23
Pi madnom nturguy
SOMOL e pi’ ngak Moses e pi gafal ni ba’aray ni fan ko pi madnom nturguy, ni aram e ngiyal’ ni nge mu’ulung e girdi’ nu Israel ngar ted fan SOMOL. Nel’ e rran ni ngam marwelgad, ma dab mpaged talin ni rofen ni medlip, aram e rofen ni Sabbath, ni yaran e toffan. Rofen nem e dab marwelgad, machane ngambad nga ta’bang ngam ted fan SOMOL. Demturug e gin gimed be par riy ma binem e rran e Sabbath rok SOMOL. Irera’ fapi madnom rok SOMOL ni nge taw ko rran riy mi gimed mu’ulung ngam ted fan SOMOL.
Paluk’af nge Flowa ni dariy e is riy
(Numbers 28:16–25)
Paluk’af e ba madnom ni yibe tay fan SOMOL, yira tababnag ko gonowrug e rofen ni ragag nge aningeg ko bin som’on e pul. Ma rofen ni ragag nge lal e Madnom ko Flowa ni Dariy e Is riy, ni medlip e rran nthingar dab mu ked e flowa ni bay e is riy. Rofen ni som’on e ngam mu’ulunggad ngam tedfan SOMOL ma pi maruwel ni gimed ma rin’ ko yu rran e dab mu rin’ed. Medlip e rran ni ngam pi’ed ngak SOMOL e ggan ni maligach. Rofen ni medlip e ngam mu’ulunggad bayay ngam tedfan SOMOL, ma pi maruwel ni gimed ma rin’ ko yu rran e dab mu rin’ed.
9-10 Fa’an gimed rayan ngalan fare nam ni bayi pi’ SOMOL ngomed, mi gimed kunuy e grain ni mu yunged ke el, ma thum ni som’on ni mu thum niged e ngam pi’ed ngak e prist. 11 Me pi’ ngak SOMOL ni maligach, ya ngam fel’gad u wan’ SOMOL. Re maligach ney e nge pi’ fare prist ko rofen nra yib nga tomuren e Sabbath. 12 Ma rofen nem ni gimed ra pi’ fapi grain e ngkum pi’ed ba fak e saf ni pumo’on ni ta’reb e duw yangren ni dariy bang u downgin nib kireb ni maligach ni mo’oruf. 13 Mi gimed chagiy aningeg e pawn e flour ngay ni kan athkuy e gapgep ko olive ngay nge mang ggan ni maligach. Bon e re maligach ney e ba m’aguwan’ SOMOL. Ma ngkum uneged reb e quart e wayin ngay ngam pi’ed ni maligach. 14 Dab mu ked e tin som’on e grain, ni demturug ko ba kak’ling, ara kan urfiy, ara kan lith ni bod e flowa, nge mada’ ko ngiyal ni kam pi’ed e re maligach ney ngak Got. Ren’ey e arrogon ni ngu’um rin’ed nge pi’in owchamed e chiney i yan ngaram.
Madnom ko t’ar wom’ngin e woldug
(Numbers 28:26–31)
15 Mu the’eged medlip e wik ko rofen ni yib nga tomuren e Sabbath ni aram e rofen ni ngam feked fare thum i grain romed i yib ngam pied ngak SOMOL. 16 Rofen ni gaman e wugem ngay, ni rofen ni yib nga tomuren e bin medlip e Sabbath, e ngkum pi’ed ngak SOMOL e grain ni ka fini el nge mang maligach. 17 Ra reb e tabinaw ma nge fek l’agruw e flowa i yib nge pi’ ngak SOMOL nib tow’ath nib mal’eag. Ra reb e flowa ma aningeg e pawn e flour nni fanay ngay, nni athkuy e is ngay, ma ngan pi’ ngak SOMOL ni ba maligach ko tin som’on e grain. 18 Ma nge yigey yu Israel medlip e saf ni ta’reb e duw yangarrad ko fapi flowa, nge reb e garbaw ni pumo’on, nge l’agruw e kaming, ndariy reb ni bay bang u downgin nib kireb nib maligach ni mo’oruf ngak SOMOL, nike un e maligach ni grain nge wayin ngay. Bon e re maligach ney e ba m’aguwan’ SOMOL. 19 Ma ngkum pi’ed reb e kaming ni pumo’on ni maligach ko denen, nge l’agruw e saf ni pumo’on ni ta’reb e duw rorow nib maligach ni nge gapaseg thilin Got nge girdi’. 20 En ni prist e nge yigey e flowa ko fa gal saf nge pi’ ngak SOMOL nib tow’ath nib mal’eag ni fan ko pi prist. Pi maligach ney e rib tabgul. 21 Rofen nem e dab mu ngongliyed e maruwel romed ko yu rran, ya ngam mu’ulunggad ngam ted fan SOMOL. Ren’ey e nggi’i rin e pi’in owchamed e chiney i yan ngaram, ndemturug e gin yad be par riy.
22 Fa’an gimed ra t’ar wom’ngin e woldug romed, ma dab mu th’abed e grain ni bay u marichlen e milay’ romed, ma dab mu sulod ngam th’abed e grain ni mpaged; ngam paged nge kay e girdi’ ni gafgow nge girdi’ u yugu boch e nam ni yad be par u fithik’med. I SOMOL e Got romed.+
Madnom ko Be’ech e Duw
(Numbers 29:1–6)
23-24 Rofen ni som’on ko bin medlip e pul e nge par ni reb e rran ni dab ni maruwel, ma nap’an nra thow e rappa, mi gimed mu’ulung ngam ted fan SOMOL. 25 Dab mu ngongliyed e maruwel ni gimed ma ngongliy ko yu rran, mi gimed pi’ e ggan ni maligach ngak SOMOL.
Yaran e Bayul
(Numbers 29:7–11)
26-27 Rofen ni ragag ko bin medlip e pul e aram e rofen ni ngan bangbengnag e maligach ni bod ko motochiyel ni nge chuweg e denen ko girdi’. Rofen nem e dab mu abichgad; mi gimed yib nga ta’bang ni fan ko liyor, mi gimed pi’ e ggan ni maligach ngak SOMOL. 28 Dab mmarwelgad e rofen nem, ya aram e rofen ni ngan bangbengnag e maligach nrogon ko motochiyel ni nge chuweg e denen. 29 En nra kay ban’en e rofen nem e dab kun tay ni ir reb e girdi’ rok Got. 30 Ma fa’anra maruwel be’ e rofen nem, mi SOMOL e bayi thang e fan rok. 31 Re motochiyel ney e ngi i fol urngin e pi’in owchemed riy, ndemturug e gin yad be par riy. 32 Nge tabab ni gonowrug ko rofen ni mereb fen e pul nge yan i mada’ ko gonowrug ko rofen ni ragag, ngam ted e biney e rran ni reb e rran ni ngan toffan ko maruwel, ma dab ni kay ban’en.
Madnom ko Nochi Na’un
(Numbers 29:12–40)
33-34 Madnom ko Nochi Na’un e nge tabab ko rofen ni ragag nge lal ko pul ni medlip, min madnomnag ni medlip e rran.+ 35 Rofen ni som’on e ngam mu’ulunggad ni ngam ted fan SOMOL, ma dab mu ngongliyed e maruwel ni gimed ma ngongliy ko yu rran. 36 Ra reb e rran ko re medlip i rran nem ma ngam og niged e ggan; me rofen ni meruk mi gimed mu’ulung bayay ni ngam ted fan SOMOL, mi gimed ognag e ggan. Rofen nem e yaran e liyor, ma dab mmarwelgad.
( 37 Irera’ e pi madnom ni kan turguy ni ngu’um liyorgad riy ngak SOMOL ni ngu’umbad nga ta’bang ni fan ko liyor nge ggan ni ngu’um pi’ed, nge maligach ni mo’oruf, nge maligach ni grain, nge maligach ni gamanman, nge wayin ni rogon nike yog e motochiyel ni nga ni pi’ u reb e rran nge reb. 38 Pi madnom ney e nge cheag ko pi madnom ni Sabbath, ma pi maligach ney e nge chag ko pi maligach ni gimed ma pi’, nge tin ni mmicheged ni ngam pi’ed ngak, nge tin gimed e mu leam niged ni ngam pi’ed ngak SOMOL.)
39 Rofen ni ragag nge lal ko bin medlip e pul ko ngiyal’ ni kam kunuyed e woldug romed nike el, ma ngam madnom niged e re madnom ney ni medlip e rran. Bin som’on e rran e nge par ni dab ni maruwel. 40 Rofen nem e ngam feked boch e tin nth’abi fel’ u wom’ngin e gek’iy romed ni yima kay, mi gimed fek yuwan e fol’tir nge papa’ngin e gek’iy ni pire’ yuwan ngam tababgad ko madnom ngam tedfan SOMOL ni Got romed. 41 Medlip e rran ni ngam madnom niged. Ren’ey e nge par ni reb e motochiyel ni ngi i fol e pi’in owchemed riy. 42 Urngin e girdi’ nu Israel e ngar pired nga nochi naun ni medlip e rran, 43 ya nge nang e pi’in owchemed ni SOMOL e gagiyegnag yu Israel ngu’ur pired u lan nochi naun ko fa ngiyal’nem ni pow’iyrad nga wuru’ yu Egypt. Ir SOMOL ni Got romed.
44 Ara’ rogon ni pi’ Moses ngak yu Israel e pi gafal ni fan ko fapi madnom ni kan turguy ni ngu’ur liyorgad riy ngak SOMOL.
+ 23:22 Lev 19:9, 10; Deu 24:19–22 + 23:33-34 Deu 16:13–15