20
Ba meybil ni fan ko gel
1 Mang e yigi fulweg SOMOL lungum ko ngiyal’ nike yib e oloboch ngom!
Mang e yigi yororiyem e Got rok Jakob!
2 Mang e yigi pi’ e ayuw ko Tempel rok
ko fare Burey nu Zion ngeb ngom.
3 Mang e yigi fanay gubin e maligach rom
me fel’ u wan’ e maligach ni mo’oruf ni ka mu pi’.
4 Mang e yigi pi’ ngom e n’en ni fiti lanin’um
me tay gubin e tin kam tanomnag nga tagil’.
5 Ma aram e bay da garus niged e felfelan’ ni fan e gel ni kam tay
ma gadad madnomnag ni kam gel ni gadad be pining e sorok ngak Got.
Mang e yigi fulweg SOMOL taban gubin e tin ga ma ning.
6 Ku gu nang e chiney ni SOMOL e ma gelnag e en ir e turguy ni nge pilung;
ma fulweg taban e meybil rok u tharmiy ni tafen nib thothup,
ma gelngin nib gel e i galnag ko pi mael.
7 Boch e girdi’ e be pagan’rad ko pi chariot ko mael ni bay rorad,
ma boch e be pagan’rad ko os rorad,
machane gadad e be pagan’dad nga gelngin SOMOL ni Got rodad.
8 Mit i girdi’ nem e bayi tun ayrad ngar awgad nga but’,
ma gadad e bay da puwgad ngalang ngad sak’iygad ni gadad bmudowgil.
9 A SOMOL, mu gagiyegnag fare pilung nge gel;
mu fulweg lungumad nnap’an ni gamad ra piningem.