116
Be’ ni chuweg Got e yam’ u puluwon me pining e sorok ngak Got
Ba t’uf SOMOL rog ya ma rung’ag lungug;
ma motoyil ko meybil rog.
Ma motoyil ngog
ni gubin yay ni gu ra pining.
Riy’an e yam’ e longbiyeg;
dogwen e low ko yam’ e chuchugur ngog;
mu gum’ ko marus nge magfan’.
Ma aram mu gu pining SOMOL ni lungug,
SOMOL, wenig ngom mu ayweg e pogofan rog!”
 
I SOMOL e ba wurngan’ ma bfel’;
Got rodad e rib marnguy.
I SOMOL e ma yoror rok e pi’in ndabiyag ni ngar ayuweged yad;
nap’an ni gu bay u fithik’ e riya’, me chuwegeg u fithik’.
Lanin’ug, nge pagan’um,
ya SOMOL e rib manigil e tin ke rin’ ngog.
 
I SOMOL e ke chuwegeg ko yam’;
ke taleg lu’ag
ke teg nde yag ni nga ni gel ngog.
Are gu be yan u p’eowchen SOMOL
u roy u but’ ko pi’in yad bfos.
10 Gu be par ni bay e mich rog, ni mus ko ngiyal’ ni lungug,
“Kar gu masengseng,”+
11 ni mus ko ngiyal’ ni gu rus me lungug,
“Dariy be’ ni nge pagan’uy ngak.”
 
12 Be mang e rayag ni gu pi ngak SOMOL
nge yan nga puluwon gubin e pin’en ni bfel’ nike rin’ ngog?
13 Bay gu chibiy ngalang fare kap ni fan ko mat’aw ngak
mu gu pining fithingan SOMOL,
14 u lan e mu’ulung rok urngin e tirok e girdi’
e bay gu pi’ ngak riy e tin gu micheg.
 
15 Rib amith u wan’ SOMOL,
nra yim’ reb e girdi’ rok!
16  SOMOL, I gag e tapigpig rom;
gu be pigpig ngom ni bod ni rin’ e chitnag.
Gur e ka mu ayuweggeg u pa’ e yam’.
17 Bay gu pi’ ngom e maligach ni ogmagaer
mu gu pi’ e meybil rog ngom.
18 Bay gu pi’ e tin gu ognag ngak SOMOL
u p’eowchen gubin e girdi’ rok,
19 u lan e yoror ko naun rok SOMOL
u lan yu Jerusalem.
 
Ke sorok SOMOL!
+ 116:10 2 Kor 4:13