4
Elisa ni ayuweg be’ ni bpin nike yim’ figirngin
Be’ ni bpin nike yim’ figirngin ni immoy ni ir reb i girdi’en ba ulung i profet e yan ngak Elisa me ga’ar ngak, “Siro’, ke yim’ figirngig! Ma bod ni gamnang ni ir be’ nib pumo’on ni bay madgun Got u wan’, machane chiney e keb be’ nib pumo’on ni bay e salpiy ni malfith rok figirngig ngak ni nge fek l’agruw i pagel ni fakag ngar mangew sib ni nge yan nga puluwon fare malfith.”
Me fith Elisa fare pin, ni ga’ar, “Mang e thingar gu rin’ ngom? Mog ngog, komang e bay u tabnaw rom?”
Me fulweg, ni ga’ar, “Ri dariy ban’en ni bay, ka ri mus ni bochi malor i gapgep ni olive.”
Me yog Elisa ngak, ni ga’ar, “Mman ngak e pi’in ni gimed ba buguliyoror ngam ning e malor ndariy ban’en riy ngorad ni urngin nrayag ni ngar pi’ed ngom. Ma aram magyan ngak fagal pagel ni fakam ngalan e naun, ngam ninged e mab, migimed tabab i ngal’weg e gapgep nga langgin fapi malor. Yug nap’an nra sug reb mi gimed fal nga bang.”
Ma aram me yan fare pin nga langgin e naun rok ni yad fagal pagel ni fak mar ninged e mab, me fek fachi malor i gapgep ni olive, me pu’og e gapgep nga langgin fapi malor ni be pi’ fagal pagel ni fak ngak. Nap’an ni kar suguyed urngin fapi malor, me fith ko kabay reb fa dakuriy. Me fulweg bagyow fagali pagel ni fak ni ga’ar, “Ireyer e bin tomur riy.” Me tal fare gapgep ni olive ndaki map’. Me sul fare pin ngak Elisa ni profet, me ga’ar Elisa ngak, “Mu pi’ ni chuway’ fapi gapgep ni olive mag thang urngin e malfith rom, ma salpiy ni ku ra aw e gimed ra gaman fagal pagel ni fakam riy ko par romed e chiney i yane ngaram.”
Elisa nge fare pin nu Shunem
Me reb e rran me yan Elisa nga Shunem. Me yib be’ ni bpin nib tolang i pining nge yib nga tafen nge un ko abich, ma aram ma gubin ngiyal’ nra be milekag Elisa ni taw ngaram me tal ko re tabinaw nem nge un ko abich. Me ga’ar fare pin ngak figirngin, “Kari mich u wun’ug ni fare mo’on ni yugu ma yib ngaray e ir reb e girdi’ nib thothup. 10 Ngad ngongliyew reb e senggil nib achig nga daken e chigiy ko naun rodow ngad tew bang e chob ngay, nge ba tebel, nge reb e chiya, nge reb e magal, ya ngiyal’ nra ke yib ngodow ma rayag ni nge yan i par ngay.”
11 Me reb e rran me sul Elisa nga Shunem me yan ngalang ko fare senggil rok nge toffan. 12 Me ga’ar ngak Gehazi ni tapigpig rok, “Mpining fare pin.” Ma fa’ani yib ngak Elisa 13 me ga’ar Elisa ngak Gehazi, “Mfith ngak ko bay ban’en nrayag ni gu rin’ ni fan ngak, ya ri ba ga’ e magaer nike tay rodow nike ayuwegdow ko tin nge yag ngodow. Sana bay ban’en ni ba’adag ni nggu wenignag ngak e en ni pilung ara ngak e en ni pilungen e salthaw ni fan ngak.”
Me fulweg fare pin ni ga’ar, “Dariy, ya gu be par u fithik’ e girdi’ rog ni bfel’ rogog.”
14 Ma nap’an nike yan fare pin me ga’ar Elisa ngak Gehazi, “Ere be mang e rayag ni nggu ayuweg riy?”
Me fulweg Gehazi ni ga’ar, “Dariy reb e pagel ni fak, ma ke pilibthir e pumo’on rok.”
15 Me ga’ar Elisa, “Mu pining nge yib ngaray.” Me yib fare pin nge yib i sak’iy nga langan e mab, 16 me ga’ar Elisa ngak, “Ngiyal’ney ko binem e duw e bay mu dibey bochi pagel ni fakam.”
Me ga’ar fare pin, “Wenig ngom, dab mu ban nigeg, ya gur e girdi’ rok Got.”
17 Machane fa’ani taw ko ngiyal’ ni yog Elisa ngak me gargelnag bochi pagel.
18 Me boch e duw nga tomuren ko ngiyal’ ni yima fek wom’ngin e woldug ngan ayuweg nga naun me yan fare tir ngak e chitamngin ni bay u milay’ ni yad boch e girdi’ ni yad be t’ar wom’ngin e woldug. 19 Ma yigi puw fare tir me yor ngak e chitamngin ni ga’ar, “Be amith lolugeg! Be amith lolugeg!”
Me yog e chitamngin ngak ba tapigpig ni ga’ar, “Mfek e re tir ney i yan ngak e chitiningin.” 20 Me fek i yan ngak e chitiningin; me par fachi pagel u ay e chitiningin nike dibey nge mada’ ko misiw’, me yim’. 21 Me fek fare tir i yan ngalang nga senggil rok Elisa, me tay nga chob me ning e mab ngak me yan. 22 Me pining fare pin e pumo’on rok me ga’ar ngak, “Mpi’ reb fapi tapigpig ngog nge reb e dongki, ya thingar gu wan gguy Elisa ni profet, ma dabi n’uw nap’an mu gu sul.”
23 Me ga’ar fare pumo’on rok ngak, “Mangfan ni ngari mman e daba’? Ya gathi daba’ faram e Sabbath ara Madnom ko M’ug e Pul.”*
Me fulweg fare pin ni ga’ar, “Dariy fan.” 24 Me yog ni ngan fal’eg rogon ba dongki nge af nga daken, me ga’ar ngak fare tapigpig, “Mmannag e dongki nrogon nrayag ni nge yan nib pey, ma dab mu sowathnag nge mada’ ko ngiyal’ ni bay fini gog ngom.” 25 Me yan ko Burey ni Karmel fithingan ko gin bay Elisa riy.
Me changar Elisa me guy fare pin ni kab orel ni be yib, me ga’ar ngak Gehazi ni tapigpig rok, “Mu sap, ke yib fare pin nu Shunem! 26 Mu gur nigem ngak nga mu nang salpen, nge salpen e pumo’on rok nge fachi pagel ni fakrow.”
Me ga’ar fare pin ngak Gehazi, “Dariy ban’en nike buch.” 27 Ma fa’ani yib ngak Elisa me yib i paraw nga but’ me kol rifrifen ay. Me yib Gehazi ni nge therbeg fare pin nga orel, machane me ga’ar Elisa, “Mfan rok e cha’nir. Damur guy ni kari kireban’? Ma dariy ban’en nike yog SOMOL ngog u murung’agen e tin ke buch rok.”
28 Me ga’ar fare pin ngak Elisa, “Siro’ ngom, i gag e gu ning ngom ni nggu fakay bochi pagel? Gathi gur faram e gog ngom ndab mu ban nigeg?”
29 Me ga’ar Elisa ngak Gehazi, “Mfek e sog rog ngam gur nigem ngam man. Dab mu tal rok be’ ni gimew ra mada’, ma dab mu fulweg lungun e en nra non ngom. Mman ndab mu tal ngam taw ko naun ma ga fal e sog rog nga daken fare tir.”
30 Me ga’ar fare pin ngak Elisa, “Rogon feni riyul’ ni gub yul’yul’ ngak SOMOL ni be par nib fos nge gur e erfeni dab gu pagem!” Ma aram me un Elisa ngak fare pin ngar sulow. 31 Ma ke m’on Gehazi rorow ke yan i fal fare ley i sog nga daken fare tir, machane de yan laman fare tir ara mithmith. Me sul Gehazi ni nge yan i yog ngak Elisa ni fare tir e dawori od.
32 Ma fa’ani taw Elisa me yan ni go ir ngalan fare senggil rok me guy fachi pagel ni bay u chob nib yam’. 33 Me ning e mab me meybil ngak SOMOL. 34 Me palpal nga daken fare tir nge tay l’ugun nge owchen nge pa’, nga l’ugun nge owchen nge pa’ fare tir. Me par ni aram rogon u daken fare tir me gowel dow fachi tir i yan. 35 Me suwon Elisa nge yan u lan fare senggil i yan, me sul ngki yan i palpal nga daken fare tir bayay. Me wa’angis fare tir ni medlip yay me pithig owchen. 36 Me pining Elisa Gehazi me yog ngak ni nge pining e chitiningin fare tir. Ma fa’ani yib fare pin me ga’ar Elisa ngak, “Ba’aray fakam.” 37 Me pag ir nga but’ u to’oben rifrifen ay Elisa nike math owchen nga daken e faraf; me fek fachi pagel ni fak nge yan.
L’agruw e maang’ang nki m’ug
38 Bayay ni yib e uyngol u ga’ngin yang e re binaw nem, me sul Elisa nga Gilgal. Ngiyal’ ni be skulnag ba ulung i profet, me yog ko tapigpig rok ni nge tay ba th’ib nib ga’ nga daken e nifiy nge ngongliy e stew ni garad. 39 Me yan bagyad nga daken e yungi flang i yan ni nge fek boch e herb. Me pir’eg bmit e pan nma gararaw u but’ me fek boch u wom’ngin ni tin nra taw rok. Me fek i yib nge yib i theth’ab nga fithik’ fare stew, ndenang ko bmit i mang e pin’em. 40 Ma aram minib ni ngal’weg fare stew ni nge kay fapi pumo’on, ma yugu nap’an e rri’ed lamen miyad non nib tomgin ngak Elisa nra ga’argad, “Ba yub!” — ma dakiyag i kay rorad. 41 Me ning Elisa boche grain ni kani bilbilig ni ngan pi’ ngak, me yin’ ngalan fare th’ib, me ga’ar, “Ngani ngal’weg boch e stew nga pilet ko fapi pumo’on.” Ma dakriy ban’en ni kab buch riy.
42 Ma bayay me yib be’ nib mo’on u Baal Shalishah, nike fek i yib ngak Elisa rliw’ i flowa ni lof, nni ngongliy ko tin som’on e barley nt’ar e re duw i n’em, nge ba thum i grain ni kafinni th’ab ni kab kak’ling. Me yog Elisa ngak e tapigpig rok ni nge durwi’iy fare ulung i profet ngay, 43 machane me fulweg fare tapigpig ni ga’ar, “Ga be leamnag mra gaman e re ra’ay i pumo’on ney riy?”
Me fulweg Elisa ni ga’ar, “Mpi’ ngorad ngar ked, ya SOMOL e yog ni bay ra ked ma ku ra aw boch riy.” 44 Ma aram me fal’eg fare tapigpig e ggan rorad nge pi’, ma ri bod rogon ni yog SOMOL, ra abichgad ni yad gubin, miki aw boch ko fapi ggan.
* 4:23 SABBATH . . . MADNOM KO M’UG E PUL: Rogon nma leamnag e girdi’ e pi rran nem e aram e ngiyal’ ni bfel’ ni ngan fith lanyan’ e profet.