149
Ba tangin e sorok+
Ke sorok SOMOL!
 
Nga non’ reb e tang nib be’ech ngak SOMOL;
ngan pining e sorok ngak u lan e mu’ulung ko girdi’ rok nib yul’yul’!
Israel, nge felan’um, ni bochan e En ni Sunumiyem;
girdi’ nu Zion, nge felfelan’med ni bochan e pilung romed!
Mu churu’gad ni gimed be pining e sorok nga fithingan;
mi gimed chubeg e drum nge harp ni gimed be pining e sorok ngak.
 
I SOMOL e ba felfelan’ ngak e girdi’ rok;
ma tolangnag e pi’in nib sobutan’rad nma gel nagrad.
Nge felfelan’ e girdi’ rok Got ko gel ni karted
miyad tang u fithik’ e felfelan’ ni n’umngin e nep’.
Ngar tolulgad ngalang ni yad be pining e sorok ngak Got,
ni bay e saydon rorad u pa’rad nib m’uth
ngar li’ed e pi nam
miyad gechignag e girdi’;
miyad michigiy e pi pilung rorad ko chen,
nge pi’in yad ma yog e thin rorad ko chen ni wasey;
ngan gechignag e pi nam ni bod nike yog Got.
Irera’, e gel ni fen pi girdi’en Got.
 
Ke sorok SOMOL!
+ 149: 1 Sa 22:1; 24:3