GIN M’ON E BABYOR NI PI’
PETER
Gin m’on e babyor ni pi’ Peter e yoloy ngak girdi’en Got ni Got e mel’egrad ni kar wergad nga lel’och ko nug nu Asia Minor. Bin ni ba ga’ fan ko re babyor ney e ra pi’ e athamgil nga laniyan’ e pi’in ni yibe gafgow nagrad ni bochan e michan’ rorad ngak Kristus. I Peter e be puguran ngorad murung’agen Jesus, ni yim’ u daken e kuruth me fos ko yam’ ma bayi sul, ma aram fan nrayag ni ngar pired ni bay e Pagan’ rorad. Ere ngar k’adedan’rad ko gafgow nike yib ngorad ya ngar nanged nib sikeng ko michan’ rorad mi Got e bayi pi’ puluwrad ko Chirofen ni bayi sul Kristus riy.
Gathi kemus ni pi’ e athamgil nga lanin’rad ni fan ko ngiyal’ nike yib e gafgow ngorad, machane ki yog ngorad ni ngar pired nrogon e girdi’ nike mil farad ngak Kristus.
Tin ni bay riy
Tabolngin 1:1–2
N’en nike l’agan’uy ngay 1:3–12
Pong ko wok nib thothup 1:13—2:10
Rogon ni nge par girdi’en Kristus ko ngiyal’ nike yib e gafgow ngorad 2:11—4:19
Rogon ni be pigpig girdi’en Kristus ngak Got u fithik’ e sobut’an’ 5:1–11
Tin tomur e thin 5:12–14
1
Re babyor ney e yib rok Peter ni ir e apostel rok Jesus Kristus —
Ngak girdi’en Got ni Got e mel’egrad ni kar weargad ko nug nu Pontus, ngu Galatia, ngu Kappadocia, ngu Asia, ngu Bithynia ni yad be milnag e pogofan rodad. I mel’egmed Got ni Chitamangiy nrogon nike mu’ i turguy u wan’, ni nge ngongliymed fare Kan Nthothup rok ngam pired ni gimed ba thothup, ma gimed be fol rok Jesus Kristus me be’ech nagmed racha’en.
Ngi i ayuwegmed Got ma be pi’ e gapas nga lanin’med nge yan i mus ngarogon.
N’en nike l’agan’uy ngay ni bayi m’ug nib riyul’
Ngad pininged e magaer ngak Got ni ir e Chitamngin e Somol rodad i Jesus Kristus! Ya bochan e ri be runguydad me pi’ e yafos nib be’ech ngodad ni fan e faseg Jesus Kristus ko yam’. Ireray fan ni kad nanged ni tin ke l’agan’dad ngay e bay yib i m’ug nib riyul’, ere gadad be son ni nge yag ngodad e fla’ab ni ba ga’ nike cha’riy Got ni fan ngak e tirok’ e girdi’, ni be cha’riy e pi tow’ath nem u tharmiy ni fan ngomed ko gin ndabiyag ni nge wod riy ara kireb fe kaday. Pi fla’ab nem e gimed e fanmed, ni gimed e pi’in ke thapegmed Got ngak u daken gelngin ngu daken e michan’ romed ngak, ma gimed be sonnag e gin ngam thapgad ngay, ni kan ngongliy rogon kan tay ni ngan dag ko ngiyal’ ni nge mus e rran riy.
Ere mfelfelan’gad ngay, ni yugu aray rogon e chiney ndabisiy ni nge taganan’med nib ngoch nap’an ni bochan e bo’or mit e gafgow ni gimed be tay nib sikeng ngomed. Fan e pi gafgow ney e nge micheg nriyul’ nib mich Got u wun’med. Mus ko gol ni ban’en nrayag ni ngan kirebnag ma yima sikengnag ko nifiy; ere ku errogon e michan’ romed ngak Got, ni ban’en ni kab tolang puluwon ko gol, e ku errogon nthingar ni sikengnag, ni fan e nge yag ni par. Ma aram e ranog e sorok ngomed, me yag e fla’ab ngomed min tay famed ko fare Rran nra yib i m’ug Jesus Kristus riy. Ba t’uf romed, ni yugu aray rogon ndamur guyed; ma mmich u wun’med, ni yugu aray rogon ndamur guyed e chiney; ma aram fan ni ba ga’ e felfelan’ ni gimed be tay, nib felfelan’ ndabiyag ni ngan weliy ko thin, ya gam’ingin e michan’ romed ngak Got e keyag ngomed, ni aram e kam thapgad ngak Got.
10 Re kanawo’ ney ni ir e yira thap riy ngak Got e ir e i gay e pi profet; ya yad e ra yi’iy niged e re tow’ath ney ni bayi pi’ Got ngomed. 11 Ur guyed rogon ni ngar pir’eged e ngiyal’ nge rogon ni bay yib.* Ya Kan ni Thothup rok Kristus ni immoy u fithik’rad e yog e re ngiyal’ i n’ey ni be yi’iynag e pi gafgow ni nge athamgiliy Kristus, nge fla’ab ni bay yib nga tomuren. 12 I Got e dag ngak e pi profet nem ni maruwel ni yad be tay e gathi yad e nge yib fan ngorad, ya gimed, ni aram e ur weliyed murung’agen e tin nib riyul’ ni ir e kam rung’aged e chiney. Pi mol’og ko fare Thin Ni Bfel’ ni yad e ra welthingad u fithik’ gelngin fare Kan Nthothup nni pi’ u tharmiy nge yib e rogned e pi thin ney ngomed. Ireray e tin nib riyul’ e thin ni mus ngak e pi engel ni yad ba’adag ni ngar nanged fan.
Pong ko wok nib thothup
13 Mu fal’eged rogon lanin’med ni ngam ngongolgad. Mi gimed tiyan’med ngari l’agan’med ko tow’ath ni yira pi’ ngomed ko ngiyal’ nra yib i m’ug Jesus Kristus. 14 Um folgad rok Got, ma tin nib kireb ni um m’ad ni bochan ko ngiyal’ ndawor mu nanged Kristus riy e dab kum paged nge mang ir e i gagiyegnag pangimed. 15 Machane ngam pired ni gimed ba thothup u fithik’ urngin e tin gimed be rin’, ni bod rogon Got nib thothup ni ir e ke piningmed. 16 Ya be ga’ar e babyor nib thothup, “Thingar mpired ni gimed ba thothup, ya gub thothup.”
17 Gimed ma pining Got ni Chitamangimed ko ngiyal’ ni gimed ma meybil ngak, ni ir e ma pufthinnag urngin e girdi’ nder ma laniyan’, nra be’ ma be yan u rogon e tin ni i rin’; aram fan nthingar mu pired ni n’umngin e yafos romed u roy u fayleng ni gimed be liyor ngak. 18 Ya gimed manang e n’en ni kan pi’ nga puluwmed ni fan e ngan pithigmed u pangimed nib m’ayfan ni af ngomed rok pi chitamangimed ni kakrom. Gathi ban’en nrayag ni nge kireb, ni bod rogon e silber ara gol; 19 racha’en Kristus ni map’ ni ba ga’ fan e ir e ke pithigmed u pangimed nib m’ayfan, ni pi’ ir ni bod ba pifak e saf ndariy bang u dow nib kireb ara ba alit. 20 Ni Got e turguy u m’on ko ngiyal’ ni ba’aram ndawori sunumiy e fayleng riy, ma ke yib i m’ug ngomed ko tin tomur ney e rran ni bochmed. 21 Nu daken Kristus e mich Got riy u wun’med, me Got e faseg ko yam’ nge pi’ e fla’ab ngak; ere michan’ nge pagan’ romed e kam dugliyed nga daken Got.
22 Me ere chiney e kam machalbog niged gimed ni fan e kam folgad ko tin nib riyul’, ma gimed be par nrib t’uf romed e pi’in ni gimed nike mich Kristus u wun’rad ni bod gimed, mra bigimed ma ngari t’uf rok bigimed u polo’ i laniyan’. 23 Ya thin rok Got ni bay e yafos riy ma dabi m’ay bi’id e ke pingegmed kan gargelegmed bayay kam manged pifak reb e matam ni dabi yim’ bi’id; 24 ni bod rogon ni be yog e babyor nib thothup ni be ga’ar:
“Girdi’ ni gubin e yad bod e pan,
ma urngin fel’ngirad e bod rogon e floras ko pan.
Bay yim’ e pan, me mul e floras riy,
25 machane thin rok Somol e bay i par ni dabi m’ay bi’id.”
Re thin nem e fare Thin Ni Bfel’ ni kan machibnag ngomed.
* 1:11 ngiyal’ nge rogon ni bay yib; ara mini’ e cha’nem nge wu’in e nge yib. 1:22 u polo’ i laniyan’; boch e babyor e bay riy ni u gumircha’en nib machalbog.