3
Pumo’on ni Pifak Aron
1 Irera’ murung’agen e tabnaw rok Aron nge Moses ko ngiyal’ ni ba’aram ni non SOMOL ngak Moses u daken e Burey ni Sinai.
2 Imoy aningeg i pumo’on ni fak Aron: Nadab e bin nganni’, nge yib Abihu, nge yib Eleazar, me Ithamar e th’abi bitir.
3 Nni yibleyrad ngan gapgep nagrad ni ngar manged prist,
4 machane Nadab nge Abihu e ni thang e pogofan rorow u nap’an nra pi’ew ba nifiy nde thothup ngak SOMOL u lan e ted ni desert u Sinai. Ma yow l’agruw ndariy fakrow. Ma aram me par Eleazar nge Ithamar ngu’ur pigpiggow ni prist u nap’an ni kabfos Aron ni chitamngirow.
Pi Levite nni mel’egrad ni ngar pigpiggad ko Prist
5 Me ga’ar SOMOL ngak Moses,
6 “Mu fek fare ganong rok Levi i yib nga m’on ngan falrad ngabang ni ngar manged tapigpig rok Aron ni prist.
7 Bay ur rin’ed e pi maruwel nthingar nrin’ u lane Tent u p’eowcheg mu’ur ngongliyed e maruwel ni fan ngak fapi prist nge fan ngak yu Israel ni ga’ngin.
8 Yad e nge milfan ngorad urngin tatalin e maruwel ko fare Tent mu’ur ngongliyed e maruwel ni fan ngak e tin kabay yu Israel.
9 Ta’are gaf i maruwel ni ngi i rin’ e pi Levite e ngar pigpiggad ngak Aron nge pifak ni pumo’on.
10 Thingar mmel’eg Aron nge pifak ni pumo’on ni ngu’ur rin’ed e maruwel ko prist; ma yug be’ ni nge guy rogon ngki rin’ e pi maruwel ney e yira thang e fan rok.”
11 Me ga’ar SOMOL ngak Moses,
12-13 “Fa pi Levite e ke milfarad ngog e chiney. Nap’an nug thang e fan rok urngin e tin nganni’ u pifak yu Egypt, mug tabgul nagrad nike milfan ngog e tin nganni’ i pifak yu Israel ni pumo’on ko pi tabnaw i yan nge tin nganni’ u pifak e gamanman. Ma chiney e ke yan e ganong rok Levi nga luwan e tin nib nganni’ u pifak yu Israel ni pumo’on; bay ra pired nib milfarad ngog. I Gag SOMOL.”
Fa pi Levite nni the’egrad
14 U lan e ted ni desert u Sinai e yog SOMOL riy ngak Moses
15 ni nge fal’eg babyoren e pi Levite ni yuke girdi’ nge tabnaw, nge uneg ngay gubin e pumo’on nike gaman ta’reb e pul ngalang yangren,
16 me rin’ Moses ni aramrogon.
17 Irera’ e pi pumo’on ni fak Levi nge fithingrad: Gershon, Kohath nge Merari.
18 Ma ba’aray fithingan e gal pumo’on ni fak Gershon ni Libni nge Shimei ni ku aram ngachlen e gal ke girdi’ nem.
19 Ma pifak Kohath ni pumo’on nge fithingrad: Amram, Izhar, Hebron nge Uzziel ni aram ngachlen e yu kaen nem e girdi’.
20 Ma pifak Merari ni pumo’on: Mahli nge Mushi. Yad e pichitamngin e pi tabnaw ni aram rogon fithingrad.
21 Fare ke girdi’ rok Gershon e yib fa gal tabnaw rok Libni nge Shimei riy.
22 Urngin e bitir ni pumo’on nike gaman ta’reb e pul yangarad ngalang, nni yoloy fithingirad nga babyor e yad 7,500 u gubin.
23 Re ke girdi’ ney e ngu’ur n’ufed e pi Tent rorad u ley ni ngal ko fare Tent.
24 Me Eliasaf ni be’ nib mo’on ni fak Lael e ir e mitethin ko re ke girdi’ ney.
25 Yad e ba mifan e maruwel ko fare Tent ngorad, ni upong u langgin, nge upong u wuru’, nge fagi kateng u langan e mab,
26 nge yungi kateng ni fen e yoror nib liyeg fare Tent nge fare altar, nge fare gi kateng ni fen e garog ko fare yoror. Urngin e pigpig ni yima tay nib l’agfan ko pin’em e yad e ba milfan ngorad.
27 Fare ke girdi’ rok Kohath e yib fapi tabnaw rok Amram, nge Izhar, nge Hebron, nge Uzziel riy.
28 Urngin e pumo’on nike gaman ta’reb e pul yangren ngalang nni yoloy fithingirad nga babyor e yad 8,600 u gubin.
29 Re ke girdi’ ney e ngu’ur n’ufed e pi Tent rorad u ba’ ni yimuch ko fare Tent,
30 ni Elizafan nib mo’on ni fak Uzziel e ir e en mitethin ko re ke girdi’ ney.
31 Yad e ba milfan ngorad fare Kahol ko M’ag, nge fare tebel, nge tagil’ e magal, nge altar, nge pi tatalin maruwel nma fanay fapi prist u lan fa Gin nib Thothup, nge fare gi kateng u langan e mab ko Gin Th’abi Thothup. Urngin e pigpig ni yima tay nib l’ag rogon ko pin’em e yad e ba milfan ngorad.
32 En ni mitethin ko fare ganong rok Levi e Eleazar nib mo’on ni fak Aron ni prist. Ir e ma guy e pi’in yad ma maruwel u lan fa Gin nib Thothup.
33 Fare ke girdi’ rok Merari e yib fa gal tabnaw rok Mahli nge Mushi riy.
34 Urngin e pumo’on nike gaman ta’reb e pul yangren ngalang nni yoloy fithingirad nga babyor e yad 6,200 u gubin.
35 Re ke girdi’ ney e ngu’ur n’ufed e pi Tent rorad u ba’ ni lel’och ko fare Tent, ni Zuriel nib mo’on ni fak Abihail e ir e mitethin ko ra ke girdi’ ney.
36 Yad e kan pagfan ngorad e maruwel ni fen fa yungi chayam ko fare Tent, nge dubchey riy, nge rumog, nge pi ta’ riy, nge gubin e ayal riy. Yad e ba milfan ngorad gubin e maruwel nib l’ag rogon ko pin’ey.
37 Ma ku yad e ngki milfan ngorad e yuley i rumog, nge pi ta’ riy, nge pi yuluy riy u but’, nge pi tal ni fen e ba’ ni wuru’ e yoror.
38 I Moses nge Aron nge fa pimo’on ni pifak e ngu’ur n’ufed e pi Tent rorad nga mit fare Tent u ley ni ngek. Yad e bmilfan ngorad ngonglen e pigpig u lan e Gin nib Thothup ni fan ngak e girdi’ nu Israel. Ma yug be’ ni nge guy rogon nge rin’ e pi maruwel ney e yira thang e fan rok.
39 Urngin e pi pumo’on ko Levi nike gaman ta’reb e pul yangren ngalang ni yoloy Moses fithingrad nga babyoren yuke girdi’ ni bod rogon ni yog SOMOL, e yad 22,000 u gubin.
Pi Levite nranod nga luwan e pi pumo’on ni nganni’
40-41 Me ga’ar SOMOL ngak Moses, “Gubin e pumo’on ni pifak yu Israel e bmil farad ngog. Ngam fal’eg babyoren fithingan urngin e tin nib nganni’ e pumo’on nu Israel, nike gaman ta’reb e pul yangren ngalang. Ma munliw rorad e urngin e pi Levite ni kug mel’eg ni nge milsuwon ngog! I Gag SOMOL! Kug duwgiliy e yu ran’ i gamanman ko pi Levite ni nge yin’ luwan urngin e tin nganni’ ko yu ran’ i gamanman.”
42 I fol Moses riy, me fal’eg babyoren urngin e tin nganni’ e pumo’on
43 nike gaman ta’reb e pul yangren ngalan; ni urnginrad u gubin e 22,273.
44 Me ga’ar SOMOL ngak Moses,
45 “Aram e ngam yiblay ngam pi’ e pi Levite ni nge milsuwrad ngog ni ngranod nga luwan urngin e tin nganni’ e pumo’on ni pifak yu Israel, mu kum ognag fa ran’ i gamanman ko Levite ni nge yin’ luwan e tin nganni’ e gamanman rok yu Israel.
46 Ma bochan ni bo’or e pumo’on ni nganni’ ni pifak yu Israel ngak e pi Levite, ni 273 ni yad ba yo’or ngorad, ere thingar mu chuw’iy ngam fulweg e re 273 i pifak yu Israel nem ni pumo’on.
47 Ra bagayad ma lal yang e salpiy ni silber puwon, ni bod rogon nike m’ay i duwgiliy,
48 ma ga pi’ e re salpiy ney ngak Aron nge pifak ni pumo’on.
49 Me fol Moses riy, ma aram me fek
50 1,365 e salpiy ni silber
51 nge pi’ ngak Aron nge pifak ni pumo’on.