9
Jesus ni l’oeg fa ragag nge l’agruw i gachalpen ngranod
(Matthew 10:5–15; Mark 6:7–13)
Ma aram me ulunguy Jesus fa ragag nge l’agruw i gachalpen nge pi’ gelngirad nge mat’awrad ni ngar tulufed urngin e mo’onyan’ nike ying ngak e girdi’ miyad chuweg e liliy. Ma aram me l’oegrad ngranod ni ngar machib niged ngak e girdi’ u murung’agen e gagiyeg rok Got, miyad golnag e pi’in nib m’ar. Me ga’ar ngorad, “Dariy ban’en ni ngam feked ngam marod: dab mu feked e sog, dab mu feked e tutuw nma fek e pi’in nma man ban’en, nge ggan, nge salpiy, ni mus nga reb e kenggin e mad ni ngu’um thiliyeged ko bin ni bay u dakenmed ma dab mu feked. Re tabinaw ni yira yog ngomed ni ngam pired riy, e ngu’um pired riy nge mada’ ko ngiyal’ ni ngam chuwgad u lan fare binaw; ma re binaw ndabun e girdi’ riy ni kam marod ngay, e ngam chuwgad riy mi gimed rurug e rifrif u aymed nge chuw e fiyath riy, ni aram e gimed be dag ngorad nib kireb e tin ni kar rin’ed.”
Me yan fa pi’in gachalpen ngranod u lan urngin e pi binaw i yan, ni yad be machibnag ngak e girdi’ fare Thin Ni Bfel’, ma yad be chuweg e liliy ko girdi’ u gubin yang.
I Herod ni balyangan’
(Matthew 14:1–12; Mark 6:14–29)
Mi Herod, ni ir e pilung nu Galile e rung’ag murung’agen urngin e pin’en ni be rin’ Jesus; me ri balyangan’ u murung’agen ni bochan e be ga’ar boch e girdi’, “I John ni i tawfe e ke fos ko yam’!” Ma boch e girdi’ e be lungurad e ke yib i m’ug Elijah, ma boch e girdi’ e be lungurad e ke fos reb fapi profet ni kakrom ko yam’. Me ga’ar Herod, “I gag e gog ni ngan th’ab k’angan John; me ere i mini’ e re mo’on nem ni gu be rung’ag e pin’ey ni murung’agen?” Ma aram mi i guy rogon ni nge guy Jesus nga owchen.
Jesus ni pi’ gan fa lal i biyu’ i girdi’
(Matthew 14:13–21; Mark 6:30–44; John 6:1–14)
10 Me sul fapi apostel miyad yog ngak Jesus urngin ban’en ni kar rin’ed. Me fekrad ngar uned ngak miyad yan ni go’ yad nga reb e binaw nu Bethsaida fithingan. 11 Ma fa’ani rung’ag fapi girdi’ ni yo’or murung’agen miyad lek Jesus. Me pagrad ngar pired rok, mi i weliy ngorad murung’agen e gagiyeg rok Got ma be golnag e pi’in yad mm’ar.
12 Ma nap’an ni be n’en ni nge aw e yal’, me yib fa ragag nge l’agruw i gachalpen ngak me lungurad, “Mog ko pi girdi’ ney ngranod nge yag nranod ko pi binaw i yan nge yungi n’en nib chugur ngaray ni yibe par riy yibe woldug ngar gayed e ggan nge bang ni ngar pired riy; ya gin’ey e dariy be’ nma par riy.”
13 Machane me ga’ar Jesus ngorad, “Gimed e mpi’ed ban’en ngar ked.” Miyad fulweg ni lungurad, “Kemus ni lal yal’ e flowa nge l’agruw e nig ni ba’aray romad. Ga ba’adag ni gamad ra yan gu chuw’iyed e ggan rok e pi girdi’ ney ni aray urngin?”
14 (Ma gonap’an e lal i biyu’ e pumo’on ni bay ko gin’em.)
Me ga’ar Jesus ngak pi gachalpen, “Mu guyed rogon e girdi’ ngar pired nga but’ ni yu ulung nra reb ma gonap’an e wugem e girdi’ riy.”
15 Ma aram rogon ni rin’ pi gachalpen miyad par nga but’ ni yad gubin. 16 Me fek Jesus fa lal yal’ i flowa nge fa gali nig, me sap ngalang, me pining e magaer riy ngak Got, mi i t’et’ar fa yu yal’ i flowa ngi i pi’ ngak pi gachalpen ngu’ur f’othed ko girdi’. 17 Ma yad urngin nra ked ngar fosgad ngay; me kunukunuy pi gachalpen Jesus e tin ni aw nde m’ay i kay me gaman ragag nge l’agruw e dug riy.
Peter ni yog ko mini’ Jesus
(Matthew 16:13–19; Mark 8:27–29)
18 Bay ba ngiyal’ ni be meybil Jesus ni go ir, me yib pi gachalpen ngak. Me fithrad ni ga’ar, “Be yog e girdi’ ni yo’or ni gag mini’?”
19 Miyad fulweg ni lungurad, “Be ga’ar boch e girdi’ e gur John ni i tawfe. Ma boch e girdi’ e be ga’ar e gur Elijah, ma boch e girdi’ e be ga’ar e gur reb fapi profet ni kakrom ni kamfos ko yam’.”
20 Me fithrad ni ga’ar, “Ma gimed e be lungumed e gag mini’?”
Me fulweg Peter ni ga’ar, “I gur fare Messiah rok Got!”
Jesus ni weliy murung’agen e gafgow nge yam’ ni bayi tay
(Matthew 16:20–28; Mark 8:30—9:1)
21 Me tay Jesus chiylen ngorad ndab rogned e re bugithin ney ngak be’, 22 me ul ul ngay ni ga’ar, “En ni Fak e Girdi’ e thangri ga’ ba gafgow ni nge tay, ma pi’in pi’ilal, nge pi tolang ko prist, nge pi tamchib ko Motochiyel e bay ra dabuyed. Ma bay nli’ ngem’, min faseg ko yam’ ko chirofen ni man e dalip ngay.”
23 Me ga’ar ngorad ni yad gubin, “Fa’anra ba’adag be’ ni nge un ngog, ma thangri pag talin ir, ma nge fek e kuruth rok ngi i lekeg ni gubin e rran. 24 Ya en nra finey ni nge ayuweg e pogofan rok e ra thay rok; machane en nra thay e pogofan rok ni bochag e ra fos. 25 Be mang e ra fel’ rogon be’ riy ni fa’anra yag ngak e re fayleng ney ni polo’, machane be par nib malog ara ke gel e mo’onyan’ ngak! 26 Fa’anra i tamra’ be’ nga murung’ageg nge thin ni gu be machibnag ma aram e en ni Fak e Girdi’ e ra tamra’ nga murung’agen fa’anem ko ngiyal’ nra sul riy ni yow e fla’ab rok nge fla’ab ko en ni Chitamangiy nge pi engel nib thothup. 27 Mu ted fanmediyan ko re bugithin ni ba’aray! Nggog ngomed ni bay boch e girdi’ u roy ndab ra m’ad miyad guy e gagiyeg rok Got.”
Jesus ni pig ram’en
(Matthew 17:1–8; Mark 9:2–8)
28 Gonap’an e nga reb e wik nga tomuren nike yog e pi thin ney, me fek Jesus Peter, nge John, nge James ngar uned ngak ngranod nga daken bburey ni nge meybil. 29 Ma nap’an ni be meybil, me thil ya’an owchen me pig ram’en e mad rok ngari wechwech ni be galgal. 30 Kachingiyal’ nem me yib i m’ug l’agruw i pumo’on u to’oben Jesus ngu’ur nonod Jesus; ni gali cha’nem e Moses nge Elijah, 31 nra m’uggow ni be galgal ram’en dowrow ni bod rogorow u tharmiy, mu ur nonod Jesus ni yad be weliy murung’agen nge rogon ni dabi n’uw nap’an me mu’nag e tin ke finey Got ni nge ngongliy ni aram e nge yim’ u Jerusalem. 32 Peter nge fa gali cha’ ni yad e yad be mol, miyad od miyad guy ram’en Jesus ni be galgal nge fa gali cha’ ni yad ba sak’iy. 33 Ma nap’an ni be yan fa gali cha’ rok Jesus nga orel, me ga’ar Peter ngak Jesus, “Masta, rib manigil ni kadbad ngaray. Bay gu toyed dalip i tent, nreb e ngam par ngay, ma reb e nge par Moses ngay, ma reb e nge par Elijah ngay.” (Ni aram e ri der nangfan e pi thin nem ni be yog.)
34 Ma nap’an ni ka be welthin, me yib i m’ug bangi manileng nge tagalul’ nagrad, ma fa’ani yib fa gi manileng nga dakenrad me tamdag pi gachalpen. 35 Me non ba lam u fithik’ fa gi manileng ni ga’ar, “Ireray Fakag, ni ir e kug turguy — ere mu telmed ngak!”
36 Ma fa’ani tal fare lam, ma go’ ka Jesus e yad be guy. Me tay pi gachalpen e tin ni kar guyed ndar weliyed ta’a ban’en riy ngak be’ e ngiyal’nem.
I Jesus ni golnag bochi pagel nike ying ba mo’onyan’ ngak
(Matthew 17:14–18; Mark 9:14–27)
37 Ma reb e rran riy me yan Jesus nge fa dalip i gachalpen ko fare burey nga but’, me yib e girdi’ ni pire’ ngak Jesus.” 38 Me tolul be’ nib mo’on u fithik’ fapi girdi’ ni ga’ar, “Tamchib! Wenig ngom, moy mu guy fakag ni kari maagirag rog! 39 Ma yib i ying ba mo’onyan’ ngak nge tolul me margeynag, ma be yib e wuth u l’ugun, ni yugu ma sul ngak ngi i maad’adnag ma der pag! 40 Ere kug wenig ngak pi gachalpem ni ngar tulufed nge chuw rok, machane de yag rorad.”
41 Me fulweg Jesus ni ga’ar, “Ri gimed be oloboch, ya der mich Got u wun’med! Uw n’umngin nap’an nthingar gu par romed? Uw n’umngin nap’an ni nggu k’adan’ug romed?” Ma aram me ga’ar ngak fare mo’on, “Mfek fare pagel ni fakam i yib ngaray.”
42 Ma nap’an ni be yib fare pagel ngak, me rin’ fare mo’onyan’ ban’en ngak nge aw nga but’ me margeynag. Me non Jesus ngak fare mo’onyan’ ni nge chuw u fithik’ fa’anem, me golnag fare pagel, me pi’ ngak e chitamngin. 43 Ma urngin e girdi’ nra gin gad ngarogon feni gel gelngin Got.
Jesus ni ki weliy bayay murung’agen e yam’ ni nge tay
(Matthew 17:22–23; Mark 9:30–32)
Ma nap’an ni ka be weliy e girdi’ murung’agen urngin ban’en ni rin’ Jesus ni kar gin gad ngay, me ga’ar ngak pi gachalpen, 44 “Dab mpaged talin e n’en nggog ngomed! En ni Fak e Girdi’ e bay ni pi’ nga pa’ e pi girdi’ ni yad be yog e thin.” 45 Machane dar nanged fan e re bugithin nem nike yog. Ya kan mithag fan rorad ni nge dab ra nanged fan, ma yad be tamdag ni ngar fithed fan e re bugithin nem ngak.
Mini’ e en nth’abi tolang?
(Matthew 18:1–5; Mark 9:33–37)
46 Me yib i lulu’ag pi gachalpen e thin ko mini’ e arorad ni ir e th’abi tolang u fithik’rad. 47 Ma manang Jesus e n’en ni yad be leamnag, me ere kol pa’ bochi tir, me sak’iynag nga to’oben, 48 me ga’ar ngorad, “En nra ayuweg e re tir ney ni bochag, e ke ayuwegneg; ma en nra ayuwegneg, e ke ayuweg e en ni ir e ke l’oegeg ku gub. Ya en ni ir e th’abi sobut’ u fithik’med ni gimed gubin, e ir e th’abi tolang.”
En nder togopluw ngomed e kabigmed
(Mark 9:38–40)
49 Me non John ni ga’ar, “Masta, kug guyed be’ nib mo’on ni be maruwel nga fithingam ngi i tuluf e mo’onyan’ ko girdi’, me ere ku gogned ngak ni nge dabki rin’, ya gathi ir be’ ko ba’ rodad e girdi’.”
50 Me ga’ar Jesus ngak nge fa tinem i gachalpen, “Dab mu guyed rogon ni ngam taleged, ya en nder togopluw ngomed e kabigmed.”
Ba binaw u lan yu Samaria ndabun e girdi’ riy ni ngar ayuweged Jesus
51 Ma nap’an ni be chugur ko re ngiyal’ i n’en ni ba’aram ni ngan fek Jesus riy nga tharmiy, me turguy u wan’ ni nge yan nga Jerusalem, ma aram me yan. 52 Me l’oeg e mol’og rok ngar m’onod rok ngranod ngalan ba binaw rok e girdi’ nu Samaria ni ngar fal’eged rogon urngin ban’en ni fan ngak. 53 Machane girdi’ ko re binaw nem e daburad ni ngar ayuweged Jesus, ya ke yan i gagiyel ni nge yan nga Jerusalem. 54 Ma fa’ani guy James nge John ni gachalpen Jesus ni aram rogon me lungurow, “Somol, ga ba’adag ni nggu piningew e nifiy nge yib u tharmiy nga but’ nge li’rad?”*
55 Me pigicheal Jesus nge puwan’ ngorow. 56 Ma aram miyad yan nga yugu reb e binaw.
Pi’in nsusun e ngar manged pi gachalpen Jesus
(Matthew 8:19–22)
57 Ma nap’an ni yad be yan, me yib be’ nib mo’on i ga’ar ngak Jesus, “Nggu un ngom ko yungi n’en ni ngam man ngay.”
58 Me ga’ar Jesus ngak, “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.”
59 Me ga’ar ngak yugu reb e mo’on, “Mu un ngog.”
Machane me ga’ar, “Somol, mu son, nga’ag wan gu k’eyag e chitamag.” 60 Me fulweg Jesus ni ga’ar, “Mpag e pi’in yad ba yam’ ngar k’eyged e yam’ rorad. I gur e mman ngam machibnag ngak e girdi’ murung’agen e gagiyeg rok Got.”
61 Ma yugu reb e mo’on e ga’ar, “Somol, gu ra un ngom; machane mu son nggu wan gu fingichiy girdi’en e tabinaw rog.”
62 Me ga’ar Jesus ngak, “En nra tabab i gi’ e but’ u milay’ mi i changar nga keru’ e dabi yib fan ko gagiyeg rok Got.”
* 9:54 Boch e babyor e kan puthuy ngay ni bod ni rin’ Elijah. 9:55 Boch e babyor e kan puthuy ngay ni ga’ar, “Da mu nanged ko bmiti mang gelngin e ba mil famed ngak; ya en ni Fak e Girdi’ e de yib ni nge kirebnag e yafos ko girdi’, machane nge thapegrad.”