7
Turguy e kireb nga daken e girdi’
(Luke 6:37–38, 41–42)
“Dab mu turguyed e kireb nga daken e girdi’, nge dabi turguy Got e kireb nga dakenmed — ya Got e ra turguy e kireb nga dakenmed nrogon nim turguyed e kireb nga daken e girdi’, nge gelngin nge tomalngin nim turguyed. Ere mangfan ni ga be sap nga ba tabyu’ ni bay u lan mit walagem, ma damur tiyan’um nga ba ley i gek’iy ni bay u lan owchem? Ere ra di’in me lungum ngak walagem, Mu son, nggu chuweg e re tabyu’ ni be’er u lan owchem, ma bay ba ley i gek’iy u lan owchem? Gur e cha’ ni ga be dake moding nigem! Som’on e ngam chuweg fare ley i gek’iy u lan owchem, nge mu’ ma aram me yag ni mu guy ban’en ngam chuweg fare tabyu’ u lan mit walagem.
“Dab mpi’ed ban’en nib thothup ngak e pilis ya kemus ni yad ra cheal ngar k’aded gimed; dab mon’ed e churuwo’ romed nni fek u lan l’ugun e yar nga p’eowchen e babiy, ya kemus ni yad ra yot’yot’.
Mu ning, mu Gay, mu tugtuguy
(Luke 11:9–13)
“Mu ninged, me yag ngomed; mu gayed mi gimed pir’eg; mu tugtuguyed e mab, min bing e mab ngomed. Ya urngin e pi’in yad ra ning e ra yag ngorad, ma en nra gay e ra pir’eg, ma mab e yira bing ngak e en nra tugtuguy. Rayag ni nge pi’ bigimed e pi matam ba malang ngak fak ni fa’anra ning fak e ggan ngak? 10 Ara pi’ ba porchoyog ngak ni fa’anra ning e nig ngak? 11 Yugu ireyer fanmed kireb, ma gimed manang rogon ni ngam pi’ed e tin ni bfel’ ban’en ngak pifakmed. Ere Chitamangimed ni bay u tharmiy e rira pi’ e tin ni bfel’ ban’en ngak e pi’in yad ra ning ngak!
12 “Ere mu rin’ed ngak e girdi’ e tin ni gimed ba’adag ni ngar rin’ed ngomed; ireray fan fapi Motochiyel rok Moses nge tin i fil e pi profet ngak e girdi’.
Fare garog nib wen’in
(Luke 13:24)
13 “Marod ko bin nib wen’in e garog, ya ba ga’ langan e garog ko nifiy, ma kanawo’ ni yan ngay e bmom, ma bo’or e girdi’ ni be yan u daken. 14 Ma garog ko yafos e ba wen’in, ma kanawo’ ni yan ngay e bmo’maw’, ma ba lich e girdi’ ni be pir’eg.
Ba ke gek’iy nge wom’ngin
(Luke 6:43–44)
15 “Mu ayuwgad ko profet nde riyul’; ya bay rabad ngomed ni yad bod e saf u wuru’ i dowrad, machane u fithik’ i lanin’rad e ri yad bod e wolf nma k’ad. 16 Gimed ra nangrad ko ngongol rorad. Ya nochi ke gek’iy ni bay rachangalen e der k’uf ni grape, ma pan nib makenken e der k’uf ni fig. 17 Ba ke gek’iy ni bfel’ rogon e ra k’uf ma bfel’ wom’ngin, ma ba kaen nde fel’ rogon e ra k’uf ma ba kireb wom’ngin. 18 Ba ke gek’iy ni bfel’ rogon e dabiyag ni nge yib wom’ngin nib kireb, ma ba kaen nde fel’ rogon e dabiyag ni nge yib wom’ngin ni bfel’. 19 Re ke gek’iy ni dabi yib wom’ngin ni bfel’ e yira th’ab nga nin’ nga mit e nifiy. 20 Ere gimed ra nang e profet ni go’ bogi ban’en u rogon e ngongol rorad.
Ri da gu nangmed
(Luke 13:25–27)
21 “Gathi gubin e girdi’ nma piningeg nma lungurad ‘Somol, Somol,’ e yad ra yan nga gil’ilungun Got u tharmiy, ya kemus ni pi’in yad ma yan nga laniyan’ e Chitamag nu tharmiy. 22 Mra yan i taw ko Chirofen Nem ma bo’or e girdi’ e ra ga’ar ngog, ‘Somol, Somol! U daken fithingam e ug weliyed e thin rok Got riy ngak e girdi’, ma fithingam e ug tulufed bo’or e mo’onyan’ ngay, ma fithingam e ug ngongliyed bo’or e maang’ang ngay!’ 23 Ma aram e bayi lungug ngorad, ‘Ri da gu nangmed. Mu chuwgad rog, gimed e pi’in gimed ba kireb!’
L’agruw i tadimow naun
(Luke 6:47–49)
24 “Ere gubin e girdi’ ni rung’ag e pi thin rog ney miyad fol riy e yad bod be’ nib gonop ni toy e naun rok nge daken e war. 25 Me aw e n’uw nge sugubur e lul’ nge yib nga daken e binaw, me yib e nifeng nib gel i aw ko fare naun. Ma de puth, ya kan toy nga daken e war.
26 “Urngin e pi’in yad ra rung’ag e pi thin rog ney ma der folgad riy e yad bod be’ nib balyang ni toy e naun rok nga daken e yan’. 27 Me aw e n’uw, nge sugubur e lul’ nge yib nga daken e binaw, me yib e nifeng nib gel i aw ko fare naun me puth. Nrib ga’ lingan ni puth!”
Gelngin e thin rok Jesus
28 Fa’ani yog Jesus e pin’ey nge mu’, me gin fapi girdi’ ni aram urngirad ngarogon e machib nike tay. 29 Ya gathi bod e tamchib rorad ko Motochiyel; ya i machib ni bay gelngin e thin rok.