30
Fanow u murung’agen e pi Mow
1 I pi’ Moses e tin ba’aray e fanow ko pi tayugang’ ko fapi ganong nu Israel.
2 Nap’an nra mow be’ ni ognag ban’en ni nge pi’ ngak SOMOL fa micheg ni nge taleg ir u ban’en, ma thangri dabi pag e n’en nike micheg, ma thangri rin’ urngin e tin ni yog ni nge rin’.
3 Fa’anra bay reb e rugod ni ku be par u tafen e chitamngin nike ognag ni nge pi’ ban’en ngak SOMOL fa micheg ni nge taleg ir u ban’en,
4 ma thangri rin’ urngin e tin nike ognag ni nge rin’ ni fa’anra de togopluw e chitamngin ngay ko ngiyal’ nike rung’ag murung’agen.
5 Ma fa’anra siyeg e chitamngin ni dabki lebguy e n’en ni ognag ni nge rin’ ko ngiyal’ nike rung’ag murung’agen, mrayag ni pag ni dabki rin’. Ma SOMOL e ra n’ag fan rok, ni bochan e chitamngin e ke siyeg ni dabki rin’ e n’en nike ognag ni nge rin’.
6 Ma fa’anra be’ ni bpin ni dawri mabgol e ognag ban’en, ni demturug ko ke fal’eg i leamnag fa de fel’ i leamnag rok, fa micheg ni nge taleg ir u ban’en, ma nap’an nra mabgol,
7 ma thangri rin’ urngin e tin ni ognag fa tin ni micheg ni fa’anra de togopluw e pumo’on rok ngay ko ngiyal’ nike rung’ag murung’agen.
8 Ma fa’anra siyeg e pumo’on rok ni dabi lebguy e n’en ni ognag ko ngiyal’ ni rung’ag murung’agen, mrayag ni pag ni dabki rin’. Ma SOMOL e ra n’ag fan rok.
9 Be’ nike yim’ e pumo’on rok fa be’ ni bpin nike chuw ko mabgol rok e thangri rin’ urngin e tin ke ognag ni nge rin’ ma thangri taleg ir u gubin e tin ke micheg ni dabki rin’.
10 Ma fa’anra be’ ni bpin nib mabgol nike ognag ban’en ni nge rin’ fa ke micheg ni nge taleg ir u ban’en ni dabki rin’,
11 ma thangri rin’ gubin ban’en ni ognag me taleg ir u urngin ban’en nike micheg kemus ni fa’anra togopluw e pumo’on rok ngay ko ngiyal nike rung’ag murung’agen.
12 Machane fa’anra siyeg e pumo’on rok ni dabi lebguy e n’en ni ognag ko ngiyal’ nike rung’ag murung’agen, ma rayag ni dabki rin’. Ma SOMOL e ra n’ag fan rok ya pumo’on rok e ke taleg ni dabki rin’ e n’en ni ognag.
13 Pumo’on rok e bay mat’wun ni nge micheg fa nge taleg fare pin ni demturug ban’en ni ognag ir ngay fa ke micheg ni dabki rin’.
14 Machane fa’anra, tomuren e rofen ni rung’ag murung’agen ma dariy ban’en riy ni togopluw ngay, ma fare pin e thangri rin’ urngin e tin ni ognag fa micheg. Ya pumo’on rok e ke micheg ni nge rin’ fare pin e tin ke ognag ya de togopluw ngay ko rofen ni rung’ag murung’agen.
15 Ma fa’anra togopluw ko tin ke ognag fare pin nike pag nap’an ma fare pumo’on rok e ra af machan nde lebug e tin ke ognag fare pin.
16 Irera’ e pi motochiyel ni pi’ SOMOL ngak Moses nib l’ag rogon ko tin ke ognag be’ ni bpin nib muchugbil ni kamapar u tafen e chitamngin fa be’ ni bpin nib mabgol.