18
Par ko pumo’on nge bpin nde Fel’
I SOMOL e yog ngak Moses ni nge yog ngak e girdi’ nu Israel ni nge ga’ar, “Gag SOMOL ni Got romed. Thingar dab mu’uned ko tin ma rin’ e girdi’ nu Egypt ko gin ni um pired riy kafram, ara tin nma rin’ e girdi’ nu Kanaan ni fare nam ni gu be fekmed i yan ngay. Mu folgad ko pi motochiyel rog mi gimed rin’ e tin kugog ni ngam rin’ed. I gag e SOMOL ni Got romed. Mu folwokgad ko tin kug duwgiliy ni ngu’um rin’ed nge pi motochiyel ni kug pi’ ngomed; gimed ra rin’ ni aray rogon migmed par ni dabi buch banen romed. I Gag SOMOL.”
Miki pi’ SOMOL e tin ba’aray e gafal: Dab mu pirew be’ ni gimew tabnaw. Dab mu pirew e chitnam ngam dariy fannag e chitmam. Thingar dab mu dariy fannag e chitnam. Dab mu pirew bagyad pi le’engin e chitmam ngam dariy fannag e chitmam.+ Dab mu pirew walagem ni bpin, ara be’ ni bpin nta’reb e chitmangmew fa chitningmew, ndemturug ko nchugliymew u ta’bang fa danga’.+ 10 Dab mu pirew be’ ni bpin ni fak be’ ni fakam; ya ra m’ayfam riy. 11 Dab mu pirew be’ ni bpin ni kemus ni chitmangmew fa chitininginmew e ba ta’reb; ya ir be’ ni bpin ni walagem. 12-13 Dab mu pirew be’ ni bpin ni walagen e chitnam are chitmam; ya fare bpin e girdi’ rok e chitnam ara chitmam nrib chugur.+ 14 Dab mu pirew be’ ni bpin ni le’engin be’ nib mo’on ni walagen e chitmam ara chitnam; ya kemang girdi’em. 15 Dab mu pirew be’ ni bpin ni figirngin fakam+ 16 ara be’ ni bpin ni le’engin walagem.+ 17 Dab mu pirew be’ ni bpin ni ku’um pirew e chitningin fa titaw rok; ya richey ma girdi’em, ma aram e kam pirew be’ ni gimew tabnaw.+ 18 Dab mu fek be’ ni bpin ni walagen le’engim ni ngkum le’engiy, n’umngin nap’an ni kabfos le’engim.
19 Dab mu pirew be’ ni bpin ko ngiyal’ nib pal, yab ta’ay. 20 Dab mu pirew le’engin yug reb e pumo’on; ya ga ra ta’ay. 21 Dab mu pi’ fakam ni fan ko tayfan ni yima tay ngak fare got ni Molek, ya ra dariy fannag fithingan Got ni ir e SOMOL. + 22 Dariy be’ nib pumo’on ni ngar pirew reb e pumo’on; rib fananikay Got e binem.+ 23 Dariy be’ nib mo’on ara be’ ni bpin ni ngar pirew ba gamanman; ya gathi aram yalen e girdi’, mra ta’ay riy.+
24 Dab mu rin’ed reb e pi ngongol ney ngam ta’ay niged gimed, ya er e pin’en ni i rin’ e pi’in dar nanged Got ngar ta’aygad, ni pi’in ur pired u daken fare binaw ni yad ba som’on romed ni yad e tulufrad SOMOL nga wuru’ fare binaw, ya nge yag nim marod nga langgin. 25 Pi ngongol rorad nem e ta’aynag fare nam, ma aram me gechignag SOMOL fare nam, me gagiyegnag nge par fare nam ni be tharbog e girdi’ ni be par riy. 26-27 Ra ngongliyed urngin e pin’ey nib sonogor ngar ta’ay niged fare nam, machane gimed e thingar dab mu rin’ed e pin’em. Gimed gubin ndemturug ko gimed piyu Israel ara girdi’ nu bang ni yad be par u fithik’med nthingar mu folgad ko fapi motochiyel rok SOMOL nge tin keyog ni ngan rin’, 28 ma aram e dabi therbogmed fare nam, ni bod nike thirif e pi’in ur pired riy ni yad mm’on romed. 29 Gimed manang ni en nra rin’ reb e pi ngongol ney nib sonogor e yira n’ag ndabki mang reb e girdi’ rok Got.
30 Me ga’ar SOMOL, “Ere mu folgad ko tin kugog ni ngam rin’ed ma dab mu’uned ko ngongol rok e girdi’ ni ur pired ko re nam ney ni yad mm’on romed, ma dab mu ta’ay niged gimed ni fan e kam rin’ed reb e pin’ey. I Gag SOMOL ni Got romed.”
+ 18:8 Lev 20:11; Deu 22:30; 27:20 + 18:9 Lev 20:17; Deu 27:22 + 18:12-13 Lev 20:19, 20 + 18:15 Lev 20:21 + 18:16 Lev 20:21 + 18:17 Lev 20:14 + 18:21 Lev 20:1–5 + 18:22 Lev 20:13 + 18:23 Exo 22:19; Lev 20:15, 16; Deu 27:21