10
Jesus ni tamilangnag e girdi’ u murung’agen e mabgol nike wear
(Matthew 19:1–12; Luke 16:18)
1 Me chuw Jesus u rom nge yan ko nug nu Judea me th’ab e lul’ ni Jordan nga ba’nem. Miki mu’ulung e girdi’ ni pire’ ngak, mi i machib nagrad ni bod rogon nma rin’.
2 Me yib boch e Farise ngak, miyad guy rogon ni ngar ninged e kanawo’ ngak ko thin. Me lungurad ngak, “Mog, bmat’aw ko Motochiyel rodad nra chuweg be’ leengin?”
3 Me fulweg Jesus ngorad ni fithrad ni ga’ar, “Mang motochiyel e pi’ Moses ngomed ni ngam rin’ed?”
4 Miyad fulweg ngak ni lungurad, “Moses e yoloy nrayag ni nge yoloy be’ murung’agen e bpin rok nike chuw, nge mu’ me pag e bpin rok nge yan.”
5 Me ga’ar Jesus ngorad, “I yoloy Moses e re motochiyel nem ni fan ngomed ni bochan e ri gimed ba gelan’, ndabiyag ni ngan fil ban’en ngomed.
6 Machane som’on ko ngiyal’ ni ba’aram, ni sunumiy Got urngin ban’en, ‘Me sunumiy Got e girdi’ ni bagayow e be’ nib mo’on ma bagayow e be’ ni bpin.’
7 ‘Ireray fan ni ra digey e pumo’on e chitamngin nge chitiningin ngar pirew leengin,
8 miyow par ni kar ta’ab girdi’gow.’ Ireray e tin nike yog e babyor nib thothup. Ya aram e gathi ku yow ba ruw ni girdi’, ya kar ta’ab girdi’gow.
9 Ere thangri dabi dareg e girdi’ e gali cha’ ni Got e ke chagiyrow.”
10 Ma nap’an nra sulod ngalan e naun me fith pi gachalpen fan fare bugithin.
11 Me ga’ar ngorad, “En nra chuweg leengin ngki le’ay yugu reb e bpin, e ke th’ab e motochiyel ya kar pirew yugu reb e bpin ni gathi mabgol rok, ni aram e ke togopluw fa’anem ngak leengin;
12 ma ku errogon nre pin nra n’ag figirngin nge figirngiy yugu reb e pumo’on, e ke th’ab e motochiyel ya kar pirew yugu reb e pumo’on ni gathi mabgol rok.”
Jesus ni yibilay e bitir
(Matthew 19:13–15; Luke 18:15–17)
13 Me fek boch e girdi’ e pi’in bitir i yib ngak Jesus ni nge matheg pa’ ngorad, me puwan’ pi gachalpen Jesus ngak fapi girdi’.
14 Ma fa’ani nang Jesus ni aram rogon me ri dabuy, me yog ngak pi gachalpen ni ga’ar, “Mpaged e pi bitir nir ngarbad ngog! Dab mu taleged yad, ya gagiyeg rok Got e fan ngak e pi’in bod e pi bitir ney.
15 Mu ted fanmediyan ko re bugithin ney! En ni dabi bodnag ir bochi tir nge pag ir nga pa’ Got nge mang Got e i gagiyegnag e dabiyag nra yan ko gin nsuwon Got.”
16 Me kunuy Jesus fapi bitir ngak me tay pa’ nga dakenrad, ni aram e ke yibilayrad.
Fare m’on ni pire’ ban’en rok
(Matthew 19:16–30; Luke 18:18–30)
17 Ma nap’an ni be n’en Jesus ni nge yan ko milekag bayay, me mil be’ nib mo’on i yib ngak, meb i ragbug nga but’ u p’eowchen, me fith ngak Jesus ni ga’ar, “Tamchib ni gab fel’, mang e thingar gu rin’ me yag e yafos ndariy n’umngin nap’an ngog?”
18 Me fith Jesus ngak ni ga’ar, “Mang ni kamog ni gu bfel’? Ya dariy ta’abe’ ni bfel’, ya kemus ni yigo’ Got e bfel’.
19 Ga manang fapi motochiyel ni ga’ar: ‘Dab mu li’ be’ ngem’; dab mu pirew be’ ni gathi mabgol rom; dab mmoro’ro’; dab mu t’ar e thin nga daken be’; dab mu sabanbannag be’; mu liyor ko chitamam nge chitinam.’ ”
20 Me ga’ar ngak Jesus, “Tamchib, urngin e pi motochiyel nir ni gu be fol riy nnap’an ni ku gub bitir ke mada’ ko chiney.”
21 Me changar Jesus ngak nike runguy me ga’ar ngak, “Ka ba’ ta’a ban’en ndawori yag rom. Mman ngam pi’ ni chuway’ urngin ban’en ni ba’ rom ma ga fek e salpiy riy ngam pi’ ngak e pi’in yad ba gafgow, ma aram e ke yag e fla’ab ngom u tharmiy; ma ga yib ngam un ngog.”
22 Ma fa’ani rung’ag facha’ e re bugithin nem, me tagan owchen, me yan nike kireban’, ya rib pire’ ban’en rok.
23 Me chachangar Jesus rok pi gachalpen me ga’ar ngorad, “Rib mo’maw’ rok e pi’in pire’ ban’en rorad ni ngar uned ko gagiyeg rok Got!”
24 Me gin pi gachalpen ko thin rok, machane miki ga’ar Jesus ngorad bayay, “Pifakag, rib mo’maw’ ni ngan un ko gagiyeg rok Got!
25 Kab mo’maw’ rok be’ ni pire’ ban’en rok ni nge un ko gagiyeg rok Got ko bin ni nge yan ba kamel u mugufan ba rosom.”
26 Me ri gin pi gachalpen Jesus ko re bugithin nem, mra bagayad me fith bagayad ni be lungurad, “Ere mini’ e rayag ni nge thap ngak Got?”
27 Me changar Jesus ngorad me fulweg ngorad ni ga’ar, “Girdi’ e dabiyag rorad, machane Got e rayag rok; ya Got e gubin ban’en mrayag rok.”
28 Me non Peter ni ga’ar, “A mu guy, kug paged gubin ban’en kug uned ngom.”
29 Me fulweg Jesus ngorad ni ga’ar, “Er rogon, machane ba’aray ban’en ni nggog ngomed: en nra pag e tabinaw rok, ara pi walagen ni pumo’on, ara pi walagen ni ppin, ara chitiningin, ara chitamngin, ara pifak, ara yungi binaw ntafen ni bochag nge bochan e Thin Ni Bfel’,
30 e ka bo’or e tin nrayag ngak ko biney e tamilang nra reb ma ra’ay yay e ke mun ngay ni naun, nge pi walagen ni pumo’on, nge pi walagen ni ppin, nge pi chitiningin, nge pifak, nge yungi binaw ntafen, ma ku errogon e togopluw ni bay i tay e girdi’ ngak; ma bin ni bayib e tamilang e bay yag e yafos riy ngak ndariy n’umngin nap’an.
31 Machane bo’or e girdi’ ni yad mm’on e chiney ni bay ra tomurgad, ma bo’or e girdi’ ni yad ba tomur e chiney ni bay ra m’ongad.”
Yay ni gaman e dalip ngay ni weliy Jesus murung’agen e yam’ ni nge tay
(Matthew 20:17–19; Luke 18:31–34)
32 Ngiyal’ney e yad bay u daken e kanawo’ ni yad be yan nga Jerusalem, ni bay Jesus ngam’on ma be lay pi gachalpen ni kar rusgad; ma girdi’ ni be lek keru’rad e ku er rogorad ni kar rusgad. Miki fek Jesus fare ragag nge l’agruw i gachalpen nga orel ko fapi girdi’ me weliy ngorad e n’en ni bay nrin’ ngak.
33 Me ga’ar Jesus ngorad, “Mu sapgad, gadad be yan nga Jerusalem ni ir e bay ni pi’ e en ni Fak e Girdi’ riy ngak e pi tolang ko prist, nge pi tamchib ko Motochiyel, ni yad e bay ra pufthin niged ngar turguyed ni ngan li’ ngem’, nge mu’ miyad pi’ nga pa’ e pi’in gathi yad piyu Israel.
34 Ma bay ur moning niged, ma yad be thuw nga daken, ma yad be toy ko dimow, nge mu’ miyad li’ ngem’. Mra pag dalip e rran min faseg ko yam’.”
N’en ni ning James nge John
(Matthew 20:20–28)
35 Me ere yib James nge John ngak Jesus, ni Zebede e chitamangirow, me lungurow ngak, “Tamchib, ba’aray ban’en ni gamow ba’adag ni ngam rin’ ngomow.”
36 Me fith Jesus ngorow ni ga’ar, “Mang e gimew ba’adag ni nggu rin’ ngomew?”
37 Miyow fulweg ngak ni lungurow, “Ngiyal’ ni ga ra mman mpar riy nga tagil’im u lan e gin’en ni ir e suwom nib th’abi fel’ ma gamow ba’adag ni nggu pirew nga but’ u to’obem, ni bagamow nga ba’ ni mat’aw rom, ma bagamow nga ba’ ni gilay’ rom.”
38 Machane me ga’ar Jesus ngorow, “Da mu nangew e n’en ni gimew be wenignag. Rayag romew ni ngam unumew e n’en ni bay ko fare kap nthingar gu unum? Fa ntawfe nagmew ni bod rogon nthingar ntawfe nigeg?”
39 Miyow fulweg ngak ni lungurow, “Rayag romow.”
Me ga’ar Jesus ngorow, “Ri bay mu unumew e n’en ni bay ko fare kap nthingar gu unum min tawfe nagmew ni bod rogon nthingar ntawfe nigeg.
40 Machane dariy mat’wug ni nggu duwgiliy e en ni nge par nga ba’ ni mat’aw rog nge en ni nge par nga ba’ ni gilay’ rog. I Got e bayi pi’ e gal yang i n’ey ngak e gali cha’ nike tay ni ngar tagil’iyew.”
41 Ma fa’ani rung’ag fa ragag nem i gachalpen Jesus murung’agen e ren’ey miyad damumuw ngak James nge John.
42 Me piningrad Jesus ngar mu’ulunggad ngak ni yad gubin me ga’ar ngorad, “Gimed manang ni pi’in pilung ko pi nam ni gathi yu Israel e ba ga’ lungurad u puluwon e girdi’, ma pi’in yad be yog e thin rorad e yad be gagiyeg nagrad.
43 Machane gimed e gathi ireram e n’en ni ngam rin’ed. Fa’anra ba’adag bigimed ni nge mang ir e ba tolang, ma ir e thangri mang tapigpig romed ni gimed gubin;
44 ma fa’anra ba’adag bigimed ni ir e nge m’on, me ir e thangri mang sib romed ni gimed gubin.
45 Ya mus ngak e en ni Fak e Girdi’ ma de yib nga fayleng ni ngan pigpig ngak; ya yib ni nge pigpig me pi’ e pogofan rok nge biyuliy e girdi’ ni pire’ ngay.”
Jesus ni golnag Bartimeus nib malmit
(Matthew 20:29–34; Luke 18:35–43)
46 Miyad yib nga Jeriko. Ma nap’an ni be n’en Jesus ni ngar chuwgad pi gachalpen nge ku boch e girdi’ ni pire’ ni pire’ ni yad be lekrad, ma bay be’ nib malmit ni Bartimeus fithingan, ni be’ nib mo’on ni fak Timeus, nike par nga but’ u to’oben e kanawo’ be man salpiy.
47 Ma nap’an ni rung’ag ni Jesus nu Nazareth e ke yib, me tabab ko pong ni ba ga’ laman ni be ga’ar, “Jesus, ni Fak David gur! Mu runguyeg!”
48 Ma bo’or e girdi’ ni puwan’ ngak miyad yog ngak ni nge th’ab gulungan. Machane fin aram e tolul ni kari ga’nag laman ni be ga’ar, “Fak David, mu runguyeg!”
49 Me tal Jesus me ga’ar, “Mu pininged.”
Miyad pining fa’anem nib malmit me lungurad ngak, “Mpagan’um! Ngam sak’iy, ya be piningem.”
50 Me n’ag e thal ni wuru’ e mad rok, me og ngalang me yib ngak Jesus.
51 Me ga’ar Jesus ngak, “Mang e ga ba’adag ni nggu rin’ ngom?”
Me ga’ar fare malmit ngak Jesus, “Tamchib, gu ba’adag ni nge yag ni gguy ban’en bayay.”
52 Me ga’ar Jesus ngak, “Mman, michan’ rom ngak Got e ke gol nigem.”
Ma kachingiyal’ nem me yag ni nge guy ban’en, me un ngak Jesus ko gin ni be sor ngay u daken e kanawo’.