17
Sog rok Aron
1 Me ga’ar SOMOL ngak Moses,
2 “Mog ngak e girdi’ nu Israel ngar pi’ed ragag nge l’agruw ley i sog ngom, ra reb e pi tayugang’ u reb e ganong ma nge pi’ ba ley. Ma ra bagyad fapi pumo’on mag yoloy fithingan nga daken e sog rok
3 ma aram mag yoloy fithingan Aron nga daken baley e sog ni pow ko karok Levi e girdi’. Ra ba ley e sog ma fen reb e pi tayugang’ u reb e ganong.
4 Mag fek e yu ley i sog nem nga langgin fare Tent u p’eowcheg ngam tay ni gubin nga mit fare Kahol ko M’ag, ko gin ni gu ma mada nigem ngay.
5 Ma re mo’on ni kug turguy e ra for mal’gun e ley rok e sog. Aray rogon ni nggu taleg e pi girdi’ ney nu Israel ni kar pired ni yad be gun’gun’ nigem.”
6 Me non Moses ngak fapi girdi’ nu Israel, mra reb e pi tayugang’ me pi’ ba ley e sog ngak, nra reb e ganong ma ta’abley e sog, ere ragag nge l’agruw ley u gubin, mu kun uneg e sog rok Aron nga fithik’.
7 Me tay Moses fa yu ley i sog ni urngin ngalan fare Tent nga mit fare Kahol ko M’ag rok SOMOL.
8 Me reb e rran riy nnap’an ni yan Moses ngalan fare Tent, me guy ni ley rok Aron e sog, ni pow ko birok Levi e ganong e ke for mal’gun. Ke k’uf ke puf e floras riy, ma ke yib wom’ngin ni keal nike lol!
9 Me fek Moses fa yu ley i sog ni gubin nge dag ngak piyu Israel. Mar guyed e n’en nike rin’, mra bagyad fapi tayugang’ me fulweg e ley rok e sog.
10 Me ga’ar SOMOL ngak Moses, “Mu fulweg e ley rok Aron e sog ngam tay nga mit fare Kahol ko M’ag. Nge mang ba puguran ngak e pi’in nu Israel ni be togopluw ni yad ra y’im ni fa’anra dab ra talgad ko gun’gun’.”
11 Me rin’ Moses ni bod rogon ni yog SOMOL ni ngan rin’.
12 Me ga’ar fapi girdi’ nu Israel ngak Moses, “Ere kug musgad u roy!
13 Fa’anra kemus ni yug ra chuchugur be’ nga tooben fare Tent ma thangri y’im, me’ere go’ gamad ba yam’ e chiney!”