3
Machib ni tay John nma tawfe
(Matthew 3:1–12; Mark 1:1–8; John 1:19–28)
Re ngiyal’ i n’em e ke yan i gaman ragag nge lal e duw ni par Tiberius ni ir e emperor; ma Pontius Pilate e am u Judea, mi Herod e pilung nu Galile, ma walagen i Filip e ir e pilung nu Iturea ngu Trakonitis; mi Lysanias e pilung u Abilene, mi Annas nge Kaifas e yow e prist nib th’abi tolang. Ireray e re ngiyal’ i n’en ni yib e thin rok Got ngak John u daken e ted, me Zakariah e chitamngin John. Ma aram me yan John u ga’ngin yang e gi nug ni ba’aram ni bay e lul’ ni Jordan riy, ni be machib ni be ga’ar, “Mpi’ed keru’med ko denen ni gimed be rin’ min tawfe nagmed, me n’ag Got fan e denen romed u wan’.” Ni bod rogon nike yog Isaiah ni profet u lan e babyor rok ni ga’ar:
“Be tolul be’ u daken e ted ni be ga’ar:
‘Mu fal’eged rogon kanawo’en Somol,
mu yal’uweged e kanawo’ ni ngeb riy!
Urngin yang nib aw nga but’ ma ngan suguy ngalang,
ma urngin e burey nib sobut’ nge tin nib tolang ma ngan pacheg;
ma yu pa’ i kanawo’ nib chichigog e thingar ni yal’uweg,
ma yu pa’ i kanawo’ nib kireb e ngan pacheg.
Ma aram e urngin e girdi’ nu fayleng ni bay ra guyed e kanawo’ nike ngongliy Got ni nge thapegrad riy ngak!’ ”
Mi i yib e girdi’ ni pire’ ni pire’ ngak John nga daken e ted ni nge tawfe nagrad. Me ga’ar ngorad, “Gimed e pi porchoyog nir! Mini’ e keyog ngomed nrayag ni ngam thaygad ko damumuw rok Got ni bayi taw? Mu rin’ed e ngongol ni nge dag ni kam pi’ed keru’med ko denen ni gimed be rin’. Ma dab umogned romed ni be lungumed, ‘I Abraham e ir e chitamangidad.’ Ya nggog ngomed ni Got e rayag rok ni nge fek e pi malang ney nge ngongliy ngar manged e pi’in owchen Abraham! Ya tow e kan fal’eg rogon ke par ni nge th’ab e gek’iy u lik’ngin; ni gubin kaen e gek’iy nder yib wom’ngin ni bfel’ e bay nth’ab nganin’ nga mit e nifiy.”
10 Me fith e girdi’ ngak ni lungurad, “Ere mang e nggu rin’ed?”
11 Me fulweg ni ga’ar, “Cha’ ni l’agruw kenggin e mad rok e thangri pi’ ba kaen ngak e cha’ ndariy kenggin e mad rok, ma cha’ ni bay e ggan rok e thangri pi’ boch ngak e en ndariy rok.”
12 Me yib boch e pi’in yad ma kunuy e tax ni ngan tawfe nagrad, miyad fith ngak ni lungurad, “Tamchib, mang e nggu rin’ed?”
13 Me ga’ar ngorad, “Dab mu kunuyed e tax nge pag urngin ni kanog ngomed.”
14 Miki fith boch e salthaw ngak ni lungurad, “Ma gamad, mang e nggu rin’ed?”
Me ga’ar ngorad, “Dab mu feked e salpiy rok be’ u fithik’ e yargel ma dab um t’ared e thin nga daken e girdi’; nge fel’ u wun’med puluwmed ni yibe pi’ ngomed.”
15 Me gel e pagan’ rok e girdi’; miyad tabab i fithrad u murung’agen John, ya yad be finey nsana ir fare Messiah. 16 Me ga’ar John ngorad ni yad gubin, “I gag e gu be tawfe nagmed ko ran, machane be’ nri ka ba ga’ ngog e bay yib, ya gag e ri gub sobut’ ndab gu bung ni nggu pithig togfan e sus rok. Ir e bayi tawfe nagmed ko fare Kan Nthothup nge nifiy. 17 Ma bay talin e maruwel rok ni nge chuweg fiteyru’ urngin wom’ngin e woldug ni grain, me kunukunuy limngun ni yima ngongliy e flowa riy nge tay nga naun rok, me urfiy fapi fiteyru’ u fithik’ ba nifiy ni dabi math bi’id!”
18 Ngiyal’ ni ba’aram ni i machibnag John ngak e girdi’ fare Thin Ni Bfel’, ma bo’or kanawo’en ni i tay ir riy ngak e girdi’ ni ngar piggad ngar folgad ko re thin nem. 19 Machane me welthin John nib togopluw ngak Herod ni am ni bochan e ke le’ay Herodias, ni immoy ni leengin be’ nib mo’on ni walagen, ma bo’or boch ban’en nib kireb nike ngongliy. 20 Me ngongliy Herod ban’en nri kab gel e kireb riy, ni aram e yin’ John nga kalbus.
Tawfe ntay ngak Jesus
(Matthew 3:13–17; Mark 1:9–11)
21 Nap’an ni mu’ i tawfenag urngin e girdi’, ma kun tawfenag Jesus. Ma nap’an ni be meybil, me mab e tharmiy, 22 me yib fare Kan Nthothup u lang i yib nga daken ni bod ya’an ba arche’ ni dove. Me yib ba lam u tharmiy ni be ga’ar, “I gur Fakag ni gab t’uf rog, kari felan’ug ngom.”
Fare ganong rok Jesus
(Matthew 1:1–17)
23 Gonap’an e guyey e duw yangren Jesus me tabab ko maruwel rok; mi Josef e chitamngin, ni girdi’ e leamnag ni aram rogon, mi Heli e chitamngin Josef, 24 mi Matthat e chitamngin Heli, mi Levi e chitamngin Matthat, mi Melki e chitamngin Levi, mi Jannai e chitamngin Melki, mi Josef e chitamngin Jannai, 25 mi Mattathias e chitamngin Josef, mi Amos e chitamngin Mattathias, mi Nahum e chitamngin Amos, mi Esli e chitamngin Nahum, mi Naggai e chitamngin Esli, 26 mi Maath e chitamngin Naggai, mi Mattathias e chitamngin Maath, mi Semein e chitamngin Mattathias, mi Josek e chitamngin Semein, mi Joda e chitamngin Josek, 27 mi Joanan e chitamngin Joda, mi Rhesa e chitamngin Joanan, mi Zerubbabel e chitamngin Rhesa, mi Shealtiel e chitamngin Zerubbabel, mi Neri e chitamngin Shealtiel, 28 mi Melki e chitamngin Neri, mi Addi e chitamngin Melki, mi Kosam e chitamngin Addi, mi Elmadam e chitamngin Kosam, mi Er e chitamngin Elmadam, 29 mi Joshua e chitamngin Er, mi Elieser e chitamngin Joshua, mi Jorim e chitamngin Elieser, mi Matthat e chitamngin Jorim, mi Levi e chitamngin Matthat, 30 mi Simeon e chitamngin Levi, mi Judah e chitamngin Simeon, mi Josef e chitamngin Judah, mi Jonam e chitamngin Josef, mi Eliakim e chitamngin Jonam, 31 mi Melea e chitamngin Eliakim, mi Menna e chitamngin Melea, mi Mattatha e chitamngin Menna, mi Nathan e chitamngin Mattatha, mi David e chitamngin Nathan, 32 mi Jesse e chitamngin David, mi Obed e chitamngin Jesse, mi Boas e chitamngin Obed, mi Salmon e chitamngin Boas, mi Nahshon e chitamngin Salmon, 33 mi Amminadab e chitamngin Nahshon, mi Admin e chitamngin Amminadab, mi Arni e chitamngin Admin, mi Hezron e chitamngin Arni, mi Perez e chitamngin Hezron, mi Judah e chitamngin Perez, 34 mi Jakob e chitamngin Judah, mi Isak e chitamngin Jakob, mi Abraham e chitamngin Isak, mi Terah e chitamngin Abraham, mi Nahor e chitamngin Terah, 35 mi Serug e chitamngin Nahor, mi Reu e chitamngin Serug, mi Peleg e chitamngin Reu, mi Eber e chitamngin Peleg, mi Shelah e chitamngin Eber, 36 mi Kainan e chitamngin Shelah, mi Arfaxad e chitamngin Kainan, mi Shem e chitamngin Arfaxad, mi Noah e chitamngin Shem, mi Lamek e chitamngin Noah, 37 mi Methuselah e chitamngin Lamek, mi Enok e chitamngin Methuselah, mi Jared e chitamngin Enok, mi Mahalale’el e chitamngin Jared, mi Kainan e chitamngin Mahalale’el, 38 mi Enos e chitamngin Kainan, mi Seth e chitamngin Enos, mi Adam e chitamngin Seth, mi Got e chitamngin Adam.