4
I SOMOL ni bay i gagiyegnag e fayleng nge lanelang ni polo’ u fithik’ e gapas
(Isaiah 2:2–4)
1 Tin bay fini yib e rran
e fare burey ni bay e Tempel riy
e bayi par ni ir e th’abi tolang u fithik’ e pi burey,
ni bay nga daken gubin e pi burey.
Bo’or e pi nam ni bay ra thelep gad i yan ngay
2 ma bayi lungurad,
“Ngdarod nga daken fare burey rok SOMOL,
ko Tempel rok fare Got nu Israel.
Ir e bayi fil ngodad e tin ba’adag ni ngad rin’ed;
mu udarod u daken e yu pa’ i kanawo’ nike duwgiliy.
Ya machib rok SOMOL e be yib u Jerusalem;
ke par u Zion be non ngak e tirok e girdi’.”
3 Bay i triggiliy e malu’ag thin u thilin e pi nam,
pi nam nib ga’ mab gel ntin ba chugur nge tin mal’af.
Bay ra pirdi’iyed e pi saydon rorad ngemang kuwa nima gi’ e but’,
miyad pirdi’iy e pi sarey rorad nge mang yaer nifen bugul e ew.
Pi nam e dakriy bi’id ni yad ra mael bayay,
ara rfal’eged rogorad bayay ni ngar maelgad.
4 Gubin e girdi’ ni bay ra pired u fithik’ e gapas
u fithik’ fi’irad grape nge yu ke gek’iy rorad ni fig,
ma dakuriy be’ nra k’aring e marus ngorad.
I SOMOL ni Gubin ma Rayag Rok e ke micheg e pin’ey.
5 Ra reb e nam ma yad be meybil ma yad be fol rok e birorad e got, machane gadad e bay ud meybilgad ngak SOMOL ni Got rodad ma gadad be fol rok ndariy n’umngin nap’an.
Bayi sul yu Israel ni kar chuwgad u kalbus u wuru’ e nam
6 Be ga’ar SOMOL, “Bayi taw nga bangyal’ ni bay gu kunuy fapi girdi’ nug gechignag nra gafgow gad ko kalbus u wuru’ e nam.
7 Kar pired ni kar marwoth gad ma yad ba orel ko nam rorad, machane bay gu tabab i gagiyeg nagrad bayay, ngar manged reb e nam nib gel. Bay gu par u daken e Burey ni Zion ngu’ug gagiyeg nagrad e ngiyal’nem i yan nga m’on ndariy n’umngin nap’an.”
8 Me gur, Jerusalem, ni gur tagil’ Got ni mapar riy, ni bod ba tagafaliy e saf u lan tafen e damit rok, ngi i changar nga daken e girdi’ rok, e bay kum mang bayay lolgen fare lung ni immoy ni fanam.
9 Mang ni ga be gel’gel’ nib ga’ lamam? Mang ni ka mum’ ko amith ni bod be’ ni bpin ni be n’en ni nge gargel? Gur bochan e dariy e pilung rom, ma pi’in yad ma fonow nigem e karm’ad?
10 Gimed e girdi’ nu Jerusalem, um leapleapgad ma gimed be gel’gel’ ko amith ni bod be’ ni bpin ni nge gargel, ya chiney e thingar mu chuwgad u lan binaw ngam marod mu pired nga daken e ted. Thingar mmarod nga Babylon, machane u rom e bayi gagiyeg nagmed SOMOL riy ngam chuwgad u pa’ e to’ogor romed.
11 Pire’ e nam ni kar mu’ulung gad ni ngar cham gad ngomed. Be lungurad, “Thingar ni thirif yu Jerusalem u but’! Bay da guyed nike mogothgoth!”
12 Machane pi nam nem e dar nanged e tin be leamnag SOMOL. Dar nanged ni be leamnag ni nge kunuyrad nge gechig nagrad, ni bod rogon wom’ngin e woldug ni grain nni kunuy ngabang nga ni gunugunuy.
13 Be ga’ar SOMOL, “Mmarod piyu Jerusalem, ngam gechig niged e pi to’ogor romed! Bay gu gel nagmed ni bod ba garbaw ni pumo’on ni bay e gagey rok ni wasey ma rifrif u ay e wasey ni bronze. Pire’ e nam ni bay mu bilged u but’, ma pi fel’ rogon rorad nra feked u fithik’ e yargal e bay mu pi’ed ngog, I Gag Somol ko fayleng ni polo’.”