12
Fanathin ni murung’agen e pi’in nni pagfan ba milay’ i grape ngorad
(Matthew 21:33–46; Luke 20:9–19)
1 Me ere non Jesus ngorad u fithik’ e fanathin ni ga’ar: “Immoy be’ nib mo’on ni yung bmilay’ i grape, nge mu’ me yororiy, me ker e low ni luwan e n’en ni nge uduy wom’ngin e grape riy, me tay tafen e damit riy nib tolang. Me pi’ fa gi woldug ngak e pi’in kar ninged ngak ni ngu’ur ayuweged ma yad be fek boch i wom’ngin ma yad be pi’ boch ngak ni puluwon, ma aram me yan ko milekag.
2 Ma fa’ani taw nga nap’an ni ngan t’ar wom’ngin fa gi woldug, me l’oeg ba sib rok ngak fa pi’in kar ninged fa gi woldug ni nge fek e birok’ e f’oth rorad.
3 Me kol fa pi’in kar ninged fa gi woldug fare sib rok facha’, ngar pirdi’iyed miyad pag nge sul ngak nde fek ban’en.
4 Miki l’oeg fa en nsuwon fa gi woldug reb e sib rok nge yan ngak fa pi’inem; miyad toy lolugen miyad gafgownag.
5 Miki l’oeg fa’anem ni ir e suwon fa gi woldug yugu reb e sib rok nge yan ngorad, miyad li’ ngem’; ma ku aram e n’en nrin’ed ngak pire’ e tin ni pi’rad ngranod u tomuren e binem, ni boch i yad e ra pirdi’iyed ma boch i yad e ra li’ed ngem’.
6 Me yan i par ni en ni kabay ni nge pi’ nge yan e be’ nib mo’on ni fak nrib t’uf rok. Ma aram me pi’ fak u tomur nge yan ngak fa pi’in kar ninged fa gi woldug, me ga’ar u wan’, Rib muduwgil ni yad ra tayfan fakag.
7 Mra bagayad fa pi’in kar ninged fa gi woldug me ga’ar ngak bagayad, ‘Ireray fak fa’anem ni ir e suwon e gi woldug ney. Marod ngad li’ed ngem’, me ri mil suwon e gi woldug ney ngodad!’
8 Miyad kol fare pagel ni fak fa’anem ngar li’ed ngem’, miyad yin’ nga wuru’ fa gi woldug.
9 Me fithrad Jesus ni ga’ar, “Ere mang e ra rin’ fa’anem nib mil suwon fa gi woldug ngak?” “Ra yib nge li’ fa pi’inem ngarm’ad me pi’ fa gi woldug ngak boch e girdi’.
10 Dawor mpoyed e gin’ey u lan e babyor nib thothup? Bmuduwgil u wun’ug ni kaam poyed ni fa’ani ga’ar:
‘Fare malang ni dabun e pi’in yad ma toy e naun ya ra fineyed ndariyfan
e yan i aw ni aram e re malang ni ir e ba th’abi ga’ fan.
11 Ren’ey e Somol e yodoromnag,
rib manigil e n’en nike rin’ Somol!’ ”
12 Ma pi’in yad be yog e thin rok piyu Israel e ra guyed rogon ni ngar koled Jesus ngar feked, ya kar nanged nike yog e re fanathin nem nib sor fan ngorad. Machane yad be tamdag ngak fapi girdi’ ni aram urngin nike mu’ulung, ma aram miyad digey ngranod.
N’en nni fith ni murung’agen e tax ni yibe pi’
(Matthew 22:15–22; Luke 20:20–26)
13 Mi nol’oeg boch e pi Farise nge boch e girdi’ ko ba’ rok Herod e girdi’ ngak Jesus ni ngar fithed bo’or ban’en ngak, miyad guy rogon ngar ninged e kanawo’ ngak ko thin.
14 Marbad ngak me lungurad, “Tamchib, gamad manang ni gur reb e girdi’ nib riyul’ e tin ni ga ma yog nge tin ni ga ma rin’, ya der magafan’um ko pin’en ni be finey e girdi’ ngom, ya ta’reb rogon e girdi’ ni gubin u wun’um, ma ga be fil ngak e girdi’ e tin nib riyul’ ni murung’agen e tin nib m’agan’ Got ngay ni ir e nge rin’ e girdi’. Ere mog ngomad, gur ba togopluw ko Motochiyel rodad ni ngan pi’ e tax ni yibe pi’ ngak e Emperor nu Roma? Ere ngad pi’ed e tax fa danga’?”
15 Me nang Jesus e ban rorad, me fulweg ngorad ni ga’ar, “Mang ni gimed be guy rogon ni nggu aw ko ban romed? Mfeked ba salpiy nib silber i yib ngog ngug guy.”
16 Miyad fek reb i yib ngak me fithrad ni ga’ar, “Mini’ e ya’an owchen nge fithingan e ba’aray riy?”
Miyad fulweg ngak ni lungurad, “ Emperor nu Roma.”
17 Ma aram me ga’ar Jesus ngorad, “Fa’anra errogon me ere mpi’ed ngak e Emperor nu Roma e tirok’ ban’en, mi gimed pi’ ngak Got e tirok’ Got ban’en.”
Me ri yad ngat ngak.
Ba de’er u murung’agen e fos ko yam’
(Matthew 22:23–33; Luke 20:27–40)
18 Me yib boch e Sadduse ngak Jesus, ni aram e picha’ ni yad ma yog ndab ni faseg e girdi’ ko yam’.
19 Me lungurad ngak, “Tamchib, i Moses e yoloy e re motochiyel ni ba’aray ni fan ngodad ni ga’ar, Fa’anra yim’ be’ nib mo’on me digey e ppin rok ma dariy e bitir rorow, ma aram e thangri leengiy e en ni walagen fare mo’on fare pin ngar diyengow ni fak fare mo’on nike yim’.
20 Immoy medlip i walag ni pumo’on; bin th’abi ilal rorad e mabgol, me yim’ ndariy fakrow fare pin.
21 Me fek e en ni migid ko fapi walag fare pin, miki yim’ ndariy e bitir rorow. Ma ku er i tay e bin dalip fapi walag,
22 ma ku aram rogon e n’en ni rin’ e tin ni kabay fapi walag: urngin fa medlip i walag nra leengiyed fare pin miyad yim’ ndariy bagayad nra diyengow. Mfini yim’ fare pin u tomur.
23 Ere fa’anra ni faseg e pi’in karm’ad ko chirofen ni ngan faseg e yam’ riy, me mini’ e arorad nra mang fare pin leengin? Ya yad medlip nra leengiyed fare pin!”
24 Me fulweg Jesus ngorad ni ga’ar, “Ri gimed be oloboch! Kam nanged fan ni gimed be oloboch? Bochan e da mu nanged e thin ni bay u lan e babyor nib thothup ara gelngin Got.
25 Ya ngiyal’ ni yira faseg e yam’ riy e yad ra bod e pi engel ni bay u tharmiy, ma dabki mabgol e pumo’on nge ppin.
26 Ma fa’anra gimed be fitheg ko yira faseg e girdi’ ko yam’ fa danga’, ma nggu fithmed ni nge lungug, Ka’am be’eged fa dawor u lan e babyor ku Moses ko fa gin’em ni bay fare thal i yol riy ni murung’agen fachi ke gek’iy ni be daramram? Ya bay riy ni ga’ar Got ngak Moses, I gag e Got rok Abraham, nge Got rok Isak, nge Got rok Jakob.
27 Fan e ren’ey e ir e Got rok e girdi’ nib fos, ma gathi Got rok e girdi’ nib yam’. Ere ri gimed be oloboch!”
Bin th’abi ga’ e motochiyel
(Matthew 22:34–40; Luke 10:25–28)
28 Ma bay ba tamchib ko Motochiyel u rom, nike rung’ag e n’en ni i weliy fa picha’ nge Jesus. Me nang nike fulweg Jesus e n’en ni fith e pi Sadduse ngak ni bfel’ rogon, ma aram me fith ban’en ngak Jesus ni ga’ar, “Bin ngan e motochiyel e ir e th’abi ga’ fan u fithik’ urngin e motochiyel?”
29 Me ga’ar Jesus, “Ba’aray e bin th’abi ga’ fan: Mmotoyilgad yu Israel ngay! Somol ni Got rodad e krimus ni ir e Somol nri ta’reb.
30 Thangri t’uf rom Somol, ni ir e Got rom, u polo’ i gum’ircha’em, ngu polo’ i lanin’um, ngu polo’ i leam rom, ngu polo’ i gelngim.
31 Ma bin migid e motochiyel ni ku ba ga’ fan e ba’aray: gin’en ni ga bay riy e thangri t’uf rom e en ni ir e bmigid ngom ni gowa gur. Dakuriy reb e motochiyel ni ka ba ga’ fan ko gali motochiyel ney.”
32 Me ga’ar fa en ni tamchib ko Motochiyel ngak Jesus, “Er rogon, tamchib! Mmat’aw e tin ni kamog, ni kemus nri ta’reb e Somol, ni aram Got, ndakuriy reb e Got ngabang, ya kemus nri ta’reb ni ir.
33 Ere girdi’ e thangri t’uf Got rok u polo’ i gum’irchaen, ngu polo’ i laniyan’, ngu polo’ i gelngin; ma thingari t’uf rok e en nib migid ngak ko gin’en ni bay riy ni gowe ir. Kabfel’ ni ngan fol ko gali motochiyel ney ko bin ni ngan fek e gamanman i yib ni maligach ngan urfiy u daken e altar mu kun pi’ yugu boch e maligach.”
34 Ma nap’an ni nang Jesus nike fulweg fare tamchib ko Motochiyel e thin rok ni bfel’ rogon, me ga’ar Jesus ngak, “I gur e da mmal’af ko gagiyeg rok Got.”
Ma aram ma daki ga’aran’ be’ ni ngki fith ban’en ngak Jesus.
N’en ni fith Jesus ni murung’agen fare Messiah
(Matthew 22:41–46; Luke 20:41–44)
35 Ma nap’an ni be machib Jesus u lan e Tempel me fith ni ga’ar, “I di’in me yog e pi tamchib ko Motochiyel ni fare Messiah e ra yib ni ir owchen David?
36 I David e yib i ying e Kan Nthothup ngak me ga’ar:
‘I Somol e ga’ar ngak e Somol rog:
Mpar aray nga ba’ ni mat’aw rog,
nge yan i mada’ ko ngiyal’ ni bay gu tay e pi to’ogor rom nga tan e rifrif u em.’
37 I David e ir rok e pining ‘Somol’ ngak, ere ra di’in me yan i aw ni fare Messiah e ir owchen David?”
Jesus ni yog ni ngan ayuw rok e pi tamchib ko Motochiyel
(Matthew 23:1–36; Luke 20:45–47)
Ma fapi girdi’ ni aram urngirad e ur motoyilgad ngak Jesus ni kar felfelan’gad.
38 Ma nap’an ni be machib nagrad me ga’ar, “Mu ayuweged gimed rok e pi tamchib ko Motochiyel, ya yad ba’adag ni ngu u ranod ni ka ron’ed e mad nib n’uw, ma yad ba’adag ni ngu’un siro’ ngorad ko gin ni bay e market riy;
39 ma ku yad ba’adag e chiya ni kan tay u lan tafen e mu’ulung i yan nib muduwgil e girdi’ ntagil’ nge yungi n’en nth’abi fel’ ni yima par riy ko pi madnom ni yima tay.
40 Yad e picha’ ni kar felan’gad u puluwon e pi’in ni ppin nike yim’ figirngirad ya yad be leag e naun rorad, ma yad be guy rogon ni ngu’un guyrad ni yad be fek e meybil nib n’uw. Ere gechig ni yira pi’ ngorad e ri kab gel!”
Salpiy ni pi’ be’ ni bpin nike yim’ figirngin
(Luke 21:1–4)
41 Ma nap’an nike par Jesus nga but’ u to’oben tafen e salpiy u Tempel me fal’eg i yaliy e girdi’ ni be yin’ e salpiy ngalan. Ma bo’or e pi’in pire’ salpiyan ni be yin’ e salpiy ngay ni pire’;
42 me yib be’ ni bpin nib gafgow ya ke yim’ figirngin, me yib i yin’ l’agruw chi kobre’ nrow nib achig, ni ta’reb tolngin l’agruw nga ta’reb e kobre’ nrow.
43 Me pining Jesus pi gachalpen ngarbad ngak, me ga’ar ngorad, “Nggog ngomed, nre pin ney nib gafgow ya ke yim’ figirngin e ir e bo’or e salpiy nike yin’ ko tin ke yin’ urngin e girdi’ ni yad be yin’ e salpiy ngalan fare tafen e salpiy.
44 Ya yad e kar pi’ed e salpiy ni kar feked ko salpiy ni bay rorad ni pire’; mi ir e aram feni gafgow ma ke pi’ urngin e chi salpiy ni bay rok, ni ir e nge abich riy.”