LAMENTATIONS
Murung’agen e Re Ke Babyor Ney
Babyor ni Lamentations e lal i tang, ara daloloy’, ni tangin e kireban’ niy be yornag e binaw nu Jerusalem nike waer ko mael ko duw ni 586 u m’on ndawori yib Kristus, nni kirebnag re binaw nem min fek e girdi’ riy nga Babylonia ni yad ba kalbus. Yug aram rogon nib ga’ ni murung’agen e gafgowan’ e bay ko re babyor ney, machane ku bay e thin riy ni be yog ni nge pagan’uy ngak Got me l’agan’uy ngak ko tin bayib e rran nga m’on. Girdi’ nu Israel e ma yon’ e pi tang ney ni yuduw u lan in e rran ni yad ma pag e abich mar pired nike kireban’rad ni yad be leamnag re gafgow nem nike tay yu Jerusalem ko duw ni 586 u m’on ndawori yib Kristus.
Gathon e Re Ke Babyor Ney
Kireban’ rok yu Jerusalem 1:1–22
Gechig ni aw nga Jerusalem 2:1–22
Gechig, kalngan’ nge l’agan’ 3:1–66
Tomuren ni waer yu Jerusalem 4:1–22
Meybil nag e wurengan’ 5:1–22
1
Kireban’ rok yu Jerusalem
Yu Jerusalem nike par ni go’ ir, ya immoy bangiyal’ nib sug ko girdi’!
Immoy ni ir e ba sorok u fayleng, ma chiney e ke bod be’ ni bpin nike yim’ figirngin;
Re nam nib pilung u fithik’ e pi nam e ke mang ba sib.
 
N’umngin e nep’ ni i yor; ngi i ser e lu’ u owchen nga but’.
Dariy bagyad e pi’in ni ur fagergad ni magey ni nge fal’eg lanyan’.
Pi’in yad e yad e karyag niged, go’ kar togopluwgad ngak e chiney.
 
Girdi’ nu Judah e yad bogi sib ni dakriy gelingrad, kan chuwegrad u taferad.
Yad be par u lan yug boch e nam, ni dariy bang riy ni yad ra yog ni taferad —
Ke longbiyrad e pi to’ogor rorad, ni dariy kanawo’en miyad thay.
 
Dakriy be’ ni mayib nga Tempel e chiney ko meybil ko pi rran nib thothup.
Pi’in rrugod ni ur tanggad u rom e yad be gafgow, ma fapi prist e kemus ni go’ moen e yad be tay.
Ke par langan e pi garog ni dariy be’ riy, ma yu Zion e ke mochuch ko amith.
 
Pi to’ogor rok e ke gel ngak; kar michgiyed nga gelingrad.
I SOMOL e ke gagiyegnag ke gafgow ni fan urngin e denen rok nib pire’;
Pifak e ka ni kolrad ka ni fekrad ngabang.
 
Fla’ab rok yu Jerusalem e ban’en nike thumur.
Pi’in yad ma gafaliy e kar boded e gamanman ni deer nike m’ay gelngin ni bilig,
Nike chugur ni nge m’ay gelngirad ni bod ni yad be mil ko pi tamkol gamanman ni be lol’oegrad.
 
Ke par ni go’ ir nike mogothgoth e chiney, yu Jerusalem e be sul ngi i leamnag e fla’ab rok kakrom;
Nap’an ni aw nga pa’ e pi to’ogor rok, ma dariy be’ ni ayweg.
Pi’in kar gelgad ngak e yad be minmin ngak ko waer nike tay.
 
Bugwan ni bfel’ e ke chuw rok; dakriy e upong u daken ke thiyer.
Be gel’gel’ nike mithag owchen ko tamra’.
Yu Jerusalem e ke alitnag ir ko denen rok nib tinowey.
 
Feni alit e ba mom ni yira guy, machane de dag nike magfan’ ko mang e ke buch rok.
Ir nike thay e rib gafgow; dariy be’ nra fal’eg lanyan’.
I gel e pi to’ogor rok me yor ngak SOMOL ni ngan runguy.
 
10 Pi to’ogor e kar iringed urngin e machaf rok.
Ni guyrad nranod ngalan e Tempel,
Ni gin ni yog SOMOL ndabi yan e Gentile ngay.
 
11 Girdi’ rok e yad be gel’gel’ ma yad be changarnag ban’en ni ngar ked;
Yad be thilyeg e machaf rorad ko ggan ni nge yag nra pired ni dab ra m’ad.
Fare binaw e tolul ngalang, ni ga’ar, “SOMOL, mu changar ngog, ngam guyeg u fithik’ e bilig t’ay e gafgow ni gu be tay.”
 
12 Be yor ngak gubin e pi’in yad be yan u to’oben, “Musap ngog,
Dariy be’ ni ka’eta’ ba amith ni bod e birog e amith,
Nib amith ni SOMOL e kefek nga dakenag ko fa ngiyal’ nike damumuw.
 
13 “Ke pi’ ba nifiy u lang, nib nifiy ni be yik u fithk’ag.
I ngongliy ba wup rog nge thikiyeg nga but’.
Ma aram me pageg nge digeyeg u fithik’ e amith ni der tal.
 
14 “Ke fek babyoren urngin e denen rog ke m’ag nga ta’bang;
Ke the’ nga bilel’ugnag, ni tomalngin e rib tomal nike m’aynag gelngig.
I Somol e ke pi’eg nga pa’ e pi to’ogor rog, ni dariy gelngig u pulowrad.
 
15 “I Somol e ke minmin ko urngin e salthaw rog ni yad ba chacheag;
Ma ke pi’ barba’ i salthaw ni ngar li’ed e pumo’on ni bfel’ yangren rog.
Ke pirdi’iy e girdi’ rog ni bod e grape ni yima udiy ni ngan fek l’ogwen.
 
16 “Aramfan ni lan owcheg e kesug ko lu’ ni be map’.
Dariy be’ nrayag ni fal’eg lanin’ug; fa i pi’ e athamgil ngog.
An to’ogor e ke gel ngog; ma pi girdi’ rog e dakriy ban’en ni magey rorad.
 
17 “Gu k’iyeg pa’ag, ma dariy be’ nra aywegeg.
Ke pining SOMOL e pi to’ogor ni ngar togopluwgad ngog u gubin yang;
Pangirad ngog e bod ni gag e dow nib alit.
 
18 “Machane SOMOL e ir e bmat’aw, ya gag e da ug fol rok.
Mmotoyil gad ngog, gimed e girdi’ u gubin yang; mu guyed gag u fithik’ e amith rog.
Pi’in pagel nge rugod rog e kan fek’rad nga bang ni yad ba kalbus.
 
19 “Gu pining e pi’in gamad nga bang, miyad siyeg ni ngar ayuwegedgag.
Pi prist nge pi tayugang’ e karm’ad u lan e kanawo’ u lan binaw,
Ko ngiyal’ ni yad be changarnag e ggan ni nge yag nra pired ni yad bfos.
 
20 SOMOL, mu changar nga ga’ngin e gafgow rog, nge lanin’ug ni kari gafgow!
Kari gafgow lanin’ug ni fan ko pi denen rog.
Yi be thang e fan u lan e pi kanawo’; ma ku aritay lan e naun, pi naun ma bay e yam’ riy.
 
21 “Ngam motoyil ko gel’gel’ rog; dariy be’ nra fal’eg lanin’ug.
Pi to’ogor rog e kar felan’gad ni kam fek e riya’ nga dakenag.
Mu fek fare rran i yib ni mmicheg; mu gafgownag e pi to’ogor rog ngar gafgowgad ni bod gag.
 
22 “Mog e kireb ngorad ni bochan urngin e buchan’ rorad;
Mu gechig nagrad ni bod nim gechig nageg ni fan ko denen rog.
Gu be gel’gel’ u fithik’ e bilig t’ay e gafgow rog, ke gafgow lanin’ug.