare Burey ni Halak ni bay ngalan e yimuch nib chugur nga Edom. Me f’oth Joshua e re gi binaw ney u daken fapi ganong nge pi’ ngorad ni nge par ni taferad.
8 Re gin’ey e mu’un fare binaw ngay ni go’ burey, nge enggin e pi burey ko ngal, nge fare Loway ni Jordan nge enggin e pi burey riy, nge sigre’en e burey ko ngek, nge fare nam nib mlik’ ni bay ko yimuch. Re gi but’ ney e immoy ni tafen piyu Hittite, nge Amorite, nge Kanaanite, nge Perizzite, nge Hivite, nge Jebusite.
9 Ma fapi girdi’ nu Israel e ra gelgad ngak e pi pilung ko tin ba’aray e binaw Jeriko, Ai (nib chugur nga Bethel),
10 Jerusalem, Hebron,
11 Jarmuth, Lakish,
12 Eglon, Gezer,
13 Debir, Geder,
14 Hormah, Arad,
15 Libnah, Adullam,
16 Makkedah, Bethel,
17 Tappuah, Hefer,
18 Afek, Lasharon,
19 Madon, Hazor,
20 Shimron Meron, Akshaf,
21 Taanak, Megiddo,
22 Kedesh, Jokneam (ni bay u Karmel),
23 Dor (ni bay u dap’eday), Goiim (ni bay u Galilee),
24 ngu Tirzah — guyey nge ta’reb e pilung u gubin.